حجر صوان

المقدمة

نقطة وصل و قد تكون قطع قد تكون مفترق طرق نهاية طريقك مع شخص تكون بداية ليك مع شخص غيره و هالغير هذا يكون نفسه في نقطة الانفصال ع شخص ثاني و يعتقد انها النهاية ليكتشف بعدها ان بدايته حانت مع شخص ثاني و هكذا ..

لكن عارفين وين الغريب ؟! الغريب في الموضوع وقت يكون السبب هوا نفسه يعني النقطة الفاصلة تكون نفسها او عكسها

عارفة كلامي مش مفهوم بس شوي شوي ح تفهموا المقصود من الكلام هذا

روايتنا هالمرة ح تكون بدايتها زمنيا من ال 2011 بمختلف مسمسياتها الهدف من تناولي للموضوع مش سياسي ابدا و لكن كيف هالفترة اثرت ع حياتنا اجتماعيا ! سوى اللي مع او اللي ضد !!

و من اهني نشوفوا العيلة الاولى في روايتنا واللي منها البطلة

عائلة موسى ال###  مواليد 1965 و يكون قاضي معروف يسكن في قلب العاصمة طرابلس  ماسك كذا منصب مهم اكثر من مرة من ضمنهم امانة العدل وقتها بس من سنتين استقال من القضاء و تفرغ للتدريس في الجامعة و الأكاديمية و معهد القضاء بالاضافة لأبحاثه و الموتمرات الخارجية و طبعا عنده بيزنس خاص بيه و استثمارات داخل و خارج ليبيا بالنسبة لزوجته دكتورة أطفال اسمها احلام مواليد 1970
ناس متعلمين حالتهم المادية ممتازة عائلتهم تتكون من ولدهم الكبير اسمه مصعب مواليد 1989 كابتن طيران خاطب بنت عمته اسمها سهى مواليد 1993  و يموت فيها و ح نتعرفوا ع شخصيته اكثر مع الحلقات الجاية

و بنتهم زينب و ما ينادوها الا زوبا و يا ويلهم ينادوها زينب هي مواليد 1995 تقرا في الشهادة الثانوية كاسبة سنتين دلوعة بوها بمعنى الكلمة و دلوعة خوها جوها حلو تحب الهياجة و الضحك و البصارة مخطوبة لولد عمها اوس يحبها و يموت عليها و هي متقبلاته و حاسة اتجاهه بمشاعر حلوة جديدة عليها طبعا هي تحب تلبس و تسافر يعني من اهم أسباب إعجابها بأوس ان شاب حلو و حالته المادية مرتاحة زي بوها في نفس الوقت في جانب من شخصيتها جدي هلبة لكن هي ما تحب تبينه لحد و ح  نكتشفوا تفاصيله مع احداث الرواية

عندها أختين مواليد ال 2000 توام اسمهاءهم لين و سيلين
و هي تموت فيهم

و اخ مواليد ال 2005 اسمه مهيب اخر العنقود و دلوع الكل

و هذه العيلة الاولى عندنا

موسى عنده اخ اسمه محمد تاجر اثاث وهذا ولده اوس و مع احداث الرواية ح تتعرفوا ع عيلته اكثر ع حسب ظهورهم

واخت اسمها نزيهة و هذه اللي بنتها سهى و خاطبها مصعب

العيلة الثانية

و هالعيلة هذه من  منطقة جبلية تبعد  ع العاصمة مسافة ساعتين

تتكون من جمعة ال### ضابط جيش متقاعد و معروف بالسمعة الطيبة  و صرامته لكن حنون مع اهل بيته مواليد 1960  
و يكون الآخ الأكبر لأحلام زوجة موسى

متزوج من ليلى مواليد 1964   
ربة بيت و هي في الأصل من الشرق و عندهم من الأبناء

الهاشمي مواليد 1983 جمال و شخصية شعره كستنائي وعيونه عسلية و بشرته قمحية نظرة عيونه موت اطيح الطير الطاير من قلب السماء   يشتغل في مزرعة بوه و عندهم معصرة زيت و مصنع للنشاف (الإسفنج) طبعا  يعشق بوه و يقتدي بيه في كل شيء هوا عصبي و لكن ببرود يعني مش اي حاجة تعصبه لكن لو يولع ما في حد يقدر يخمد نيران غضبه ابدا متحمل المسووليةً مع بوه علاقته بالكل ممتازة  يعشق بلاده اللي في الجبل و ما يحب يمشي للمدينة رغم عندهم فيها شقة بس يفضّل يقعد في البلاد خريج كلية..... ح نخلوها مفاجاة نبيكم تتوقعوا شن تخصصه ؟! و طبعا مكمل دراسات عليا و يدرس في الجامعة و خاطب بنت عمه اسمها مسرة مواليد 1990  خطبة تقليدية بس لان بوه طلب منه هالشيء لكن مقتنع بيها بحكم متربيين جميع و لان ع قناعة ان بنات منطقته افضل من اي مكان ثاني و خاصة المدن و بالتحديد طرابلس لان عنده معاها قصة قديمة و ح نعرفوها مع حلقات الرواية ، لكن مسرة تحبه موت و ما ترضى فيه شي طبعا هي بوها و امها متوفيين و ما عندهاش خوت و عايشة معاهم و لهالسبب بوه و جده طلبوا منه يخطبها

ولدهم الثاني جهاد مواليد 1990 هاجر لماطا من وفاة خوهم الكبير عمر مواليد 1979 

بنتهم الوحيدة علياء مواليد 1993 بنية كيوت و جميلة و دلوعة بوها و خوها اي حاجة تبيها تاخذها تقرا في معهد معلمات بنات بس تخصص حاسوب

طبعا جمعة عنده أخين واحد اسمه عبدالقدوس و متوفي من سنين و يكون اب مسرة خطيبة ولده

و الثاني اسمه خليفة و ح يكون ليه دور كبير في الرواية يكون مواليد ال 1974 تاجر و رجل اعمال مستقر في طرابلس بسبب مشاكل عائلية قديمة ، عنده اثنين اولاد فقط
ايهم مواليد 2003
يزن مواليد 2004

زوجته اسمها اسماء مواليد 1986 معلمة في الأصل من نفس المنطقة لكن تكرهها و ما تحب تمشيلها أبدا و ديما تفتعل في المشاكل بين راجلها و خوته و اكثر شخص عندها ضغينة اتجاهه هوا الهاشمي الجد و الحفيد لأن تأثيرهم وأضح ع زوجها و إفتعالها للمشاكل عشان يكره المشي غادي بس ديما تفشل لان خليفة يموت في بلاده و في أهله صح يحبها بس ديما يحاول يلقى نقطة وصل بينهم ....

و الجد إليّ هو أب جمعة اسمه الهاشمي شخصية معروفة من أعيان البلاد كلمته ما اطيح الارض شخص متزمت لافكاره و الهاشمي ولد جمعة قريب ليه هلبة و يقتدي بيه في كل شي و مستحيل يرفضله طلب مهما صار ..

هذه كانت مقدمة الرواية و مازال فيها شخصيات هلبة ح نقدمها في كل حلقة زي ما تعودتوا مني و متمنية من كل قلبي تعجبكم و تنال استحسانكم حبيباتي ❤️❤️❤️