حياة : فحني بلعت ريقها .. حني يعني كلمنا الشخص اللي في الاكاديمية يحط منوم لمصعب و يبعث الرسالة اللي وصلت لمصعب لاخته و يطلب منها تمشي للعنوان
محسن بعياط و هو يحاول يفك روحه: ضميه فمك يا كلبة
و هي سكتت
الهاشمي بدون وعي هجم ع محسن و اللي ما قدر يديره لمؤيد دارهوله طاح فيه ضرب لعند اغمى عليه و لف عليها زي الاسد المجروح داهش : كملي يا امسخة لعنة الله عليكم كلكم
حياة بخوف : يعني وقت تمشي لليخت بلغنا فيها بوليس الاداب هي وياه يشدوهم في حفلة مشبوهة و في من ح يصورهم و ينزل كل شي ع النت و حطينا مخدرات و شرب في اليخت و الله انا مش ذنبي كله من اسماء و من محسن هددوني يا انفذ يا محسن يسود عيشتي و يلزني من الحوش
الهاشمي كان زي المجنون يمشي و يجي قدامها : الراجل شوفيه بعث رسالة لاخت مصعب
حياة ترعش : مش عارفة
الهاشمي فتح شنطتها و طلع التيليفون : شنو الرمز
حياة تبكي : 010289
الهاشمي دار الرمز و فتح التيليفون شاف مسج
"كله تمام كابتن مصعب في سابع نومة و المسج خلاص بعتو لاخته"
الهاشمي عيط: هاااااااع
و هي ميتة خوف
الهاشمي : عندك رقمها
حياة : اي اي بس هي حاطتني في الحظر
الهاشمي شافلها بتهديد
و يدور في الاسماء لعند القي رقم زوبا حفظه في تيليفونه
حياة بتوسل: شني بتديرلنا انا مش لازم حد يسمع بيا امبكري لاني خفت من محسن كذبت عليك و الله ماهو راجلي و لا نعرفه
الهاشمي : صار هكي مية مية
ضربها ع راسها بقوة لعند داخت و فكهم و نزل و بلغ فيهم من تيليفون عمومي وقتها كان قريب مغرب خلاص ما كان منه الا يتصل بزوبا بس زوبا ما ردتش عليه لانها كانت راقدة
زي ما خوها راقد بتاثير المنوم و المشكلة ان مش عارف عنوانهم
قعد حاير كيف يتصرف استاقض بغباءه كيف ما خزن رقم الشخص اللي يشتغل في الاكاديمية كان هذا راهو عرف عنوان اليخت الحل قدامه ان يجيب مصعب بسرعة و يتصرفوا
و بالفعل مشي ع عجلة للاكاديمية متاع الطيران اللي طلع عنوانها من النت
في الوقت هذا فاقت زوبا و طول للحمام اكرمكم الله توضت و طلعت قضت صلاة العصر كانت منهكة نفسيا بعد اللي صار مع هبة قررت تتصل بسهام و تستشيرها
شافت التيليفون كان فيه عدة اتصالات من رقم الهاشمي و طبعا ما عرفاته و شافت رسالة مصعب
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
