يوم الزفاف حً ناخذه من اكثر من جانب ..
و بدي اليوم هذا من عند زوبا اللي فاقت تحول في حنتها شوي شوي حنت حنة طرابلسية لان احلام سالت فاطمة قالتلها عادي زي بعضه
بدت تحول فيها و كانت بلون حبات العنب مائلة قليلا للاسود وًتلمع من كثر ما سادة و ريحتها تجيب من وين
فنارة وقفت في الفم : روروييييي ماشاء الله ماشاء الله عليك حنة تبارك الرحمن بالصحة عليك و يطول عمرك بنيتي
زوبا : الله يبارك فيك حنينة
خشت احلام بالبخار : ماشاء الله ع بنيتي العسل كل شي يطلع عليها هاك بخري حنتك ع شان اللون يثبت
زوبا بدت تبخر في ايديها : شكرا ماما
هجموا عليها خواتها التوام : تهبلي زوبا
سيلين : انا منخش معاك
لين : لا انا
زوبا تضحك : هههههه من غير عراك
فنارة : لا انت لا هي يا حنى خوتها يخشوا معاها
سيلين : وعلاش العنصرية هادي
لين : مجتمع ذكوري اصلا اعداء المراة ديما النساوين
زوبا ضحكت : ههههه
فنارة فنصت : شنو يقولوا المنجوهات هادم ؟!
احلام حبت تدخل و ترقع الوضع : يبصروا ع اختهم يا خالتي هيا زوبا وقت عليك شويا و تجيك المزينة
فنارة: ربحتي يا بنتي اللي جبتيها في الحوش خير من الدوران في بلاد ماهي بلادنا
احلام ابتسمت: اي صدقتي يا خالتي ساد بعدين وقت بياخدها راجلها للفندق
زوبا تخزرطت و حست ان الموضوع بدي جدي و وقفت زوبا خذت شاور و لبست بجامة بيضاء ساتان مازال تحس بروحها في حلم زي الكذبة منتظرة حد يفيقها و يقوللها تحلمي حاسة في داخلها فراغ كبير ..
تمشط في شعرها و سرحانة
سهام من وراها باستها ع خدها بحنان : حبيبتي ردي بالك تنسي ذكر الله خليه ع لسانك
زوبا ابتسمت : ان شاء الله
حطت المشط ع دخلة علياء للدار زوبا حاطة ايدها ع حجر الصوان اللي في السلسلة و تمشي في اطراف صوابعها عليها بلطف
علياء شبحتها لعند دمعوا عيونها خذت نفس : جت المزينة زوبا يالله معانا نفطروا قبل تبدا فيك
زوبا : هيا جاية .. حطت ايدها ع قلبها اللهم اني سلمتك نفسي و قلبي فانزل عليه سكينتك اللهم اني اسالك السكينة و الرضا بقضائك و قدرك يااااارب يا رب قويني ع اللي جاي يارب
مسحت وجهها و طلعت من الدار و مشت جنبهم تفطر و تبتسم مجاملة فقدت سجى : وين سجى!
احلام : توا تجي خليتها في المطبخ تكلم في اهلها في ليبيا
زوبا ابتسمت : تمام
طلعت سجى مبتسمة و وجهها احمر زوبا بحركة من راسها استفهامية سالتها شني في
و سجى اشرت بعلامة الدبلة ع صبعها
و لم تتمالك نفسها زوبا و وقفت حضنتها: احلى خبر والله ربي يهنيكم بجد لايقين ع بعض
سجى تحشمت : الله يبارك فيك
فنارة : مبروك يا بنتي
ليلى : مبارك حبيبتي
سجى : الله يبارك فيكم يا رب
احلام قدمتلها و عيونها دموع : سلمت قطعتين من قلبي في يوم واحد و ان شاء الله تكونوا في ايدين امينة انت و خوك
زوبا : ان شاء الله
سجى قدمت و باستها ع راسها : ربي يقدرني و نكون ليكم بنت زي زوبا
سهام و علياء باركولها والاجواء استمرت حميمية
زوبا خذت امها ع جنب : امتى صار هذا
احلام ضحكت: ههههه هذا مصعب عقل عقل و البارح جد عليه هباله قريب هبل بوه ما خلاه يرقد لين كلم وسيم و بوه مرة ثانية و وقت اتصلوا بسجى ع شان يتاكدوا من قرارها و الحمدلله وافقت
زوبا : الحمدلله اللي تطمنت عليه كنت نخمم كيف بيسافر بروحه لفرنسا
احلام : هو لفرنسا و انت لبنغازي قداش استاحشت لمتنا مع بعض الله غالب من يوم سيبنا حوشنا خلاص
زوبا : من يوم تزوج مصعب المرة الاولى قولي الحمدلله ع كل حال يا ماما
احلام بدت تمروح ع وجهها : قالولي جدك ما باش يجي لبنغازي و يحضر عرسك
زوبا ارتبكت لانها عارفة سبب عدم جية جدها : اكيد مشوب من الطريق و التعب و ممكن ما يبي يسيب الحوش بروحه
احلام لاحظت توتر بنتها بس فسرتها بشيء ثاني توقعت في مشاكل بينها و بين جدها : ممكن
زوبا مسحت فمها : هيا انا هذاكا هو منوض
احلام : بري
وقفت زوبا و مشت للحمام اكرمكم الله دارت سنونها و رجعت للدار القت المزينة تستنى فيها و سلمتها وجهها و شعرها و غمضت عيونها في محاولة لايجاد السلام الداخلي
في وحدة من الديار كانت علياء تشبح لتيليفونها لان الفايبر يرن و مش عارفة ترد او لا و قررت تفوت الموضوع خافت يقوللها شي ينكد عليها بيه
بس للاسف قدر ينكد عليها بمسج وصلها
"عليك جو رايق بلاكي بعدك الحوش مليان صبايا اشكال و الوان "
هو كان يبي يستفزها و يضايقها باي طريقة ع شان ترد و تكلمه بس للاسف هي انحرقت من كلامه اكثر و قررت تعفس ع قلبها و تكمل العرس و مش ح ترد عليه
اما سهام فكانت واقفة في باب الشقة مقابلة مصطفى: نعم
مصطفى واضح متلخبط مازال داير روحه حامق بس مش قادر يصير عليها : رنيتي عليهم في بنغازي تطمني ع العيال؟!
سهام بدون ما تشبحله منزلة راسها تحت: اي كلمتهم الاثنين الحمدلله بخير ما فيهم شي
مصطفى : اها تمام بكل احنى رحلتنا بكرا العشية ان شاء الله يعني ع المغرب نكونوا غادي
سهام : ان شاء الله
مصطفى معش عرف شنو يقول : انت ما تعبتي بعد الرحلة
سهام : لا
مصطفى عرف طريقك مسدود مسدود : ماشي عن اذنك
هي قامت عيونها و شبحتله بلوم : ماشي و خشت
مصطفى : اوووف حتى نا كان كلمتها عادي و نهيتها معاها اوف
و مشي
ونيس قبل ما يمشي للحلاق
كان فطوره هو و موسى في كافي قريبة ع العمارة حب يهدرز معاه ع انفراد
القهوة و البريوش قدامهم
موسى : عارف اني من يومي حريص ع الاعتناء بالاشياء اللي نحبها و صغاري احب شيء ع قلبي و هي اقربهم ليا و من كثر ما حبيتها شوفتها حاجة كبيرة و كبرتها في راسها لعند انغرت بروحها و طول عمرها تقول انا مندير و ندير لما نكبر كل بطولة تفوز بيها كل امتحان تسكر فيه الدرجة كانت تزيد ثقتها بنفسها كانت عندها اسئلة جدلية تخوف و انا بصراحة كنت ع يقين انها ح توصل لمكانة ما في حد غيرها من خوتها يقدر يوصلها ع شان هكي ما كنت نحب نجاوبها ع شي نعطيها اسماء كتب و نبيها تبحث. عليهم بروحها ... ابتسم بحزن... قريب ضيعتها تعرف
ونيس منتبه لكلامه و انفعالاته لكل تفصيل و اكثر شيء الدموع المحبوسة في عيونه
موسى ابتسم و رشف انفه : الحمدلله ع كل حال المهم اللي تعرضتله بنتي من بعد سيبتها انا و امها عند عمها في الاخير زي ما تشوف كله لمصلحتها صارت انسانة ثانية عاجبني التغيير من ناحية التزامها الديني بس باقي الحاجات اللي تغيرت فيها مش عاجبتني هلبة بس ما نقدر حتى نعترض لاني فقدت كل حقوقي عليها يوم رضيت نسيبها .. مش حاب نطول عليك بس بصراحة و نقولهالك انا كنت ضد زواجها منك لاني خايف عليها
هو حزت في نفسه كلمة موسى
موسى : ما تفهمني غلط يا ولدي خوفي عليها من فرق العمر و من انها مازال صغيرة و خوفي من البلاد نفسها كونها ح تعيش في ليبيا و في مدينة بعيدة ع حوش جدها و هلبة امور ثانية بس من اول ما تلاقيت معاك ارتحتلك و بعد عرفت باللي درته معاها يوم ولد عمها حاول يخطفها واللي درته في المنجي و اخر شي ال### متاع قناة ال#### كبرك في عيني و خلاني مطمن عليها عندك نتمنى منك تساندها و تحميها و ما تقسى عليها ولو في يوم حسيت انها مش مناسبة ليك و تبي تسيبها سيبها بدون ما تجرحها ...
ونيس حط ايديه الاثنين تحت دقنه: مقدر خوفك و كلامك عنها و كل شي حكيت عليه و نعاهدك اني نحطها في عيوني بس بنتك عمرك ما تخاف عليها و هي معايا يعني نا مستعد للموت ع شانها اكثر من هكي مش حاب نحكي و نزايد قدامك
موسى مد ايده و صافحه و ونيس مد ايده : معناها سلمتك الامانة و يا ريت تصونها
ونيس ابتسم : و نا سبق و قلتلك في عيوني و باذن الله ما يوم نزعلها
وقفوا مع بعض و طلعوا : تعرف انها تحب الرماية و
ونيس كمل : الشطرنج و تحب قراءة الشعر و الروايات اكثر لغة تحب تقرا بيها الانجليزية و تحب واجد كتاب منهم زي تشارليز ديكينز و جين اوستن و في حاجة اخرى تحبها واجد كورة الطائرة صح؟
موسى ابتسم ولف ايده عليه : حافظ درسك مزبوط
ونيس انحرج لان استرسل في الكلام ونسي روحه: احم انا يعني مش واجد بس سالت عليها و عرفت
موسى : عارف انك سالت بس مش اي حد يسال ع تفاصيل زي هادي الا وقت يكون مهتم لابعد حد ربي يهنيكم
ونيس : ان شاء الله و نا نوعدك اني نجيبها لكم كل ما تصيرلي فرصة
وصلوا برا يوقفوا في تاكسي
موسى : ما تضغط عليها في الموضوع هذا هي كارهه دبي و انا عارف السبب لان وقت كانت محتاجتنا و تستنى فينا ناخذوها عندنا صدمناها بخبر انتقالنا غادي
وقفت التاكسي و ركبوا و دلوه ع العنوان
ونيس : اها بس طالما كيف ما حكيت ان المرة هضي تعاملت معاكم عادي معناها مرات خلاص تقبلت الوضع و نست الموضوع
موسى تنهد : ان شاء الله
ونيس : قتلك يا عمي في شخص موصيني اذا تلاقيت معاك نوصلك سلامه
موسى : مني ؟!
ونيس : فوزي ال###
موسى بتفكير : اووووو عرفته شني اخباره بالله
ونيس : لا الحمدلله اموره قاعدة تمام يشتغل في كذا مكان و من ضمنهن معايا و ع فكرة ساعدني واجد في موضوع المنجي و رفض ياخذ قرش قالي دين و نوفي فيه
موسى اثلج صدره الكلام هذا يعني تكون ماثر في ناس و تذكرك بالخير تحس ان اللي درته من انجازات في حياتك ما مشي هباء منثورا : بارك الله فيه ووبعدين جميل شني بالله تي انا بفضل الله و من ثم بمساعدته هو و اهله انكتبلي عمر جديد تي عرضوا حياتهم للخطر ع شان نوصل سالم لحوشي في وقت لو انشدوا في وحدة من البوابات راهو مشو فيها .. بلغه سلامي و قوله اني مش نادم ع مشية بنغازي يومها لان لو ما مشيت ما كنت تعرفت عليه و ع اهله فعلا من نعم الناس و طمنه ان الاشخاص اللي حاولوا يغتالوني يومها باعثينهم خوي و راجل اختي مش حد ثاني لان يومها كانوا متحشمين مني كيف جيت للمناقشة ع. خاطره و قريب اغتالوني يعني حملوا روحهم المسؤولية و اعتبروها عيبة في حق اهل بنغازي قوله طلعوا من اهلي انا.
ونيس : حاضر ح نوصله له الكلام
موسى حط ايده ع ركبة ونيس : بوركت يا ولدي
ونيس ابتسم حب شخصية موسى هلبة و الاهم حس ان تقبله..
نردوا لبنغازي
كان حوش العيلة مليان ناس اشكال و الوان من العيلة و الاصحاب و الجيران
سليمة حاسة بالغربة وسطهم طول الوقت شادة تيليفونها و تتفرج ع صور و فيديوهات فرج
جهاد بيهبل عليها يخمم كيف دايرة داخل و هي ما تعرف حد و زيادة امه و اخته و فنارة كلهم مشو لمصر
نادي ع جسور: جسور
جاه يجري : نعم
جهاد: تعرف وحدة اسمها سليمة
جسور قلب فمه: ما نعرفهش كيف شكلها هضي ولية كبيرة
جهاد: تي اي ولية كبيرة لا هذه مرتي و شكلها هكي كيف منقولك حلوة يعني انتو تقولوا سمحة واااجد وهي ساكتة لكن لو تكلمت حي عليك و حي
جسور مش فاهم : تي ما فهمت حاجة منك !! خليني نعدي نسال جدتي عليها و خلاص
جهاد ضربه بخفة ع راسه : يالله تحرك بسرعة
مشي جسور يجري ...
و جهاد حط ايديه في جيوبه يستنى فيه
جسور خش للحوش يجري : جديدة جديدة
لاقاته جمعية : كنك تعيط يا ليد
جسور : اممم في وحدة سمحة واجد اسمها سليمة يبيها عمو جهاد
هي كانت طالعة للحمام (اكرمكم الله سمعاته)
جمعية : هابا عليك حتى انت عرفت السمحة من الشينة
جسور : لا هو حكالي انها سمحة واااااجد و حيه عليا و حيه ان كان حكت
سلمية : 😳😳
جمعية لفت بتنادي عليها القتها في وجهها: انت هنا يا بنتي صبي لراجلك ينادي عليك
سليمة انحرجت : هيا
جمعية مشت للمطبخ لمعتز بتعطيه قائمة طلبات زي امهاتنا في المناسبات ضروري يتفكروا هلبة حاجات في الوقت بدل الضائع و سليمة خذت وشاحها وطلعت وراء جسور
جسور: هوووي تعالى يا عمو
جهاد ع طول مشي جهة الباب و هي واقفة طلعت راسها بتشوف بس سبقها و دفها داخل : وين وين مادة راسك برا
سليمة : تي منشوفك جيت والا ؟! خيرك شنو تبي ؟
جهاد ارتبك و هو يتامل فيها : احم لا شي غير هكي قلت لانك ما تعرفي حد مراتٍ محتاجة حاجة و الا شي ضروري نسال و نطمن حسيت
هي باستغراب : كنت اتصلت بيا
جهاد توتر: تيليفوني مسكر
و زي اي موقف مشابه كل اصحابك يتفكروا يكلموك في اللحظة اللي تكذب فيها و تقول ان مقفل
هي قامت حاجبها و ابتسمت
جهاد : شكله مازال فيه شحن شويا
هي تلون وجهها بالاحمر و نزلت راسها محرجة من الموقف : امم المهم انا اموري كويسة واجد و ما عندي اي مشكلة
جهاد: باهي طمنتيني مش ناقصك شي لحفلة غدوا
سليمة : ما تدورش اصلا ما عندي اي خلوق لا نلبس و لا ندير اي حاجة
جهاد بتوسل : ع شان العيلة شنو تبيهم يقولوا مسايرة بس و الحزن في القلب يا اخت الصقر
هي كل ما يذكر اللقب هذا تحس ان فرج قدامها ابتسمت : يصير خير هيا انا منخش داخل
جهاد: ماشي تبي اي شي كلميني
سليمة: غير خلي تيليفونك في الشحن
هو فهم انها تلقح تجاهل الموضوع و ضرب الحولة : تمام
خشت تضحك و هو حس روحه خذي طاقة ايجابية و مشي ع حاله ما شاغل باله شي غير الهاشمي بس مش حاب يتصل بيه حاليا و لهذا قرر يكلم بالقاسم الي قاعد مع جده يطمن علي جده و يطلب منه هو يكلم الهاشمي و يطمنه عنه
داخل و في المطبخ تحديدا
كان معتز واقف مع امه و ياخذ في القايمة واضح ان متضايق : خلاص يا امي الله و النبي ماعاد تعطيني غيرها لاني انهديت من مشوار السوق
جمعية : لا خلاص هضي بس
خذاها معتز و تحاشى الاحتكاك ببنات العيلة رغم ان قبل فاتح مجال للهدرزة معاهم
طلع و لحقاته جمعية : قتلك
معتز : لا اله الا الله شنو اللي تذكرتيها توا؟!
جمعية بتردد : منحكيلك حاجة ع العشبة اللي كلتها مراتك و قريب ودرتها
معتز انقلب وجهه : تي عليش السيرة هضي يا امي خلاص موضوع و فضيناه
جمعية في مرة وحدة : لان مراتك كذبت عليك نا اللي عطيتها الها و نا اللي جبتها من وحدة نعرفها و حكيتلها تاخذها (و بدت تبكي ) و بعد اللي صار كنت نبي نحكيلك انت وعمك لكن هي طلبت مني نسكت لعند يتم الفرح و نا ما هان عليا نحقك زعلان وًمتضايق ننقاني ما عاد تحملت و حكيتلك سامحني يا يما و الله نيتي كانت خير
معتز تفكر كل مرة لامها و طنش عليها تفكر الرسالة اللي بعثهالها لمًا ما ردتش عليه و كيف ح تكون انجرحت منها كره روحه هي كيف خافت من المشاكل و تحملتها في روحها ع شان ما تصير مشكلة بينه و بين امه و هو بشني قابلها و زيادة كلامه لسهام و المشكلة اللي صارت بينها وبين عمه من وراه
ما قدر يطمن امه بكلمة لم روحه وطلع
جمعية بحزن: ربي يهدي بالك
و خشت للحوش
نرجعوا لمصر
كان مقعمز ع الكرسي و الحلاق يدير في شغله صوت دقات قلبه ممكن اقوى من صوت ماكينة الحلاقة متوتر متشنج لابعد حد كان متمني يشوفها في الليل بس تحشم يطلب الشيء هذا رغم ان من حقه لذلك مجبور ع الانتظار لساعات ثانية
مصعب و وسيم و مصطفى كانوا معاه و داروله اجواء حلوة و طول الوقت و مصعب يعطي فيه في توصيات ع اخته و
يا ونيس راك تزعلها 😅
و هي نفس الشي مع كل لون ينحط ع وجهها و مع كل نفس يطلع منها و مع كل دقة قلب كانت تناجي ربها يوفقها في حياتها القادمة و التحدي الاكبر اللي انفرض عليها فرض لكن اعتبراته نصيب و قضاء وجب الرضا بيه و كلها امل انها تقدر تخلي القضاء هذا حلم وردي مليان سعادة و فرح و خاصة وقت يكون شريكها فيه انسان بموصفات ونيس حنون و طيب و رومانسي و الاهم من هذا كله رجل عاشق للنخاع
سجى : كل شي واتي حتى برنامج الاغاني اللي بتخشي عليهم واتيات
زوبا : تمام صحيتي يا سجى ان شاء الله في فرحك نديره كله
سجى : ان شاء الله يارب
علياء طلعت من الحمام و جتهم واضح تعبانة: اااااه نحس في روحي بنطيح
زوبا خافت عليها : شوفيها سجى بالله عليك واضح تعبانة
سجى : ماشي خلي انادي خويلة احلام
زوبا : خلاص قولي للاي توا
سجى فنصت فيها: استانستي عاد
زوبا ضحكت: هههههه
المزينة : ماهو كده ما ينفعش حضرتك اثبتي لو سمحتي
زوبا : اسفة كملي هيا
و علياء امتدت ع السرير
خشت احلام تشوف فيها : لالا واضح هبوط ضغط خذت جهاز الضغط و بدت تقيسلها... ضغطك هابط يا بنتي
ليلى جت تطمن عليها : كنك يا علياء
احلام بتطمين : ما تخافي عليها ضغطها هابط تو تاخذ حاجة مالحة و تولي كويسة كان وصل العشاء جيبلها اي نوع من الموالح فيه جبنة
سجى : شويا بس
و اهتموا بعلياء لعند رجعت توازنت و مشت تكمل في تحضير نفسها لحفلة الزفة بعد ساعات
و مروا الساعات تباعا
في احد غرف الشقة
احلام كملت لبسها و كانت علياء تلبس جنبها
احلام : بالله علياء منسالك ع صغار خوي خليفة شني مدايرين مع الهاشمي
علياء : ماشاء الله عليهم مستمرين في قرايتهم و الجامع
احلام تنهدت : عندك ليهم صور
علياء فتحت تيليفونها و بدت توري فيها في الصور و في اغلبهم كان الهاشمي موجود : حبايب قلبي ماشاء الله بس حتى خوك الله واحدُ عليه كل ماله جاذبيته تزيد
علياء : تسلمي يارب
احلام بعفوية : ابعثيهولي الصور بالله عليك
علياء : انا ما عنديش رقمك ع الفايبر
احلام : شويا بس نعطيهولك لاني مش حافظاته مازال ... يوووه قصة انا تيليفوني تسكر يبي شحن استني شويا
مشت لزوبا : اعطيني تيليفونك
زوبا خذاته و مدتهولها : اهوا
خذاته و بعدين رجعت : افتحيه
فتحاته و اعطاته لامها
مشت لعلياء : ابعثيهم ع رقم زوبا توا
علياء اختارت صور ما فيهم الهاشمي و بعثتهم
احلام تشوف في الصور: تي وين اللي فيهم الهاشمي
اهني هي انحرجت لا عرفت تسكت و لا تتكلم : ماهو ما نحسابك تبيهم
احلام : لالا ابعثيهم نبيهم خليهم في تيليفون زوبا اصلا منخليه عندي لعند يشحن تيليفوني ننقل منه الصور
علياء: اماله احذفيهم عمتي
احلام : و علاش يعني ؟
علياء : يعني مرات راجلها ما يحبش
احلام : اي باهي اللي فكرتيني تو نحذفهم بعد نبعثهم لجهازي
و بعثت علياء الصور و هي مش راضية لكن ما عرفت تتهرب من عمتها اللي مش عارفة شي ع الموضوع
و مرت الساعات تباعا لعند دقت ساعة الحسم و اقترب الموعد و مع اقترابه ازدادت قوة نبضات القلوب و تسارعت الانفاس و تشنجت الابدان
و بدو المعازيم يجو كل وحدة اجمل من الثانية واكثر اناقة ...بس هبة رفضت تجي اليوم مش متحملة تتلاقى مع سجى و مصعب اقتنعت صح ان مش نصيبها لكن المواجهة صعبة مهما كان
علياء كعادتها سر جمالها في بساطتها و براءتها و ضحكتها الطفولية لبست قفطان لونه سمائي هادي تخصيرته فوق تحت الصدر و من تحت ناعم و واسع لان قماشته زي الحرير و شعرها مفتوح و ميك اب بسيط و هادي و طلعت ناعمة هلبة
بينما سهام لبست قفطان لونه اسود مزين باحجار ياقوت احمر ستيرت و ثلاث ارباع الكم شعرها قاماته فوق بطريقة حلوة مع وضع بروش ع جنب و ميك اب ثقيل شويا
ليلى و احلام الاثنين لابسات بدالي رسمية احلام بدلتها لونها كريمي و ليلى بدلتها لونها اخضر داكن
و عمتكم فنارة اكيد لابسة حريرها اللي لا يعلى عليه شي في الاناقةً في اي عرس ليبي
و بالنسبة لسجى فلبست جمبسوت تايقر وشعرها مفتوح فلو و طالعة ماشاء الله
نظموا الكل في الطاولات
و كانت سجى جايبة مسؤولة ع الدي جي و عاطيتها قائمة الاغاني اللي ح يشغلوها و اهمها اكيد وقت دخول العروس
هي كانت متوترة ع الاخر كملت لبس و ميك اب تشوف لروحها في المرايا
الفيلو متاعها كان باختيار دقيق منها جميل للغاية و مكياجها بسيط لكن ابرز كل ملامحها و بالذات عيونها
انفتح الباب و ....
يتبع
مع تحياتي مارية علي الخمسي ❤️❤️❤️❤️❤️