Legends of Olympus (On Hold)

Life of the Party

Amber's POV

Pinaningkitan ko si Denzel, isang Alpha, na nasa kabilang dako ng mahabang bar counter.

Pinapalibutan kami ng mga estudyanteng naghihiyawan at inaalok na kaming simulan ang pag-ubos ng sampung shots ng tequila.

Tig-iisang hanay kami nito sa gitna ng mesa.

"Kinakabahan ka ata, Amber," aniya.

Kinisap-kisap ko ang aking mga mata sa kanya. "Para sa'yo po, tito."

Hindi ko gusto yung class nila pero di naman ibig sabihin nito di na ako gumagalang sa mga nakatatanda sa pamilya.

At kaya tinawag ko siyang tito ay dahil anak siya ni Lolo Hephep!

"Alright, challengers, to your first station!" sigaw ng Gamma na nakatayo sa mesa.

Pumunta kami sa tapat ng unang baso namin.

Ipinilipit ko ang aking mga daliring nangangating kunin ito.

Yung totoo, napadpad ako rito kasi pinilit ako ng mga miyembro ng cheering squads na sumama sa kanila para tumagay at mag-disco.

"Ready!"

Yumuko ako.

"Set!"

Kinuyom ko ang aking palad.

"Go!"

Masasabi kong dinaanan ng hangin ang kalahati ng mga baso ko dahil sa naisip kong technique: uminom nang hindi humihinga.

Napatakip ako ng bibig nang hindi ko sinadyang masinghot ang tequila. Ngunit nang makita ko si Denzel na nasa pang-apat na niyang baso, mabilis kong kinolekta ang sarili ko.

Nakasalalay ang reputasyon ng mga kaklase ko rito! Para sa Omegas!

Huminga ako nang malalim saka mabilis na inangat ang kasunod kong baso. Hindi maiguhit ang aking mukha nang sapilitan ko itong nilunok at marahas na binagsak ang baso sa mesa.

Angat. Lunok. Bagsak. Angat. Lunok. Bagsak.

Ilang beses ko itong ginawa hanggang sa makaabot ako sa huling baso at kadadampot lang din ni Denzel nung sa kanya.

Sa sandaling iinumin na niya 'yon, nagawa ko nang itulak pababa sa aking lalamunan ang huling shot ko ng tequila.

Itinaas ko ang maliit na baso sabay sigaw, "Wala pa ring magbabago, mga ulol! Omega pa rin ang magwawagi!"

Lumakas ang hiyawan ng mga estudyante.

"Our winner!" Kinuha ng Gamma ang kamay ko at inangat pa ito dahilan na mapatingkayad ako. "Amber! Daughter of the light and the bearer!"

Tangina. Dumadalawa na yung paningin ko- ay hindi. Tumatatlo na ata.

Binaba ng Gamma ang kamay ko kaya naibaba ko na rin ang shot glass sa mesa.

"Amber! Amber! Amber!"

Suot ang isang malapad na ngiti, kinawayan ko silang lahat na sinisigaw ang pangalan ko.

"Alright!" Biglang umalingawngaw ang boses ng DJ. "Everyone let's give it up for the one and only captain of our cheerleading squad! Amber!"

Sabay na naghiyawan at nagpalakpakan ang mga estudyante.

Samantalang, pabiro ko silang inirapan at umaktong tinatabig ang mga puri nila.

"Ano ba..." nahihiya kong sabi. "Ang dali naman kasi no'n..."

Mamamatay na ako.

At sigurado ako kasi ramdam ko na.