و هكذا هي الحياة
روحوا جهاد و بالقاسم للبلاد و في طريقهم خطموا ع جمعة اللي كان في زيارة لاحد ابناء عمومته في مستشفى القلب بتاجوراء يعني ودع الهاشمي في الطريق
واول ما ركب معاهم كان واضح عليه ان متاثر و ممكن سبب ذهابه لزيارة ابن عمه كانت هروب من ان يعيش اللحظات الاخيرة لوداع ابنه اللي اكيد صعبة عليه
زوبا حارت بمن تتصل ع شان تطمن عليه و ع صغار عمها و ما القت قدامها الا جدها اللي ما كلماته الا مرات معدودة من وقت جت لمصر
رن تيليفونه و هو باسوء حال محبط و حاس بالذنب شاف الرقم خارجي من كبر هباله يحسابه الهاشمي لحق وصل و بيتصل بيه عاد يا جدو هذا مش ونيس يوصل في زمن قياسي 😂
المهم رد ع طول : الوووو
زوبا : جدو كيف حالك؟
الجد زبطها : زنوبيا
زوبا : اي يا جدو انا نبي نسال عليك كيف حالك و منسال ع صغار خالو خليفة طلعت طيارتهم والا
الجد : طلعت يا بنتي كلمني جهاد و قالي
زوبا ما قدرت تسال اكثر : باهي انت كيف حال صحتك؟
الجد : حال اللي مفارق ضناه يا بنتي شنو حالي ؟!
زوبا بنبرة حزينة : ربي يجمعك بيهم قريب ان شاء الله
الجد : ان شاء الله
زوبا : خلاص جدو وقت يوصلوا طمني عليهم
الجد : باذن الله
زوبا : مع السلامة
الجد : مع السلامة
طوط
طوط
حطت التيليفون ع جنب و ماعندها نية تدير شي لا تقرا و لا تتفرج و لا تاكل و لا تشرب
رن تيليفونها فزت من مكانها و في بالها حد من ليبيا بس لما شافت الشاشة كانت امها
فتحت الخط : ايوا ماما كيف حالك
احلام : الحمدلله.. بدون مقدمات شني العار هذا زوبا فهميني معقولة توصل بيك للدرجة هادي
زوبا بملل : شني صار ثاني
احلام : اللي صار انك طلعتي وحدة انانية معقولة تفرقي بين خوك و البنت اللي يبيها ع شان نصحاتك ما تتلاقي انت وال#### تمشي في الاخير تعطيه موعد في المطار و تقولي قرارك و ما قرارك ع الزواج. تي انت مازال مش مستوعبة شني يعني وحدة متزوجة و تدير في مواعيد لشخص ثاني
زوبا معش عندها جهد لخوض نقاش : شني تبي من الاخير
احلام بقسوة : يا تجينا اهني و تكملي قرائتك يا اما تخلي راجلك يحدد موعد العرس في وقت اقرب من شهر ستة
زوبا بدت عندها مناعة ع الاحساس باي صدمات : تمام
احلام بفرحة ع انها جايتهم : معناها وقفي قيدك و جهزي امورك و بوك توا انقوله يحجزلك
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
