اوس كان مقرر بعد يخطف زوبا و يركبها معاه في السيارة ياخذها ع طول لتونس و منها كان مقرر يمشي بالسيارة للجزائر و من ثم ناوي يستقر في المغرب عنده فيها اصدقاء عن طريق خدمته و اكيد الفترة اللي فاتت وقت كان يساير في نهى كل هدفه انها تغض الطرف عنه و يتحرك براحته بعيد عن مراقبتها هي و بوها هذا غير الفلوس اللي خذاهم منها بدون علمها
مقعمز ع اعصابه و يستنى في رسالة من اسماء تبلغه ان زوبا في حوشها
اسماء متوترة و تفكر كيف بتتصرف و كيف تخلي زوبا تمشي لحوشها لان هي حاليا عند ليلى ع اساس بتساعدهم في تجهيز الحلاوات للعرس
و زوبا تتفرج و مستمتعة بيهم كيف يغنوا في بو الطويل و خاصة فنارة اللي كان كلامها كله بمعني
و كل شوي زوبا تطلب منها تعاود
اجواء جميلة و حميمية مع ريحة البخور و شاهي العالة و الاصوات المتداخلة مرة يغنوا و مرة يهدرزوا مع بعض
جهاد من برا ينادي : علياء يا علياء
علياء وقفت : هيااااا
جهاد : اخخ راسي تعرفي داخ منكم و من طلباتكم شنو مازال تبوا حاجة لاني طالع لمكان منشوفه مرات ناخذه و نديره قهوة
علياء : ربي يعاونك وخيي خلاص توكل باذن الله ما في شي ناقص
جهاد: ان شاء الله نقصكم شي بري لبوي خليه يتحرك حسيته تنبل هلبة وعبي عليا
علياء ضحكت: هههه حرام عليك امتى روح هو من المصنع؟
جهاد: اماله سلامات قبل ما امك تستاقض بروح اللوز و بقلب الفستق سلاااااام
علياء ضحكت عليه و خشت
ليلى : كنا جهاد؟
علياء : قال منطلع يسال لو نبو شي قلتله توكل
ليلى : هييي تؤ ماو قبل نريده يجيب حفاظات ندسوا فيهن الحلويات يا عليك عملة درتيها فينا
علياء : ساهل يا امي بوي قاعد توا نقولوله
اسماء تشتغل في الحلاوات و في عقلها مليح بكل حتى هذا انتلف : اي قولي لجمعة يجيبهم يا ليلى و خلي علياء تمشي معاه مرات ناقصتها حاجة حتى هي و ابتسمت بخبث (لان سمعتها قالت لزوبا تبي تخطم ع المزين و تتفق معاها ع تفاصيل طلتها يوم عرسها)
علياء حست ان الفرج جاها: اي مش قلتلك عادي يمشي بابا ونمشي معاه انا و زوبا
اسماء فنصت : احم لا شني بتمشو كله والحوش مني بيقعد فيه
زوبا : اي حقا توكلي انا قاعدة و بعدين عندي ما ندير
علياء : اوكي
جت سهام جايبة في ايدها طاجين الغريبة : هذا اخر طاجين للغريبة طابت الحمدلله كملنا
فنارة : روروروييييييي الحمدلله بالصحيحة و الهنا و نفتكوا من العين الحسودة اللي تودنا بالشر ابعدها عنا ربي سيدي مولاي
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا