الساعه 5:00 العصر بعد ما تقهوت ام خليفه وكلت من فوالت الطباخ اليديد و دقت عليه تعطيه رايها طلعت تشوف الزراعه الي قدام البيت وطلع معاها زايد ، بعد ما دارت وخذت لفه قالت حق زايد ينادي عامل الزراعه واستلمته ام خليفه :
ام خليفه : الحين يوم الجمعه انا ماقلت لك تنظف هالوساخه وترتب الزراعه ، ها الحين كملنا خمسه يوم وانت ماسويت شي
العامل : والله كلو شغل بابا حمد بابا سيف
( بالصدفه كان سيف طالع وسمعه )
سيف : ها شو بابا سيف ( فتح سيف تلفونه ويدور رقم العامل ) كم رقم مال انته ؟
عطا العامل رقمه لسيف وطلع مش مسجل
سيف : ها رقم رقم مال انت مش مسجل شو بابا سيف
العامل : ااا اااا والله شوغل زياده
سيف : خل شغل الحين نحن مايجي من واحد سنه كيف مني زراعه كشره شبس وكولا منو ياكل مني
العامل : يعني شو انا سوي خايس
سيف : انا يقول انت ؟ انا بس يسأل منو يجي مني
ام خليفه : هالخايس ماله قعده هني
سيف : خل تنظيف هذا الحين خضرا انت مافي طرش ابوظبي صح
العامل : ايوا
سيف : انت شو يسوي ؟ يبيع
زايد : بيبيع وبيطعل فلوس شو بيسوي
العامل : يعني انت الهين قول انا هرامي ، يعني انا هرامي ؟
سيف : و حرامي كبير بعد
ام خليفه : الحين روح جيب كيس زباله ونظف يلا
راح العامل وياب كيس زباله ينظف وام خليفه وزايد كملوا يمشون في الحوش اما سيف طلع معزوم عند ربعه ، شافت ام سعيد ان الجو حلو دقت على الخدامه وطلبت منها تييب القهوى برا ، يلست ام خليفه في اليلسه برا زايد استأذن وراح عند ربعه ، يووها حمدان وفيصل ويلسوا يسولفون عليها قريب اذان المغرب دخلت سياره :
فيصل : غريبه منو ياي؟
ام خليفه : مادري ، يمكن خطاب
حمدان : لا والله ماعندنا بنات
نزل الريال من السياره وقامحمدان وقف قدام الدري وخلى بينهم مسافه :
بو يابر : السلام عليكم
حمدان : يا مرحبا وعليكم السلام
بو يابر : هذا بيت غانم عبدالله
حمدان : لا الغالي هذا بيت سالم بن سند ،بو خليفه
بو يابر : هيه عيل السموحه ع الازعاج مغلطين
حمدان : لا مافيها ازعاج ، حياك الميلس ع فنيال قهوه
بو يابر : لو انا بروحي معليه بس معاي الفريج
قامت ام خليفه وحلفت عليه ينزل يتقهوى وينزل فريجه معاه وانزلت ام يابر متغشيه ويتبعنها ثلاث بنات ، شاف حمدان الحرمه متغشيه استحى ودخل الميلس اما فيصل تم واقف عدال يدته ،،، فالميلس ،،، دخل حمدان وشاف عيال عمه يشرحون ويرزفون بند المسجل عليهم :
حمدان : متنومسين شو ؟
سالم : لا الربع استخفوا شوي
حمدان : قوموا رتبوا الميلس عندنا ضيوف
مطر : يالحبيب مضيع تونا يايين منو ها الي بيينا ؟
حمدان : عن النشده الزايده ، ابرش خياسك وانت ساكت
سالم : منو ياي ؟
حمدان : ماعرفه في اي لحظه عادي يدخل
مطر : هو وينه ؟
حمدان : واقف عند يدتيه ومعاه فيصل
***
ام خليفه دقت على نوره وقالت لها تنادي القوم لان عندهم ضيفان وعاد البنات خذن لهن ساعه يكشخن ويتعدلن بعدها انزلن ( فطيم وفاطمه كانن يلعبن سوني في قسم الشباب ) يلسن البنات وتعرفن على بنات بو يابر الي هن ( مها وظبيه وريم ) حسن انهن يبن ياخذن راحتهن في السوالف فطلعن برا الحديقه ،،، قبل لتدق ام خليفه على نوره ،،، دخل احمد الميلس بلبس الفروسيه ويوم شاف انه في ضيوف استسمح وطلع دق على شيخة وقالها تبدل وتلحقه الاسطبل ( يحبون بعض من يوم هم ضغار ) .
في الحديقه ، كانن البنات ( بنات بو يابر و سلامه وعاشه ومريم ) يالسات في الجلسه الي قدام المسبح :
ريم : عندكم خيول او اسطبل او شي
عاشه : هيه بس كيف عرفتي
ريم : واحد مزيون دخل بلبس الفروسيه وجي يعني
ظبيه : تمزحون ولا صدق عندكم خيول
سلامه : تبونا نرويكم الخيول
ريم : ومنو بيقول لا
***
( في الاسطبل )
يلسن البنات على المدرجات يشوفون الخيول من بعيد اما ريم حبت تستكشف المكان ويوم شافت البنات يسولف ومب منتبهات لها قامت ونزلت من المدرجات وراحت للاسطبلات ، دخلت الاطبل الاحمر ومالقت حد فيه طلعت ودخلت الاسطبل الابيض وسمعت صوت ، تمشت في الاسطبل وطلع واحد من الخيول ووقفت عنده ، طلع احمد بخيله ومر عدالها ويوم تعداها قالت :
ريم : ماشاء الله كل هذيل خيولكم
أحمد : كل شخص فالعايله له خيل
ريم : هالخيل شكله كيوت عادي اركبه ؟
( دخلة شيخه )
أحمد : راعية الخيل وصلت اسأليها
فتحت الكشك وطلعت خيلها وطلعت بدون ماتنطق بولا حرف وحتى السرج نست تاخذه معاها طلع وراها أحمد على طول ، منطقة الاستعراض الضغيره كانت مقفوله والمفتاح عن المدرب ، فدخلوا فالكبيره الي قدام المدرجات مباشره ، استغرب احمد من شيخه لانها دخلت وعلى طول بدت في قفز الحواجز ، فجأه وقف حصانها وعقها وركض لكشكه ، نزل أحمد من حصانه وشاف إذا فيها شي لكن كانت الطيحه عاديه وقالت له انها متعوده اذا ركبت بدون سرج هالحركه دايماَ تصير راح أحمد وياب الحصان والسرج ،،، على المدرجات كانت عيون ريم طول الوقت على أحمد ولاحظة سلامه هالشي :
ريم : هذا سرج هيرمز ؟
مها : شكله والله
مريم : هيه أحمد ماخذنه لها يوم عيدميلادها
ريم : واضحه واحد احمد لو سمحتوا
عاشه : هذوا قدامج
( اطلعوا أحمد وشيخه من المزرعه )
ظبيه : بس احس الأحمر نار
مريم : تبين تشوفينه عند عاشه بعد ماخذنه مايد
ظبيه : واحد مايد بليز
عاشه : عاد إلا مايد خلكم بعيد عنه
***
اذن عليهم المغرب ردن البيت صلن ودخلن المطبخ يطبخلهن أكل ،،، عند أحمد و شيخه ،،، وقفوا ونزل احمد يصلي بعدها كملوا يمشون :
شيخه : شو كنتوا تسوون فالاسطبل ؟
أحمد : ها ؟ شو كنتوا تسوون ؟ انا ومنو
شيخه : بلا استهبال ، انت وهاي البنت مدري شسمها
أحمد : والله ماشي بس سألت هذيل خيول منو ووقفت عند خيلج وقالت عادي اركبه وانتي دخلتي
شيخه : بس هذا الي صار؟
أحمد : يعني شو الي بيصير ؟
شيخه : ماردي بك
أحمد : الحين هاي تزعلج ، والله ولا تيي صوبج
شيخه : عبالك بتقص علي بـ هالكلام
أحمد : والله باجر توصلج الرضوه ، بس عاد خلينا من طاري الزعل
شيخه : احس بعدنا من المزرعه ، شرايك نتسابق؟
أحمد : واذا سبقت شو بتعطيني؟
شيخه : امم الي تباه
أحمد : تمام
شيخه : وانا اذا سبقتك شو تعطيني
أحمد : فوق الرضوه تتطلبين زياده
شيخه : يعني ما استاهل
أحمد : لا والله تامرين أمر
يتبع ،،،