ج. الهاشمي عيونه مليانة بالأسئلة و يستنى في اجابة بنته و راجلها بملامح متجهمة : تكلموا خيركم ساكتين ؟!
احلام ضغطت بايديها ع رجليها و نزلت راسها و دموعها يطيحوا وراء بعض
موسى خذي نفس : خليناها عند عمها محمد
ج. الهاشمي قعمز و رمي الريموت : انت شن تقول ؟!
موسى حاول يتصنع الثبات : قلتلك قاعدة في حوش عمها لعند يعرسلها هي و ولده و بعدها تلحقنا ماهو جوازها رايح ما قدرناش ناخذوها معانا
ج. الهاشمي و الغضب مسيطر عليه شاف لبنته : و انت سيبتي بنتك و جاية بصحة وجه تنشدي ع حالي ؟! حالي ما هو حال بعد خبارتكم السو هذه ! لثاني مرة نعرف اني غلطت غلطة عمري يوم عطيتك بنتي يا موسى ال### لثاني مرة ! تي انا كان شفتوني لنت معاكم شويا بس ع خاطرها هي و انت شن درت يا موسى كمرتها نار هكي كبرها من يوم بديت تخدم في الدولة و لما عرفتها بتطيح خلاص رميت بنتك وسط النار و هربت
موسى ضايقه كلام عمه و صابه في الصميم : مش ح نرد عليك يا عمي بالنسبة لاتهاماتك لكن كلامي الوحيد اللي نقدر نقوله انها بنتي وانا ادرى الناس بمصلحتها
ج. الهاشمي و لا همه كلامه: و بنتنا و عندنا فيها حصة و لو صار فيها شي يوصل فينا و يطولنا معاها دام امها رافعة اسم ال###
موسى سكت و هو في قمة غضبه
جمعة حاول يهدي الوضع : خلاص يا بوي و بعدين البنت مخطوبة لولد محمد و بعد يهدأ الوضع بيتموا فيها يعني ليهم فيها اكثر منا
ج. الهاشمي تفكر اللي كان مخططله زمان و زاد غضبه وصل لذروته : و لو كان تقدر تقولي لو خوك حق يفكر في مصلحة بنتك ليش ما قري فاتحتها ع ولده قبل ما تسافر انت ؟! انا عندي نظرة في الناس و زي خوك زي ولده ما خشولي راس
موسى مش راضي في خوه: ممكن ما يكونوا عجبوك بس هذا ما يعني انهم يضروني انا والا بنتي يا عمي
ج. الهامشي بجدية تامة : انا نبي منك كلمة وحدة يا موسى قدام ولدي و بنتي
موسى شاف لأحلام و جمعة بنظرة خاطفة : و انا نسمع
ج. الهاشمي : توا انت مالي ايدك من خوك و ولده صح
موسى قلب فمه و ضاغط ع ايده : صح
ج. الهاشمي : معناها لو طلع كلامي صح و تطلع حاط بنتك وسط النار وقتها شن ح يصير بتجي لخالها والا؟!
جمعة يبي بوه يسكت : يا بوي خيرنا عاد ؟! و بعدين هذه بنتي نمشيلها و نفزعلها من غير ما يطلب مني لا موسى ولا احلام
ج. الهاشمي ياشر بالعكوز متاعه : انت تسكت و تخليني نتفاهم معاه
موسى مسح ع وجهه : اكيد منجيكم انتم يا عمي
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا