بعد وصول عائلة موسى للمطار انطلقت زوبا زي الطفلة و كأنها هي اللي في عمر خواتها التوأم تجري و تدور ع مصعب بعيونها لعند شافاته حاضن سهى بايد و نهى اختها شادة في ايده الثانية و عمتها نزيهة مقعمزة ع الكرسي و تضحك جنبها راجلها
ممكن المنظر عادي و مش مستفز لكن اللي زي زوبا متعلقة بخوها هلبة و هي دلوعته غارت قولوا وصلت لدرجة الغليان من حرائق الغيرة اللي اشتعلت داخلها وقفت في مكانها و ترشق فيهم بسهام نظراتها المستعرة
لعند هو انتبه طلق ايد نهى و باعد ع مرته و جري ناحيتها كان حاس و كأن ليهم سنين بعاد ع مش مجرد ساعات حضنها بحنان : وخية خوها ليك وحشة كبيرة زوبا علاش تأخرتوا
زوبا كانت حاسة ان كل شي ح يتغير كانت حاسة ان هاللحظة مش ح تجي مرة ثانية او ع الأقل مش ح تكون بنفس الحميمية اللي حاسينها اثنينهم تشبثت فيه بكل ما عندها من قوة غرست راسها بين احضانه و ايديها حاوطت ظهره اللي كان السند ليها و الملجأ و بدت تبكي في صمت
الشيء هذا يخلي اي حد يشوفه من برا يتوقعه راجع من رحلة غربة طويلة و هذا عناق عقب فراق لأعوام طويلة و لو حد من الناس اللي يتفرجوا عرف ان عريس و ليه بس ساعات مفارقها كان وصف هالمشهد يا اما بالجنون او النفاق الاجتماعي او مجرد بروبوجانذا !!
سهى بغيض : كولااااااا بنت خالي رسمي الحمدلله منرتاح منها شهر
نهى قلبت عيونها: حالة مدرهتلي كبدي !
نزيهة بتحذير : اسسس ضمي فمك انت وياها خالكم و مرته جو ردو بالكم يسمعوا كلمة هكي والا هكي خليكم عاديات
المنجي (راجل نزيهة) : اسمعوا كلام أمكم مش ناقصنا مشاكل مع خالكم
الآثنين سكتوا و مش راضيين و لكن مضطرين
مصعب باعد عن زوبا : خيرك يا فرخة بكيتيني معاك تقول كنت مهاجر
زوبا ضحكت وسط دموعها و طلعت منديل و بدت تُمسح : ههههه للاسف توا مهاجر
مصعب ضربها بخفة ع مقدمة انفها : هبلتي ؟! اي هجرة كله شهر و مروح و بعدين زي ما اتفقنا وقت نسافر نقرا في فرنسا شهر سبعة تكون نتيجتك طالعة و تسافري معانا تكملي قرايتك غادي و تحققي حلمك القانون الدولي
زوبا ابتسمت : ان شاء الله
موسى : السلام عليكم
مصعب حط ايده وراء رقبته و كان في نوع مِن الخجل مسيطر عليه : و عليكم السلام ( و قدم باس راْسه)
موسى :مبروك يا مصعب و ربي يهنيكم
مصعب بصوت واطي : الله يبارك فيك
احلام دفت موسى : اعطيني حصتي في اول فرحتي بكري و خوي و ولدي مبرووووووك يا مصعب
مصعب ضحك: هههه كل هادو انا حي عليك توريني زوبا بعدين و حضن امه و باس راْسها .. الله يبارك فيك حبيبتي
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
