زوبا : كيف عرفت ؟!
الهاشمي شاف ع جنب : لان اخبارك عندي اول باول و ما تساليني باي صفة و انت عارفة انت شنو عندي
هي توترت و ارتبكت : احم هيا لو سمحت قول علاش تبيني لاني مش حابة ندير حاجة من وراء خوي
الهاشمي شبك ايديه في بعض : و لا انا يرضيني شي كيف هذا !! نبي نحكيلك شنو صار معاي ! شيء ما قدرت نحكيه لحد و نبي نتشارك فيه مع غيري و ما في غيرك في بالي هذا غير اني مدين ليك باعتذار ما قدرت نتلاقى معاك من قبل
زوبا اضطربت هلبة و بدت غير مسيطرة ع رجفة ايديها و كل شوي تتفقد المكان و كأن حد بيكبسها : نسمع فيك
الهاشمي قام حاجبه و ابتسم : باهي اهدي خيرك منفعلة
زوبا : انا !لا عادي يتهيالك
الهاشمي عض ع فمه وابتسم : تمام معناها اسمعيني و نبي منك وعد تكوني هادية و بعدين نفضوا بقصة الاعتذار !
زوبا (شكله يبي يبات اهني هذا ) : كمل نسمع فيك
الهاشمي : سبق و حكيتلك اللي صار مع المرحوم عمر .. من خمس سنين محمل المسوولية الكاملة لبنات طرابلس و البنت اللي كان بيخطبها بس طلع كله متخططله تعرفي من منو؟
زوبا تسمعله و ساكتة
الهاشمي بحزن : من علي صاحبه و اخته
زوبا تفاجئت لانها تعرف ان خو عبير صاحب عمر : اخت عبير؟!
الهاشمي : ياريت هي بحد ذاتها
زوبا حطت ايدها ع فمها مذهولة : معقولة
الهاشمي : ربي خذالك حقك مني يا بنت العمة
زوبا مازال مش مصدقة : يعني هذا علاش انفصلتوا مش قصة المرض
الهاشمي : هذه لعبة ثانية بسببها خسرتك لثاني مرة
هي نزلت راسها كان صعب عليها تسمعه يتكلم عنهم بكل صراحة
الهاشمي : ما تنزليه راسك و اسمعيني الله يربحك لان القلب يا ما شايل ياما
زوبا قامت راسها و نزلت دمعتها
الهاشمي : امسحيها لاني لا نقدر نمسحها و لا نتحمل نشوفها
زوبا مسحت دموعها و شبكت ايديها في بعض و تهز كلها
الهاشمي تنهد : وياريتها جت ع هكي كان ساهل عليا نفوت و نكمل حياتي و كأن ما صار شي لكن اللي عرفته بعدها قهرني قهر الشيء اللي اتهمتك بيه انت و بوك و ع سباه خشيت للحرب طلع كله وهم عمي خليفة انقتل بسبب ثلاثة اشخاص واحد مسرة و الثاني مؤيد ولد خالتها و الثالث هو اسماء اخته
هي كانت مذهولة و حاطة ايديها الاثنين ع فمها مش مصدقة
الهاشمي : شفتي شنو صارلك توا ممكن تتخيلي انا شنو حسيت و زيادة كانت تعلم بموتة عمر و منو وراها اخطبوط كان لايد بيا و خانقني و انا مش عارف قتلوني و انا حي ضعت من روحي و قلت نبي ننتقم مشيت لمصر للسبب هذا و صار اللي صار و خسرتك انت سليت قلبي بعروقه بدمه و اعطيته لونيس بسباهم هما انا صنيعة و رباية جدي الله يسامحه ع الغلط و صنيعة مشاكل و هموم حاوطتني و خنقتني جيتي انت وسطها نكذب في روحي طول الوقت و في اللي نحس بيه نقاوم في روحي و نحارب فيها ضريتك عمري ما ننكر قهرتك لا مرة و لا اثنين و كل مرة نتذكر كيف حبستك مع الحيوانات نحتقر في روحي ما كنت ع عقلي وقتها كنت نبي ننتقم و ممكن كل انتقامي من الكلام اللي قلتيه عليا وقت وصفتيني بماوكلي
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
Part 66
Start from the beginning