حجر صوان

تابع ل part 37

اول ما قال : السلام عليكم

هي قريب داخت من الضغط النفسي و التوتر وقفت و راسها تحت و ترعش زي المروحة ع قول نساوينا الكبار

ابتسم لان لاحظ توترها

قرب منها و حط ايده ع راسها قري عليها المعوذات و اية الكرسي و من ثم باس ع راسها و هي نزلت عليها سكينة و كأن جمرة و طاحت في اميا غمضت عيونها و ابتسمت و تنهدت لعند هو حس عليها

قام الطرحة و انبهر بجمالها الطفولي و البريء : تبارك الرحمن عليكي سمحة واجد حد الزين تحل العين قمر ليلة عشرة واثنين عليها الاشعار دواوين تمجد فيها تستاهل و يخيل عليها

(رحمة الله ع الفنان محمد حسن)

هي ابتسمت ع كلمات الاغنية : شكرا

معتز شدها من ايديها و قعمزها ع الصالون و قعمز جنبها : ننقاني موش مصدق انك معايا و ليا حلالي نا و مراتي نا ربي يقدرني و نسعدك يا سمحتي

علياء وجهها احمر من الخجل : و ربي يقدرني حتى انا

معتز : حتى انت شنو ؟!

علياء رفعت اكتافها : نسعدك

معتز : باهي انا ما تبي تحقيني يعني

هي اهني تجرات و قامت عيونها فيه عجبها لين خلاص واضح شخصية و جذاب ابتسمت

معتز: ياناعليا عديت فيها نا خلاص يا ريتني سكنتلهم ع شان ندير دخلتي اليوم حتى نا يا بنت منزمطك انا

علياء بدت ترجف و خافت

معتز حضنها بين ايديه ع شان تهدا و يهمسلها: عمرك ما تخافي مني نا خافي من الدنيا كلها الا نا .. نا من اليوم ظهرك و سندك و خيك و باتك و صاحبك و راجلك نا امانك من غدر الزمان يا بنت الناس و حق من خلق الكون اني حبيتك من اول ما حقيتك تبكي يوم عزاء عمك خليفة رحمة الله عليه وقتها كنا فاهمين ان حتى الهاشمي ميت و سمعتك وانت تعيطي و تقولي خيي قلبي تفترش عليك و اول ما روحت لبنغازي نشدت عنك جدتي بس انفجعت فجعة سوداء ما نحكيلك عنها وقت حكتلي انك مخطوبة لكن الحمدلله النصيب حكم و تميتي ليا

علياء تفاجئت بكلامه تحساب الخطوبة تقليلدية و اهني فرحت و اطمنت اكثر ان شايفها و يبيها و اطمنت بين ايديه حست ان الراجل هذا صدقا يحبها و يبيها بدت انفاسها تهدا

هو باعد عنها : ها شنو اطمنتيلي ؟

هي ابتسمت و يا دوب سمع صوتها : اها

تجرا و طبع بوسة حنونة ع خدها : ربي يقدرني و نسعدك طول العمر

و هي ذابت من خجلها

سمعوا صوت جهاد ينادي في معتز: هوووي معتز

معتز ضحك: هههههه باهي اللي صبر لعند توا هيا نخليك توا يا سمحتي صبي غيري و ارقدي بدري لان بكرا طيارتنا الظهر