Legends of Olympus (On Hold)

Anchors

Reign's POV

Yumuko ako sa tabi ng lawa at marahang dinama ang tubig gamit ang aking mga daliri.

"Tabi!" Narinig kong sigaw ni Zack kay Amber na nakasakay sa isang floatie. 

Ilang sandali pa'y napalingon ako pataliwas sa direksyon na tinalunan ni Zack. Napakurap-kurap ako sa kaunting tubig na tumalsik sa'kin bago tignan yung dalawa na naunang naligo.

"Gago ka talaga, Zack!" reklamo ni Amber na tinuyo ang lens ng shades niya. "Yung shades ko!"

Suminghap si Zack sa sandaling umangat ang kanyang ulo mula sa ilalim ng tubig. Isang mata lang ang binuksan niya nang tignan si Amber na naiiritang binalik ang shades nito at muling sumandal patihaya sa floatie na lumulutang sa gitna ng lawa.

"Reign." Pinunasan ni Zack ang kanyang mga mata, bago lingunin ako. "Ayaw mo pang magtampisaw?"

"Maybe later," sagot ko.

Kumibit balikat siya saka masiglang nag-dive sa tubig.

Dahil sa sobrang linaw ng tubig sa lawa, nagawa kong sundan ng tingin si Zack na lumangoy pailalim. Nakamasid lang ako sa kanya nang dahan-dahan akong umupo sa tabi ng lawa, nakababad ang kalahati ng mga binti sa tubig.

Pagkatapos, nilingon ko yung iba na nakaupo sa pinagtugping picnic blankets.

Nag-uusap sina Vance at Grey, habang sina Raphael at Ash naman ay abala sa paglagay ng mga palaman sa sandwiches nila.

Paige was reading as usual, and had her legs folded beside her when she stopped reading and from her book, looked back at me with a questioning look.

Binigyan ko siya ng isang magaang ngiti upang ipaalam sa kanya na walang ibang dahilan ang pagtingin ko sa kanila kundi ang kagustuhan ko lang na makita sila.

She's been giving me that 'are you okay' look more frequently now, when I should be the one who needs to ask her that after catching my brother come out of the house she's currently sleeping in. 

Dahil dito, hindi ko naiwasang matawa nang mahina, at napailing, bago harapin si Bella na katulad ko ay nakaupo rin sa kabilang dako ng lawa.

Mahina kong iginalaw-galaw ang aking mga paa nang masdan si Bella na kumikinang ang mga matang nakatuon sa tubig, tila nananabik.

"Bella," tawag ko dahilan na iangat niya ang kanyang tingin sa'kin.

Kumisap-kisap siya. "Hmm?"

Sinulyapan ko ang mga binti niyang nagsimula ring gumalaw. "Anong tinitignan mo?"

Nagpipigil siya ng hagikgik nang sagutin ako. "May hinihintay ako, ih."

Nahawa ako sa kanyang ngiti. "Ano?"

"Na malunod ako. Hihi."

Mabilis na tumuwid ang aking labi sa sinabi niya. Hindi pa nga ako sigurado kung tama nga ba ang narinig ko nang bigla siyang mahulog sa tubig na para bang may humila sa kanyang paa.

Matagal-tagal akong napatitig sa dating kinauupuan niya. "Bella?" nagtataka kong bulong sa sarili bago natauhan sa nangyari sa kanya. "Bella!" tawag ko sa babaeng lumubog sa ilalim ng lawa dahil sa malaking batong ngayon ko lang napansing nakatali pala sa isa niyang paa. 

Humigpit ang aking pagkakahawak sa lupa. Ilulunsad ko na sana ang sarili ko patungo sa tubig para sagipin si Bella nang mahagilap ng aking mga mata si Zack na matuling lumangoy pailalim.

Pinaningkitan ko silang dalawa na paliit nang paliit sa aking pananaw.

Sa kabutihang palad, nagawa ni Zack na habulin ang tali. Inabot niya ito, saka siya naglabas ng isang maliit na kutsilyo mula sa loob ng naka-zip niyang bulsa. Gamit ito, pinutol niya ang tali at hinayaang lumubog ang bato sa pinakailalim, kasama ang kutsilyong binitawan niya.