علياء : بس هذه مش من جدي يا زوبا
زوبا ضغطت ع السلسلة و باستغراب : اماله من مني ؟
علياء نزلت عيونها و خافتها تحرج منها : سامحيني بس انا عطيت وعد نعطيهلك و وعد اني نقول انها من جدي لكن الهاشمي هو اللي اعطاهلي و طلب مني نكذب عليك
زوبا حست بقلبها يوجع انها تحبه اكثر من روحها شيء و انها تخون ونيس حتى و ولو بالغيب شيء ثاني : علاش بس حرام عليك و عليه انا وحدة متزوجة و نخاف ربي ! تخيلي لو عرف ونيس كيف تصرف معاي كان انحرق قلبه اكثر ما حرقتهوله الله يسامحكم بس خوذيها خلاص و معش ترجعيهالي و الامانة اللي اعطيتهالكم يا ريت تسلموها لونيس لو عشت اعطيه الرسالة و لو متت خليه يشوف الفيديو اللي سجلتيهًولي
علياء :معاك حق و سامحيني بالله عليك عارفة روحي غلطت بس معش عرفت قعدت بين نارين
زوبا : مسامحة بس في الجديد نصيحة ديما ديري الحاجة اللي ما تغضب ربي اما البشر عمرك ما ترضيهم ع حساب دينك
علياء : معاك حق
سهام دخلت : زوبا شني معنوياتك خلي ثقتك في الله كبيرة و كلنا معاك
زوبا : الحمدلله انا موكلة امري لله بس بالله عليكم وصيتكم امي خلوها تعرف لو صارلي شي اني درت كل شي بقناعتي و باصرار مني و رفضت تدخل اي حد او ان شخص ثاني يتبرعله و مصعب حتى هو خلي مصطفى يعطيه الامانة اللي عندك يا سهام و سامحوني و تفكروني بالطيب و كل ما تفكروني بدال ما تبكو ادعولي و سلمولي ع حنينة فنارة و حنينة فاطمة و مرة خالي ليلى و انت يا علياء سلميلي ع جهاد و قوليله (بدت تبكي ) الكلام اللي بعثتهوله كله كذب درت هكي لاني حسيت اني ديما محملاته همومي راهو زي ما قلت عليه هو دنيتي لا يوم نهونه و لا نبدله بحد مهما صار.. و الهاشمي خليه ينساني و يعيش حياته و وصليله اني فرحانة باللي يدير فيه مع صغار خالو ... اي يا علياء سلميلي ع بوك و ع جدو هلبة و سجى سلميلي حتى هي عليها و قوليلها ترد بالها من خوي و خواتي و بوي و كلهم
هما يبكو
خشت الممرضة : السلام عليكم هيا يا زينب لازم نشيلوكي للعمليات
زوبا : جاهزة استودعكم الله
سهام و علياء اثنينهم طبسوا يبوسوا فيها و يبكوا : في حفظ الله
خذوها الممرضين و عيونها عليهم مبتسمة كل املها و دعاءها ان عمليته تنجح و يتقبل كليتها و يعيش اما هي راضية باي شيء من بعدها
وصلوا بيها للعمليات و دخلوها و حطوها ع السرير لفت براسها ع اليمين شافاته غمضت عيونها : ياربي في كل الاحوال هادي اخر مرة منشوفه
و بدت تزاحمها الذكريات ...
اول مرة شافاته في البلاد وقت كان اوس بيخطفها في اللحظة هادي تمنت لو خطفها اوس و ما شافها و لا تعلق بيها نست ان قايلها كان جاي لسبب واحد ع شان احتمال بسيط يشبحها فيه
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
