حجر صوان

Part 54

زوبا : لا انا اخترت الخيار الثاني انقدم موعد عرسي ع شان انتو ترتاحو مني و ع شان تقتنعي ان انا ما ليا علاقة بفسخ خطوبة مصعب لاني بجديات تعبت خاطري مرة وحدة تتصلي و تطمني عليا خاطري مرة وحدة تتصلي و تقولي شني يا بنتي مرتاحة مع خطيبك او مش مرتاحة و البنت اللي واجعاتك ان سيبها مصعب و يشهد عليا ربي اني كنت مقررة ننسحب من حياته و نخليه يكمل معاها بس هو اللي انهي معاها كل شي و حاليا و بعد تاكدت من سواد قلبها فعلا فرحانة ان سيبها و باذن الله ربي ح يعوضه باحسن منها وخيي لان يستاهل

احلام حست انها كثرت : زوبا

زوبا بانفعال : ماما خلاص انت كنتِ اقرب حد ليا و عارفة اني وقت نغلط و ندير عملة نمشيلك اول وحدة والله المرة هادي ما غلطت موقف صار غصبا عني و معش عرفت نتصرف حاولت نهرب منه بس اصر يكلمني و لما عرفت علاش موقفني هزبته و مشيت تعرفي شني اللي توجع ان الراجل اللي ما ليشي وقت طويل يعرفني صدقني ع طول و حل المشكلة من اساسها و انت اللي امي مازال تشكي فيا تعرفي علاش ؟ لانك وليتي بعيدة عليا هلبة ماما هلبة و فوق ما تتصوري

احلام تاثرت بكلامها و ندمت اللي مشت وراء كلام هبة : معاك حق زوبا انا بس من خوفي عليك تكلمت هكي سامحيني و ما تديري شي ارجوك لا تقدمي موعد عرس لا شي و هبة انا نتصرف معاها

زوبا خذت نفس : خلاص ما في داعي ونيس كلم بوها و وعده يتصرف معاها

احلام ابتسمت : شايفة ان بادي يقرب من الحدود ونيس هذا

زوبا سكتت : تجاوزها من زمان يا ماما

احلام : مستاحشاتك و خاطري نشوفك و نهدرز معاك

زوبا تشبح لظوافرها : انت عارفة كيف تلقيني و راك تنسي عندي فيك حصة زي ما خوتي عندهم

احلام عيونها دموع : معاك حق

زوبا شافت ساعتها : ماما خلاص نستاذن منك وقت عليا انا عندي محاضرة يا دوب نلحق عليها

احلام عرفت انها تبي تتهرب منها : ماشي ع راحتك سلمي ع خوك

زوبا : يوصل و انت سلمي ع الكل

احلام : يوصل

طوط
طوط

زوبا طلعت البلكونة متاع الشقة و اتامل في المنظر و غمضت عيونها في لحظة صفاء بينها و بين نفسها تبي تبعد كل شي سلبي عنها

في دبي

كانت هبة مقعمزة تبكي و تبكي

سعد : ما ربيتك هكي يا هبة الراجل انت اللي ضيعتيه بانانيتك كان المفروض خذيتي درس بعد اللي صار معاكي يعني لو وسعتي بالك و ما حطيتيله شرط النسيب الكاره كانت اخته تجوزت و عدت ع حالها بس حضرتك لا كيف تبي تسافري و تعيشي حياتك بالطريقة اللي مخططيها في رايك و هضا غلط الدنيا عمرها ما تمشي كيف ما نحنا نبو بالضبط ضروري نضحوا في اوقات معينة ع شان المركب تكمل طريقها