يعني توقعت كل شي الا موقف بالاحراج و الصعوبة هادي تخيلوا معاي شخصية زي زوبا وفي عمرها و مؤيدة للنخاع تشوف قدامها احد المذيعين المحسوبين ع النظام السابق و ع فكرة تعمدت نضيف الجزئية هادي لغاية معينة نتمنى نوصل بيها لقلوب الكل و عقولهم بمختلف انتماءاتهم و يشهد عليا ربي اني لا اقصد سوء لاحد و لكن اعتقد ان كل من عنده حكمة وادراك الامور ح يتفق معاي او ع الاقل يفهمني
نرجعوا لروايتنا و اللي شافاته زوبا شخصية اعلامية معروفة و مؤيدة : السلام عليكم اختي حضرتك زينب موسى ال### اذا مش غالط؟!
هي بدت ترعش من الموقف و تدور بعيونها في كل مكان خافت وتفكرت وعدها لمصعب والاهم تفكرت ثقة بوها فيها تفكرت اليوم اللي روحت فيه من المسيرة فرحانة وانصدمت برد بوها و وقتها لما لام عليها خذت شنطتها و تمنت لو تراجعت ع الجية للمطار بروحها لما مصعب طلعله شغل : عفوا انا لازم نمشي
: يا اختي ما تخافي انا قصدي او خلي نكون واضح معاك سبب وقوفي عليك حاجة فيها مصلحتك و مصلحة قضية وطنية
زوبا : ارجوك حول من طريقي و خليني نمشي ع حالي
في كافي مش بعيد عليهم كانت هبة مع بوها وامها مقعمزة في انتظار رحلتهم لدبي في شغل
هبة : بابا بحت غادي مش هضي بنت عمو موسى حق بعينك مع منوا واقفة
سعد اتضايق لان خاف عليها بحكم علاقته بمصعب و بوها : لا حول ولا قوة الا بالله اسمعي يا هبة نحنا ما دخلنا فيها و حسك عينك تحكي حاجة لحد من هلها وقت نتلاقو معاهم في دبي
هبة تصنعت الموافقة ع طلب بوها بس غافلاته و صورتها كذا صورة مازال قلبها مليان منها بسبب اللي صار و قررت تنتقم منها بطريقة تحرقها قدام اقرب الناس ليها و اكيد اهلها و مصعب اللي في اعتقادها خسراته بسببها
المهم : بالله عليك يا استاذ خليني في حالي
: اسمعيني انا نبيك تطلعي معاي في برنامج ع شان يستفيدوا الناس اللي زيك و ع شان الناس تعرف وساختهم و يطلعوا ضدهم نبيك تطلعي تستنجدي بيهم يطلعوا للشارع حرضيهم لانك بنت و البنت تعني الشرف و العرض و موقفك حساس
هي نست كل شي و رفعت صبعها في وجهه : وانتو انتو مني يعرف وساختكم مني ؟ في شني تفرق عنهم انت مقعمز اهني في فندق خمس نجوم و تطلب منهم يحرقوا روحهم في الشارع ينضربوا بالرصاص ع شان شني ؟! روح واطلع معاهم اذا عندك وطنية حق !!!
: احترمي نفسك احني ناضلنا و حاربنا
زوبا : و هربتوا ؟!! انا نحترم اي شخص ناضل برايه و حارب لاخر لحظة و حتى هرب من حقه يحمي نفسه و اغلبهم ع فكرة حاليا متجنبين التحريض اللي من النوع هذا مش انت من بداية الاحداث اختفيت و طالع برا و مازال تبي ناس تموت من وراك ترا خليني في حالي سادني اللي شفته
هربت منه هروب و مشت ترعش تتلفت تتاكد ان مش موجود لعند تصادمت مع جسور وقفت وجهها احمر و واضح صايرة معاها حاجة
سهام حست عليها و مافهمت سبب توترها بس حضنتها: زوبا خيرك
زوبا شافت مصطفى خافت هي عارفة موقفه و تشدده و زيادة ليلى ديما تحكي عليه كيف ع خلاف مع فاطمة
و هي في حضن سهام خطم نفس الشخص من جنبهم
مصطفى عطاه نظرات سم : اشكال معفنة
الكلمة جت في وذن زوبا زاد خوفها و سكتت ما قدرت تبوح باللي صار لسهام
باعدت عنها و تمالكت نفسها : ما في شي سهام الحمدلله ع سلامتكم و مبروك عليكم
سهام : الله يسلمك و يبارك فيك
زوبا رفعت ايدها ع شان تحيي مصطفى: الحمدلله ع السلامة
مصطفى حاول يبان عادي بعد ما استفزه الشخص المذكور : الله يسلمك و سامحينا تعبناك
زوبا : ما فيش تعب سهام هذه وخيتي مبروك عليكم
خالد كان راقد ع سهام خذاته منها زوبا : هيا نطلعوا
كان واضح انها مش طبيعية
طلعوا وراء بعض تلاقت مع هبة اعطتها نظرة مع ابتسامة خبيثة لها الف مغزى
زوبا حاولت تحافظ ع ثباتها الخارجي مع انها من داخل مشتتة يا ودي مرعوبة من القادم
روحوا مع بعض في تاكسي للشقة اللي في الدور اللي فوق شقة مصعب و زوبا و هما اجروهالهم
حاولت زوبا تنزل معاها الصغار بس سهام و مصطفى رفضوا انسحبت و نزلت ترعش توضت و صلت ركعتين و دعت ربي يسترها و يمشي الموضوع ع خير
فكرت تكلم سجى بس تراجعت لانها مش ح تفيدها
حطت ع رقم ونيس و اتصلت اكثر من مرة
ونيس كان في داره يشوف في مكالماتها توقعها بسبب الهدية اللي اصلا ما وصلتهاش مازال لهذا ما باش يرد لكن اصرارها و تكرار المحاولة
خلاه يستسلم و يرد
زوبا كان صوتها يرعش اكثر شي مخوفها نظرة هبة و الموقف في حد ذاته جر عليها تداعيات ما مرت بيه: ا الو
ونيس قلبه وجعه عليها : زنوبيا كنك؟
زوبا ترعش مازال : انا ونيس والله ما كلمته هو جاني وكلمني قلتله يخليني نمشي لكن ما باش يسمع كلامي
ونيس وقف و جي في باله زيكم شخص واحد و هو اوس : تي فيش تحكي انت لخبطيني معاكي وحدة وحدة و فهميني اللي صاير اول حاجة انت وين توا ؟
زوبا مسحت دموعها: روحت مع عمك و سهام للحوش
ونيس : باهي منو هضا اللي حكيتي عنه
زوبا فمها يرجف : اسمه ####{
هو تفاجا : شنو جابه لكي هضا
زوبا : و الله ما نعرفه هو جاني في المطار والله
ونيس : سكري الخط خلااااااااااص
طوط
طوط
هي قريب انجنت كانت متأملة فيه يفهمها و ينصحها كيف تتصرف بس صدمها وقت سكر الخط حارت شني تدير و مصعب حكالها ان طالع في رحلة تدريبية ع الطيارة يعني ما تقدر تتصل بيه
بدت تلف و تدور في نفس المكان و تدعي يارب يارب استرني يا رب خافت يكون يسجلها في كلامها يكون مصورها اي شيء كان في اعتقادها ان حد يكون متقصدها لشخصها زي ما صار قبل افكارها تلخبطت مرة وحدة
ما القت ملاذ غير انها تحاول ترقد و فتحت قران في تيليفونها
مرت كم ساعة و رن الجرس مشت الباب : مني
سهام : سهام افتحي زوبا
فتحت و كانت سهام ع طول سكرت الباب : زوبا توا تحكيلي خيرك مستحيل نقتنع ان ما فيك شي وجهك لونه مخطوف يا بنتي واضح في شي
زوبا ضغطت ع ايدها : تعالي بس
مشت معاها و قعمزوا : سامحيني ديما منكدة عليك
سهام : شنو الكلام هذا
زوبا : ما تخافيش ما فيا شي سوء تفاهم بيني و بين ونيس و باذن الله ينحل
سهام : ان شاء الله
طلعت الهدية اللي باعثهالها
شدتها و بدت تمشي في ايدها عليها
تذكرت كيف سكر في وجهها و حست انها النهاية حاسة ان خذلها او هي اللي خذلاته مش فاهمة شي ضمت الهدية و سهام حايرة فيها خيرها
زوبا : سهام مافيا شي اركبي لراجلك و صغارك انت جاية بتغيري جو مش بتتنكدي و انا شويا و انكلم ونيس و نرتاح
سهام : تبي تشوفي الهدية بروحك
زوبا : تو نشوفها لكن انا عليك انت نبي وقت نهدرز معاك تكوني فاضيتلي مش فيسع فيسع
سهام : باهي لو صار معاك اي شيء كلميني
زوبا : ان شاء الله
طلعت سهام و ركبت
و زوبا خذت الهدية و فتحتها كانت مذكرة 📓 سوداء منقوشة بالذهبي و مكتوب عليها زنوبيائي
مليانة بالاشعار المكتوبة بخط ايده بطريقة رائعة خطه جميل جدا
كل ما تقرا قصيدة او خاطرة تتالم اكثر ع انها جرحاته لعند وصلت في قصيدة
حبيبتي جعلت من عيني لك سكنا
و جعلت من قلبي لحبك وطنا
احببتك ابدا و لن اكون لك سجنا
تحرري من قيدي ولا تبكي حزنا
ع غيري بسببي يا اميرتي لطفا
زنوبيائي
اميرتي
احبك و احببتك و عشقتك دوما
لكني لا اطيق لك اسرا ا و ظلما
فتحرري من قيدي و لا تبكي حزنا
( كلماتي)
هي بكت و عرفت ان كتب الابيات هادي مؤخرا بكت لعند قريب غاب نفسها
سمعت الجرس مشت فتحت الباب متوقعة تلقى سهام بس كان الواقف امامها عكس كل توقعاتها
ونيس شاف حالتها : كنك يا زنوبيا حرام عليكي فجعتيني
و هي اهني لم تتردد لحظة و حضناته زي الطفلة وقت تحضن بوها بكل قوتها كان حضن زي حضنها لمصعب نفس الحالة رافضة تسيبه متشبثة بيه بكل ما اوتيت من قوة و خوف
و هو ما كان عنده وقت يفكر بحلاوة لحظة زي هادي وانما كان خايف من السبب اللي كان وراء حالتها
.... يتبع
مع تحياتي
مارية علي الخمسي❤️❤️❤️❤️🥱
ما حبيت نخليكم ع نار لبكرا 😘😘