نرجعوا بالوقت شويا للخلف الساعة اربعة مساء
ونيس من اول ما استلم اتصال زوبا نار ركبت فيه و عارف الشخص المذكور و شهرته يعني شك زيها ان يكون مبعوث ليه من عمها او اوس و نفس تفكير زوبا ما حب يخلي مصطفى يتدخل لان عارفه مش حً يتصرف بعقلانية لان من اكثر من تاجروا بقضيته هو بالذات من جهة و السبب الثاني خافه يتصرف مع زوبا بقسوة ع شان هكي اتصل بمعتز
و هو يحط في ملابسه في صاكو صغير و اوراقه وً جواز سفره كان يحط في الملابس و الحاجات و التيليفون ع وذنه
معتز كان راقد رد ع طول :خير
ونيس : معتز نبي منك خدمة احكيلي مع صاحبك اللي يخدم في المطار و خليه يدورلي ع اقرب رحلة لمصر نبي مكان في اقرب رحلة
معتز قعمز و مسح ع وجهه وكله قلق و خوف : كنك يارا شنو في ؟! و عليش ماشي لمصر عمك صار معاه شي
ونيس : يا معتز مش وقت الكلام هضا تقدر تتصرف او تخليني نمشي ع حالي ان شاء الله بالسيارة
معتز: خلاص تو نتصرف يارا و انت تعقدت
اتصل معتز بصديقة و قاله في رحلة ع الخطوط الافريقية طالعة بعد ساعة و فيها اماكن فاضية طلب منه يحجزله فيها
و معتز ع طول بلغه : مشكور واجد
طوط
طوط
معتز : انجن رسمي هضا
علياء قعمزت جنبه : منو هذا
معتز تامل منظرها الحلو كانت موتية روحها ع شان تنزل تحت : تي مالك و ماله واحد طايح بوجه في وحدة كيف طيحتي نا
علياء ضحكت : ههههههه وكيف طايح فيا انت
معتز جبدها و قرب منها و يشبحلها بنظرات حلوة : تعالي نحكيلك
نزل ونيس : السلام عليكم
كانت امه و فاطمة مقعمزات في صالة الحوش: و عليكم السلام
جمعية: كنك شايل معاك الشنطة وين معدي؟
ونيس : مستعجل يا امي عندي شغل ضروري في مصر
جمعية بدت عندها حساسية من اسم مصر : و كنك ما عديت مع عمك الخبر ايسما
ونيس قدم منها و باس ع راسها و من ثم باس ع راس جدته : ما كان عندي علم توا بس رنوا عليا ... هيا في حفظ الله
و طلع بسرعة سلم ع بوه في طريقه و مشي للمطار و ما طول في الانتظار لعند اعلنوا ع اقلاع الرحلة ركب ونيس و كله خوف ع اللي صار مع زوبا بالضبط شني
الساعة و نص اللي استغرقتهم الرحلة فاتوا عليه دهر
و ما ان حطت الطائرة في الاراضي المصرية كان ع نار يسابق الكل ع شان ينزل الاول مع ان ما كان يحبذ التصرفات هادي اللي تستفز فيه في العادة بس هي السبب في جعله يخالف كل ما كان مقتنع بيه
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
