اي حد مستحيل يتمنى يكون في موقفه !! في اغنية المرحوم محمد حسن رحمة الله عليه طق العود .. كان في مقطع روح كبده كيف عفاسه.. يعني كبده صارت مثل الاثر اللي تخليه القدم ع الارض هو مش كيف عفاسه كبده كانت متمرمدة محروقة و من كثر ما انسحنت صعب تخلي اثر ...
دخل لمقر الكتيبة اللي حكاله عليها بالقاسم و من حظه كان رفيقه في الحرب و اسمه المنتصر لو تفكرتوه مًوجود فيها
المنتصر بفرحة كبيرة وقت شافه حضنه و بقوة : يا اهلين بالغالي وين وين هكي الناس تنسى العشرة و ايام الحرب بالسهولة هادي يا راجل
الهاشمي حضنه و كان متمني لو ترجع هاديك الايام افضل هلبة من اللي تتالى عليه بعدها : في القلب والله غير دنيا و لهتنا يا صاحبي
المنتصر تنهد :معاك حق هيا تعالى معاي نشربوك قهوة
الهاشمي واضح ان مش طايق المكان لا لشيء الا لسابق معرفته بوجودها فيه: لا يا راجل انا والله جاي في موضوع و ما كنت نعرف انك موجود هنا معاهم
المنتصر : ان شاء الله خير
الهاشمي مش قادر ينطقها فبرغم كل شيء كانت تعني لاقرب الناس ع قلبه الكثير : في وحدة هنا ... سكت... قصدي انتم شادينها قالولي و هكي و تبي الحق انا نبي منها معلومات ضروري و ع شان هكي نبيك تدبرلي كيف نشوفها
المنتصر ما فهم منه شي و استغرب سبب تحفظه في ذكر المعنية : باهي اسمها و علاش هي اهني ع الاقل ع شان نقدر نساعدك
الهاشمي بضيق كبير: اسماء ال####
المنتصر تفاجا: قصدك هادي اللي تدعي انها مرة المنجي ال###
الهاشمي : احم اي
المنتصر : هو الموضوع صعب لان متحفظين عليها هلبة وًلو طلعت حق مرته يبوا يساوموه انت عارف الوضع توا كيف ماشي هوا انشد في ايطاليا في قضية الهجرة غير الشرعية واكيد في وراه هلبة ناس اهني و الناس هادو ما يبوه يجيب سيرتهم و وجود مرته اهني بيساعدهم يضغطوا عليه و خاصة قضيتها حساسة
الهاشمي : انا هذا كله ما يعنيني يا منتصر نبيها في كم سؤال ضروري ناخذ الفايدة و المعلوم و زينه ليها و ليهم
المنتصر : اصبر شويا نكلم الامر متاعنا و نرد عليك
الهاشمي : ماشي
مشي المنتصر و غاب ربع ساعة و جي
الهاشمي : بشر
المنتصر : بعد جهاد اقتنع لكن ياغالي راهو مدخلك ع ضمانتي تربح فكنا من المشاكل
الهاشمي : اكيد و لا يهمك كون هاني
المنتصر مشي قدامه : يا راجل الناس خلاص نفوسهم تغيرت والا شني بلاهم ماني عارف فددًًونا و كرهونا في حياتنا من العفن اللي نشوفًوا فيه يعني هادي تنشد مع راجل اختها في استراحة تي وين وصل بينا الحال
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
