حجر صوان

Part 43

يوم جديد

نبدوه من انسان معطاء لابعد حد .. انسان قد ما قدم للي حواليه يحس بالتقصير ناحيتهم

جمعة كان مقعمز قدام الحوش من جهة المطبخ في انتظار قهوة الصباح من ايدين زوجته

جت ليلى و مدتهاله: تفضل

جمعة بحزن خذي منها الصفرة و حطها ع الطاولة و حط ايده جنبه ع الكرسي : تعالي

قعمزت و واضح من ملامحها و من عيونها قداش حزينة و متأثرة

جمعة مع ان وجعه لا يقل عن وجعها و ممكن اكثر لان حس روحه مذنب وقت اجبرها تتزوج مؤيد و زيادة رفض يتدخل وقت بلغه خالها باللي صار معاها في مصر و منع جهاد من التدخل او اخبار الهاشمي ممكن وقتها الكل يبرر تصرفه لكن لما تكون النتيجة مفجعة للهالدرجة حتى الانسان اللي كان ع صواب و متأكد من هالشيء لا يسلم من الشعور بالندم ..

جمعة شد ايدها بايديه الاثنين : ربي يصبرك يا غالية اللهم لا اعترض

ليلى اجهشت في البكاء من وسط قلبها و جمعة ما تحملش و حضنها: اسسسس خلاص يا مراة الله يهديك انا جاي منصبرك و نبيك تصبريني مش جاي نزيدها عليك

ليلى مستمرة تبكي : ياناعليا يا جموعة قلبي تفترش عليها يا ريتها مغير ماتت موتة ربي ما كنت خفت عليها من عذاب الاخرة حاسة روحي قصرت معاها يا جمعة البنت نا اللي ربيتها و الله ما فرقت بينها و بين ضنايا لكن الباين اني كنت مقصرة و موش فاطنة ..

جمعة تذكر قصتها و تفاصيلها و هذا سبب ان ما خبر زوجته بشي من اللي داراته مسرة لان مش حاب يشوه صورتها في نظر ليلى الام : وحدي الله يا ليلى انت في شنو بتقصري يعني درتي اللي عليك و البعيد يشهدلك قبل القريب و هي نفسها كانت تحبك هلبة و انت عارفة

ليلى تمسح في دموعها و داهشة : عارفة يا جمعة بس من بعد ما تجوزت المصيبة هضا و نا ما نشدت عنها كنت شايلة عليها اللي وافقت تجوز وقت كنا فاقدين الهاشمي اسم الله عليه و خليفة الله يرحمه القيتها واعرة عليا نحقها مع واحد ثاني غير هشومة ما كنت عارفة انهن نصيبات و كان لازم نرضى و نسامحها بنيتي قزونة و غريبة قعدت في بلاد ثانية ياما حقت منه اللي صار فيها هكي الله لا تسامحه

: معش تبكي يا امي دموعك غاليات و مش لازم ينزلن ع حد باع و خان سالتك بالله معش تبكي

جمعة يفنص فيه يييه يسكت

ليلى وقفت : هاشمي وينك يا اوليدي كيف ما تجيش تعزيني و تصبرني و لا تسلم عليا كنك حالك منقلب يا هاشمي

الهاشمي قدم و باس راسها و حضنها : صدقيني ما تستاهل دموعك يا امي ماتت ربي يرحمها لكن ما تستاهل دموعك

ليلى باعدت عنه : عليش تحكي هكي ؟

الهاشمي تنهد : يجي يوم و نحكي كل شي توا مش قادر نقول اي شي سامحيني لكن معش تبكي