طاحت زي ورقة خريف انهكتها العواصف رغم انها مازالت يافعة
انفتح باب الحوش و وقف ابوبًكر مذهول من المنظر بوها كان واقف مصدوم و مرعوب من غضبه لم يدرك ما اقترفت يداه حتى اللحظة اللي انفتح فيها الباب
ابوبكر : انت شني درت ؟
هو: انا والله ما نبي نقتلها لكن نبي نربيها
ابوبكر : توا بتربيها حسبنا الله و نعم الوكيل
طبس بيقيمها
بوها : لا وين رافعها خليها لعند تتصرفوا تبي يتهموني بيها
ابوبكر قدم منه و اعطاه كف لا يقرا و لا يكتب و قامها في حضنه و مرته طلعت وراه
ابوبكر نفسه حس بشعور سيء للغاية لان فرج حمله حتى هو الامانة حس بالتقصير زي ما حس بالخوف عليها دمعو عيونه و فعلا اليتيم مش شرط يكون يتيم الاب في اللي بوه حي زيها لكن فقدانها لخوها يتمها
حطها من الوراء ع مرته و لف و ركب السيارة و طلع بسرعة
بوها سكر باب الحوش و طلع جري هارب مما اقترفت يداه من سوء
بالنسبة لجهاد كانت اطول طريق ياخذها في حياته يتفكر في كلامها ضحكاتها المستفزة و هدوءها الفترة الاخيرة وقت بدو في مشاريع خيرية تخص فرج
عيونه ما عاد قدروا يقاوموا يحرقوا فيه وًيبو يفرجوا ع ارواحهم بالدموع و هو مازال يقاوم رافض الاستسلام لخبر ان ما صان الامانة و عاهد ربي انها لو ناضت منها بخير مش ح يخليها غادي اكثر و بيجيبها لاهله : كنت عارف يا صاحبي هذا ليش وصيتني عليها سامحني يا فروجه سامحني
و كمل طريقه
بينما هي كانت في طريقها لحجرة الطواري في احد مصحات العاصمة
في بنغازي
صباح اليوم هذا و ع غير العادة علياء ما نزلت و الكل مستغربها و خاصة وقت الغذاء ما نزلت برضو و معتز كان في معسكر بعيد شوي و مش موجود
اتصلوا بيها ما ترد
ركبوا الصغار خبطوا عليها و ما فتحت الباب و ركبت سهام نفس الشي الكل بدي يخاف و يحس بالقلق
اخر شي مصطفى اهتدي لشي : مافي عندكم مفتاح اخر للحوش
جمعية تذكرت النسخة الموجوده في المدخل : طح اسعدي كيف ما تذكرته ومدتهوله
خذاه و اعطاه لسهام : اركبي و حقي الولية كنها
سهام : باهي
ركبت بسرعة ً فتحت باب الشقة و خشت دورت عليها ما القتها اخر شي مشت للمطبخ و كانت علياء فاقدة الوعي تماما
جرت ع دولابها و لبستها عباية و وشاح و طلعت لراجلها : يا كلم معتز يا اما هيا نوصلوها احني لاول مستشفى
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
Part 55
Start from the beginning