احلام زي اي ام حرصت كل الحرص ان كل شيء في عرس بنتها يكون من احسن ما يكون و باعتبارها مش ح تقدر تديره في ارض الوطن ساعدتها زوجة سعد في انها تعزم عائلات ليبية ليوم الحنة و ممكن ما تقدر تجيبلها زمزامات
لكن
ليبيات يقولوا بينا ... نقيموا فرح غوالينا
و التمولها الليبيات من مختلف بقاعها الحبيبة و بمختلف انتماءاتهم بلون واحد او بثلاث الوان الا ان الفرح جمعهم و الفزعة لبنت بلادهم لمتهم و كل وحدة جابت حاجة معاها اللي جابت مفروض و اللي جابت غريبة و اللي دارت الكعك و اللي ما دارت في الحوش و حالها من حال زوبا فاشلة في المطبخ شرت جاهز و جاباته و لو غمضنا عيونا و شمينا الريحة ... شاهي .. بخور وشق و عرضاوي ... ريحة رداوات الحرير و الحنة تي ريحة السشوار ع الشعر و ريحة البصلة المفحفحة ريحة الزهر في حلاوتنا الليبية الزمنية تحلف تقول انك في ارضها مهما كانت تكون عاصمتها القنينة الحبيبة والا باقي مدنها من مشرقها الاخضر بجبله الشامخ لمغربها المتزين بصخوره و مناظره الخلابة لجنوبه الاصيل و اصالته تلقاها في ناسه بكرمهم و جودهم مهما كانوا في حاجة ضيفهم اولى يكرموه و لو باتوا جاعانين ما يهم لوسطها المعتدل في كل شي و خير الامور اوسطها و نلقو فيهم خيرة ناسنا و يا ما احلاك يا ارض الزهر و الحنة ياللي كلك حب و محنة تمرضي صحيح تجوعي ممكن تبكي اكيد لكن تبقي دوم الدوم حية و نابضة بالحب لكل اولادك و بناتك و تتمنيلهم الخير حتى اللي اذوك منهم حتى اللي يلوموا فيك ع سوء حالهم مع ان ما ليك اي ذنب لان حالك من حالهم او هما السبب في حالك وربي يحفظك يا غالية يا حنينة يا امنا في هلبة كيفك و مراتٍ خير منك و اجمل لكن في عيونا تقعدي الام اللي ما تتبدل بكنوز الارض
و ان شاء الله ما تغيبي يالام ... و علينا العالم ما يظلم
نحبك يا بلادي و اولادك و بناتك يحبوك لان بلاك نضيعوا و ما نلقى ليك مثايل يا ام الاصايل ❤️❤️❤️
نرجعوا لاحداث الرواية و سامحوني طولت عليكم بكلمات حبيت نشاركها معاكم 😘
دقة البندير دقت معلنة ع اقامة الافراح و الليالي الملاح و دق معاها قلبها
خوف .. ممكن
توتر... ممكن
تشوف لروحها في البدلة البودرية تشوف لايديها اللي يرعشوا و زايدها ان كانت متمنية باقي عيلتها معاها خذت نفس عميق اكثر من مرة.. خواتها التوامة في جنبها لابسات بودري زيها و طالعات يهبلوا
سجى واقفة جنبها لابسة قفطان وردي قصير للركبة و فاتحة شعرها : روروريييي خيرك ترعشي يا بنتي
زوبا : مش عارفة اشبح كيف فجاة كل الانفعالات هجمت عليا في مرة
سجى : استهدي بالله يا بنت
زوبا : لا اله الا الله
خشت احلام و عيونها دموع : ماشاء الله عليها بنيتي
زوبا ابتسمت لامها و حضنتها : تسلمي ماما منموت من التوتر
احلام : ما عندك علاش بتتوتري يالله ع شان تطلعي برا زحمة درتلك ليلة تتفكريها عمرك كله
زوبا : مش عارفة شني نقول
احلام بعثتلها بوسة : ما تقولي شي واجبي هذا و مازال مقصرة في حقك
ملاحظة : طبعا الحفلة كانت في صالة ياجروا فيها تبع العمارة
و طلعوها بزفة اغاني ع لبس البودري
و ياسعدك يا زوبا بدال ما تجيبي زمزامات من الغرب او الشرق حصلتي عرس كوكتيل فيه اغاني بالحان موروث ليبيا كله من مختلف المناطق كل مرة مجموعة تبدا تغني ع شان توري ما عندهم من جمال و اكيد لكل زهرة جمالها المختلف و عبق مميز ع غيرها ...
عروسة لبست بودريها .. ان شاء الله بطول العمر عليها
عروسة طلعت من الحمام .. ان شاء الله يواتوها الايام
روروروي
مشو معاها و قعمزوها ع الصالون و هي تتامل في الحضور و في لبسهم و فعلا حست روحها في قلب ليبيا
وقفوا خواتها الاثنين يرقصوا جي بين عيونها مشهد رقيصها معاهم في عرس مصعب و اللي تسرب بعدين و سبحان مغير الاحوال لو جي حد وقتها و حكالها تفاصيل اللي صاير معاها توا كخط سير لحياتها لاتهمته بالجنون.
بس لحظة مني. هادي اللي ترقص حاولت تركز و مش مصدقة و مفاجات ونيس و احلام لا تقف عند حد
وقفت : هي وحق ربي هي
جرت وضمتها بكل قوة : حنينة جيتي من بكري نحس في حاجة ناقصتني و اقسم بالله تقول روحي كانت غايبة و ردتلي
فنارة ترقص فيها معاها : اماله نسيبك زنوبيا في يوم زي هذا و الله ما نقدر و لا طاقني صبر تعب تعب اجعني ما وليت بكل المهم نكون معاك و انا اللي نشبرك و نحنيك
زوبا بدت تضحك و تبكي : و اقسم بالله ماني مصدقة حنينة و رجعت حضنتها
و الكل تأثروا باللقاء هذا بس مش هذا حدهم المفاجات ممكن فنارة اللي جابوها موسى و احلام بس ونيس مفاجاته غير كانت
لان حجزلهم ع الطيارة ع شان يكونوا معاها علياء و سهام و ليلى و يجو معاها يوم الزفة
تلفتت بترجع لمكانها القتهم الثلاثة واقفلت برداوات الحرير جمدت في مكانها
سهام : شنو مش حً تسلمي
علياء : حسيتها حتى انا
ليلى : تعالي يا بنيتي تعالي
و هوب جري لحضن الام المتفانية اللي حضنتها اللي تمنتلها الخير حتى وهي متاكدة حاليا ان قلب جنينها مفطور بسببها بس لانها حتى هي بنتها مستحيل تتواني ع مشاركتها فرحها و سعادتها : نجك ليا يا بنتي متسمحة واجد و متغيرة ربي يحفظك
زوبا باست ع راسها : انت اللي نجك ليا و الله توا بس حسيت روحي عروس وقت اللي شفتكم
و مشت حضنت سهام و علياء في مرة وحدة: نحبكم و استاحشتكم يا شينات
وهما يقرصوا فيها و يضحكوا: ههههههه انت ليك وحشة
مشت بيهم و قعمزوا و تفاجئت ان الكل مسلمين عليهم وقت هي كانت في المزين و دسوا عليها الخبر ع شان يفاجؤوها
وهي وسطهم تهدرز و تضحك
علياء اول شيء ركزت فيها شافت السلسة اللي باعثهالها الهاشمي ابتسمت بالم و وجع
احلام تشبحلها كيف منسجمة و خطر في بالها موقف من الماضي
Flashback
زوبا قدمت و قعمزت ع الكرسي : باهي قولي بتعزمي اماليك !
احلام وجهها تغير : مش عارفة علاش ما تحبيهم بس مع ان زي خوي جمعة و زي مرته ليلى يموتوا فيك
زوبا بغرور : و انا مني ما يحبني بس بجد ماما ناس بيئة هلبة و يحشموا اقل شي فهميهم ع اللبس في الصالة ردي بالك يديرولنا العار قدام الناس
احلام بأسف : تعرفي يا ماما اني خايفة عليك هلبة من تفكيرك هذا انت تركزي هلبة ع المظاهر و هادي حاجة مش دائمة اللي يدوم الانسان شني من داخل تربيته بيتيته اخلاقه و الأهم دينه و التزامه
زوبا وقفت : لالا وصلت الامور في الدين شوي ثاني بتوصل في لبسي و الحجاب و بتبدي في وصلة السيد مصعب و انا من الاخير اليوم رايقة و نبي نهيج و نشري اللي خاطري فيه و الأهم منلبس اللي عاجبني بدون اي تدخلات خارجية لهذا يا ست الكل (خذت طرف خيارة و كلت منه) احسن حاجة نرجع لداري ربي يعاونك
و ركبت بسرعة لدارها
احلام تشوفلها بحسرة : و الله خايفة عليك يا ماما تحساب الحياة هكي كلها
الوقت الحاضر
احلام مسحت دمعتها و تتكلم بينها و بين نفسها كله كان فيه خير ليك لولا اللي صار ممكن تزوجتي اوس و كنتي عشتي بطبعك الاول و اكيد كان تسلط عليك و ما ارتحتي معاه الحمدلله .. صح واجعني قلبي كيف باعدتي عني و صاروا كلهم اقربلك مني بس طالما انت احسن كله عادي ربي يهنيك بنيتي
سجى جتها: خويلة شني مش نبدوا انحنوها توا ع شان نديرولها جو
احلام تفكرت الحنة: يا عليك نسوة تعرفي قاعدة فوق في الشقة خلي نلبس و نجيبها
سجى : وين حاطتها انت؟
احلام : في المطبخ ع الطاولة
سجى : معناها انا نلبس بسرعة و نمشي نجيبها اعطيني المفتاح بس
احلام : عليك حشمة توا بتلبسي و تركبي
سجى : شني اماله خايفتني نخنب حاجة
احلام ضحكت: هههههه حاشاك يا ودي تلقيها ع الطاولة في المطبخ و هذا المفتاح
سجى ضحكت: نبصر راك تحرجي
احلام : الفال ليك بنتي
سجى وجهها تغير و تفكرت موضوع مصعب : ان شاء الله
لبست عبايتها و وشاحها و طلعت من الصالة و ركبت في الاصانصير فتحت الشقة و خشت طول المطبخ خذت الحافظة و بتطلع
كان هو قدامها شافلها بنظرة قسمت قلبها و قدم
هي خافت و بتهرب
مصعب : انا ما ناكل في الناس نبي نسالك بس علاش رفضتيني
الكلمة صعبة : مش هكي اسمها انا ما اقتنعت بس علاش تسمي فيها رفضتك
هو بتهكم : نفس الشي المهم النتيجة
سجى بشجاعة : لاني وقت منتزوج الشخص اللي منكمل معاه لازم يكون يبيني انا لشخصي مش لان اخته صاحبتي مش هكي قلت لوسيم
هو ضحك بهزوة: و هذا علاش رفضتي ؟! شني تبيني تقول لخوك ؟! نقوله اني نحبك ونبيك وانك اعجبتيني من اول ما شفتك و عجبتني خفة دمك اي صح ما ننكر ان واحد من الاسباب اللي شجعتني هي علاقتك بزوبا لانها شيء اساسي في حياتي لكن مش معنى هكي اني ما حبيتك
سجى تفاجئت و عيونها دموع مش مصدقة و ندمت اللي استعجلت في الرفض لان مواصفات مصعب نادرة الوجود
مصعب تنهد : ع كل الدنيا نصيبات ربي يعطيك نصيب ع قيس نيتك
سجى معش تحركت من مكانها لعند رن تليفونها استاقضت و طلعت بسرعة
اما هو ابتسم بنصر و عرف ان اثر فيها
نزلت ترعش و مدت الحنة لاحلام حولت العباية و مشت جنب صاحبتها
زوبا تفاجئت بجية هبة : السلام عليكم
زوبا : و عليكم السلام
هبة: اكيد مستغربة جيتي بس صدقيني ندمت و اعتذرت حتى من عميمة احلام و توا حبيت نعتذر منك يا ريت تسامحيني
زوبا تفكرت اخطاءها السابقة و كيف من قلبها تمنت الكل يعطيها فرصة ثانية ابتسمت : حاشاك تفضلي
هي حضنتها فرحانة و قعمزت جنبهم
و اهني سجى خافت جديات من خسارتها لمصعب طالما صلحت علاقتها بزوبا
و بدت مراسم الحنة
ايد عند فنارة تحني فيها و الايد الثانية عند ليلى
و زوبا حاسة روحها مش عارف كيف بس اللي متاكدة منه سعادتها بوجود الكل حواليها
و مدي ايدك انحنيها .. نواسيها صغيرة و تفرح بيها ...
و اختلطت اغاني الغرب بالشرق كما اختلطت الانساب و يا ويلك يا زارع الفتنة لان هالشعب يجمعه تاريخ طوييييل صعب تنهيه سياسة و خلافات او اختلافات ...
و بدي جو الشتاوات و الكشك من اهل المشرق و اللي تمثل اللحمة الوطنية و بتميز هي فنارة ع كل نغم كانت ترقص و تجل كيف ما يقولوا عزيزاتنا
و للجنوب اكيد حصة و اعتلن المنصة باغانيهم البسيطة و العميقة المعنى و طقة دربوكتهم او طبلتهم باعلى صوت تحكي اصالة و تراث تحكي انا ليبية الهوية مهما قالو عني لن تجذ اصالة في اي مكان مثلما تجدها عندي
و هادي هي ليبيا الله يبارك و يزيدها
يوم كان مميز يخلد في الذاكرة قدرت فيه احلام مش بس تفرح بنتها لا فرحت اغلب الحضور بالاجواء المتنوعة و اكيد كلو ما لذ و طاب من عشاء و حلاوات مع الشاهي
و بعثوا حصة الرجالة مع مصعب كانوا ماجرين شقة في نفس العمارة و هما ونيس العريس و موسى و مصعب و وسيم و مهيب و مصطفى لكن معتز قعد في بنغازي هو وجهاد لان سليمة رفضت السفر ما تبي تتلاقى مع وسيم و سجى و عارفين انها محملة وسيم سبب موت فرج
جت معاه لبنغازي مجبرة لان ما عندها وين تمشي
ونيس كان كله حماس مش طايقه صبر كل شوي يشوف في الساعة و يستنى ع احر من الجمر في لقاءه بمحبوبته
زوبا تشوف للحنة و تسمع في الدربوكة و تخمم هل ح تنجح في حياتها القادمة او لا و تفكر في يوم زفتها غدوا كيف ح يفوت ..
سجى جنبها
هبة كانت خلاص بتروح مع امها : زوبا يا ريت ترنيلي ع بمصعب نبيه في كلمتين قبل نروح
سجى : 😳😳
زوبا اشرت لسجى : اتصلي بيه سجى افتحي التيليفون و حطي ع رقمه
سجى من غيضها و غيرتها : احم فكيني من رمزك السري وًتيليفونك ملي عليا الرقم و اتصلي من عندي
هبة شافتها من فوق لتحت و هي تجاهلت
زوبا حست بالشرارة اللي صايرة : خلاص سجلي و ملت الرقم
اتصلت سجى و حطت التيليفون ع وذن زوبا : ايوا
مصعب استغرب الرقم : مني زوبا رقم مني هذا
زوبا ابتسمت : هذا رقم سجى انا متصلة بيك نبيك تنزل قدام الصالة في شخص يبي يشوفك
هو استغرب و توقعها سجىً: مني ؟
زوبا : ع شاني انزل
مصعب تنهد : ماشي
طوط
طوط
زوبا : خلاص اهو نازل
هبة ابتسمت : ماشي
طلعت هبة
سجى معصبة : يعني لو اعتذرت منك خلاص تسلمي فيه خوك لا و ترتبيلهم موعد
زوبا ضحكت: هههه خيرك انت؟ و الله لو ما كنتي رفضتيه راهو شكيت فيك تبيه
سجى وجهها احمر: نبي عينك بس عيب
و مشت من جنبها زي المجنونة لبست عبايتها و وشاحها: خيرني اللطف شني جاني انا
جو علياء و سهام من جنب الدربوكة و الهياجة و قعمزوا جنب زوبا يهدرزوا
برا
هبة واقفة قدامه: نبيك تسامحني و الله ماني عارفة شنو اللي صار معايا تصرفت بطيش لاني كنت غايرة منها
مصعب : حصل خير و طالما هي سامحت حتى انا سامحت
هي اهني مدت ايدها بتصافحه
تردد و في الاخير مد ايده
ضغطت عليه : صافي يا لبن
هو ابتسم : حليب خلاص
سجى كانت بتموت و هي تراقب فيهم تصرفت بجنون مشت بسرعة في اتجاههم لعند هبة انصدمت منها و مصعب مش مستوعب شنو اللي ح تديره
و عطاته كف ✋ : خزييييه
و رجعت بسرعة داخل
هو حط ايده ع وجهه و مصدوم و يضحك
و هبة قلبها انحرق من تصرف سجى و فهمت اللي فيها : الباين عليها تحبك واجد
مصعب استاقض و نزل ايده: مستحيل
هبة عيونها دموع و فمها يرجف : لا قاعدة واضحة و الا ما غارت عليك للدرجة هضي
هو متفاجا: غارت!!
هبة : اها ... ع العموم ربي يهنيكم و طلعت بسرعة قلبها موجوع حطت ايدها ع فمها و تبكي في صمت القت امها تستنى فيها و حست اكيد بالمها حضنتها و مشوا ركبوا سيارتهم
و مصعب اللي يشوفه يجزم ان انجن رسمي .....
كان مرة يضحك و مرة يسال روحه هل هذا حلم او لا !!
داخل سجى كانت مصموتة من العملة اللي دارتها مقعمزة و لا كلمة
و فات يوم حنة زوبا من اجمل ما يكون في انتظار اليوم الموعود
في الليل و بعد وداع كل الضيوف اللي شاركوا و هنوا في اتمام الليلة هادي بكامل تفاصيلها في انتظار موعد يتجدد الليلة القادمة و هي ليلة زقة العروس
فضوا المكان لمصعب ع شان يقيمها و يوصلها لشقتها
و ما كان حد معاها غير امها و ليلى و اكيد يعني فنارة
خش مصعب و راسه تحت
قدمت منه فنارة : ارفع راسك اللي زيك ديما راسه فوق
هو مش شايفها من فترة طويلة : اوووو حنينة فنارة تي انت اللي ترفعي راسك ديما و قدم باس راسها جميلك ما ننساه انت حافظتي ع اختي وقت كانت بروحها
فنارة ابتسمت : و انت حافظت عليها وقت قعدت معاك بروحها ربي يحفظك و ان شاء الله نحضروا فرحك
هو تفكر كف سجى حط ايده ع خده وًابتسم : قريب ان شاء الله
هي كانت داخل و تسمع فيهم و بتموت من الحشمة اما تتفكر شأن دارت
احلام : اووووو تطورات جديدة هادي
مصعب ضحك : هههههه عم اذنكم خلي نمشي لاختي
قدم من زوبا باسها : حبيبتي شن الجو ؟!
زوبا شبحتله بنظرة مليانة دموع : ديما حاصل فيا
مصعب حط ايده ع راسها : و احلى حصلة ع قلبي زي العسل
زوبا : ربي يحفظك ليا و يحضرني فرحك ع فكرة طيرك طاح راهو
مصعب ضحك: هههههههه عارف حتى انا خلاص غير مازال يفرفش من حرارة الروح بحساب بيطلع من الشبكة بس تمتله
قدم و وشوشلها
زوبا انصدمت : تبصر
مصعب اشر ع روحه: هذا شكل واحد يبصر
زوبا : باهي يا سيدي ان شاء الله ربي يتمملك ع خير و من عيوني بس رد بالك
مصعب : عيب عاد
و طبس قامها و مشي بيها : ريشة ياناس
زوبا متعلقة في رقبته
طلعت سجى و صورتهم زي ما وصتها زوبا
ركبوا الاصانصير بعد طلباته احلام و ركبت معاهم تتامل فيهم بحب : ربي يحميكم
مصعب ع اساس خلاص داهش : امين
زوبا : قلتلك وزينة انا
مصعب : امري لله الله غالب نتحمل و خلاص
زوبا ضحكت: ههههه تحمل اماله حتى اللي طلبته مش حًيصير منه
مصعب : نوريك
المهم وصلوا فوق و حطها في سريرها و طلع لان الشقة بيباتوا فيها النساوين
تحت ضموا الحوسة و باعتبار الصالة ماجرينها ثاني يوم في حاجات خلوهم
ركبوا كلهم فوق
زوبا بعد شافت سجى : حي سجى تيليفوني قعد تحت
سجى : تؤ قصة الصالة مسكرة نظني
زوبا : بري اسالي ماما
سجىً : تمام
مشت
علياء : تي اهوااا تيليفونك يا بنتي
زوبا فنصت فيها : اسسسس يا دعوة مقصودة بعثتها مصعب يبي يكلمها
سهام و علياء : يبيها
زوبا ابتسمت : اي
علياء : ان شاء الله يتم نصيبه معاها طالعين ع بعض
سهام : اي واضح طيوبة
زوبا : امين باهي ممكن تقعمزوا و تحكولي اخباركم
سهام : خلي تغيروا قبل
زوبا ضحكت: ههههه حي نسيت
و مشو يغيروا
سجى خذت مفتاح الصالة من احلام و نزلت و هي بتدخل المفتاح انفتحت الصالة و طلع مصعب
انخلعت و وخرت : حييي انا اسفة و الله اسفة ما قصدي
مصعب : موافقة تكوني مرتي و رفيقة دربي والا بترديني مرة ثانية
سجى ابتسمت : موافقة لكن نلقاك جنب وحدة زي مبكري نديرك شاورما
مصعب بهيام : ديريني قديد و مفروم كان تبي عادي
سجى تحشمت : باهي حول منجيب تيليفون اختك
مصعب رقص حواجبه: تيليفونها فوق معاها هذا اتفاق بيناتنا ع شان نشوفك
سجى بغل : حيوانة تو نوريها
مصعب ضحك: عهههه باهي هيا اركبي
سجى استاقضت و ركبت جوي
و مصعب : اللهم لك الحمد ع العوض الجميل لازم انتم موضوعي فيسع ما نحب نجي من الروشن
و هي ركبت و تعاركت مع زوبا و بعدها احلى لمة و سهرية قضوها مع بعض اكل و بصارة و ضحك
و ع عكس سهام و علياء اللي فرحانات ان زوبا ح تنضملهم قريبا سجى في نص الهدرزةً سيبتهم و طلعت البلكونه تبكي اكثر العلاقات صدقا و اعمقها هي تلك التي نجدها في طريق ازماتنا و مشاكلنا زي علاقة زوبا و سجى كيف انولدت و كبرت و تربت في الغربة لتكون قوية و متماسكة
جتها احلام : هذا حال الدنيا
سجى تمسح في دموعها : اختي هادي يا خويلة القينا بعض في وقت صعب هلبة و علاقتنا زادت لان زي انا و زي هي قاعدين في غربة كانت لي عيلة زي ما حاولت انكون ليها عيلة مش قادرة نتخيل اني مش ح نشوفها و مش ح نمشي معاها للجامعة ثاني
احلام حطت ايدها ع كتفها : بس قريبا ح تولي مرة خوها و هادي حاجة دايمة للابد
هي تفاجئت كيف عرفت
احلام ضحكت : ما تتفاجئي مصعب حكالي قبل شويا اني يبيك و يبي يتم كل شي رسمي في اقرب وقت ع شان تسافروا لفرنسا
سجى تحشمت
احلام : ربي يهنيكم يا رب
و نرجعوا لزوبا
سهام : ظلمني
علياء : بسببي انا قلتلك خليني نقوله سكرتي راسك
سهام : اما القيته تصرف معاي هكي طارتلي لان بان ع حقيقته حقود
علياء: و انا تبين ان مكار
زوبا ضحكت : ههههه هو الواضح ان الحمل و هرموناته دايرات شغل تمام خيركم سهام مصطفى شفته قداش يحبك و يحترمك و هادي اهم و انت عاد لين درهتي كبودنا بعزو قال عزو جاب توا طلعوا اخيه معذورين عاد انتو ع اساس دايرات عملة ساهلة .. يعني صح ما قلتيله من الاول و معاك حق لان ردة فعله بتكون قوية و انت عارفة ان امه نيتها كويسة لكن المفروض وقت هي قالت بتحكي خليتيها هو اصلا فشة الغل دارها فيك يعني مش ح ينفجر في امه و انت نفس الشيء سهام مش عارفة خيركم
سهام شبحت لعلياء : شفتي كيف كبرنا و بدينا ننصحوا
علياء : لا و نعلقوا و مش عاجبنا
سهام : شنو رايك
زوبا بخوف : خيركم
علياء : يالله
و هجموا عليها يدغدغوا فيها و هي تضحك بصوت عالي
فنارة بصوت عالي : اي ارقدي انت وياها نهارك اللي تدوري فيه
هما: 😂😂😂😂😂😂😂😂😂
وفات يوم الحنة من اجمل ما يكون عليهم في انتظار الليلة الكبيرة ❤️❤️❤️
.... يتبع
مع تحياتي مارية علي الخمسي ❤️❤️❤️❤️❤️❤️❤️