***
طبعاً بدت التحريات عند البنات و راقبوا حساباته في انستا وتيك توك وشافوا ضايف بنت يديده دخلوا حسابها يشوفون الصور الي منزلتها ، كانت عارضه صورها في الستوري ؛
فطيم : والله لو تطلع هاي حبيبته مالومه
ساره : والله صدقج تعق الطير من السما
شيخه : صح جميله مالومه
روضه : انتن ليش جي تفكرن ، يمكن زعلان منج انتي متأكده ماسويتي شي
ساره : ايه هب لانه اخوج تقعدين تدافعين عنه
روضه : حشى ماقلت شي
***
وصل مطر لجنيف وخذ السياره وعلى طول حرك لبيت يدته ، دخل الميلس وسلم على يدته وعمامه وتقهوى عقب ماقند راسه امبطح على بطنه وقعد يسولف ، انزعجوا من سوالفه وقالوا ينسحبون واحد ورا الثاني ؛
مطر : شو فيهم يطلعون
ام خليفه : ماشي والله ، يمكن عندهم اشغال
مطر : شو اشغاله و هم في اجازه
ام خليفه : ماشي انت كمل و شو علومك بعد
مطر : والله مافي شي يديد على نفس الحال
ام خليفه : هيه ياحيك ، زين يوم ييتنا تغير لنا جو
مطر : تقصين على منو انتي اونه زين يوم ييتنا
ام خليفه : شفيك ؟ انا الحين مستانسه على ييتك
مطر : هيه عيل منو الي قال مابا مطر يدري انيه مسافره إلا عقب ما استريح اسبوعين عقب خبروه
ام خليفه : وانت منو جاذب عليك بـ هالرمسه
مطر : هيه منو جاذب عليه عيل ، زين زين
***
اما حبيبة أحمد اليديده ( مهره ) بتروح جنيف ومن سمع احمد انها بتعقد في جنيف ثلاث ليالي حجز له في نفس الفندق الي هي بتسكن فيه ، وفي هالثلاث ليالي صار يشوفها من بعد غروب الشمس للساعه 12 ، قبل لا توصل جنيف ؛
مهره ؛ حبيبي عندي لك اهداء
أحمد : الي هو ؟
مهره : طرشت لك رابط اغنية موعد جنيف اسمعها واهم شي دقيقه 1:08
( بعد ماسمع الاهداء )
أحمد : افا يعني مابقدر اشوفج غير المسا
مهره : يحصلك اصلاً
أحمد : لا والله ما يحصلي ، المسا المسا نحن نقدر نقول شي
مهره : ماعندك غير مهره وحده
أحمد : و مابا غيرها ، نزين متى بتوصلين جنيف
مهره : باجر العصر ان شاءلله
أحمد : والمغرب اقدر اشوفج
مهره : بعد ماتقط الشمس تقدر
***
قبل لا تصير المكالة الي بين أحمد و مهره كانت رايحه شيخه لـ أحمد عشان تتفاهم معاه ، لكن سمعته يتكلم في التلفون فوقفت تسمع منو يكلم ، كانت واقفه وقلبها يحترق على الي قاعده تسمعه وتحاول تقنع عمرها انها قاعده تتوهم ومستحيل أحمد يخونها او حتى يفكر في غيرها ، سرعان مارجعت للواقع واكتشفت ان في غيرها في حياته حاولت تلملم نفسها وخذت نفس عميق لكن بعدها تحس بألم في قلبها لدرجه انها قعدت على الدري ماتقدر تتحرك تحس ان الارض مو شايلتها ، طلع ياسر من غرفته وشافها قاعده على الدري و تحاول تاخذ نفس كثر ماتقدر بس تنهيداتها كانت تمنعها من التنفس مسكها ياسر ووقفها عشان تاخذ نفس لكن مافي فايده بدا ويها يصير بنفسجي كأنها مخنوقه وماكان عنده اي حل غير انه يشربها ماي واذا مافاد يسوي لها تنفس اصطناعي ، للأسف ماقدرت تشرب الماي فسدحها على الارض وبدا ينفخ في فمها لين مارجع ويها للونه الطبيعي ، شلها ودخلها غرفته عشان ترتاح .
يتبع ،،،
كتبولي في الكومنت شو تتوقعون يصير 👀❤️🔥
بارت 31 : ليت ماله في ذرى صدري مجال
Start from the beginning
