نهى بعدم مبالاة : راجلي و ولد خالي يا ماما خلاص سوء تفاهم و انحل
سهى ضحكت: هههههههه راكها طريحة نباشة قبور و تقول سوء تفاهم معليشي تعودتي تكذبي ع الناس الثانية عادي بس توا بيناتنا ما فيش داعي ليه الجو هذا
نهى عطتها نظرة سم و كملت تضم في حوايجها : معليشي عاذراتك و متفهمة وضعك
سهى حذفت عليها المخدة: و خيرا وضعي شني تشبحي فيا قدامك نقطع ونريش
نهى قلبت عيونها: لا حاشاك خلاص سكتت غير خليني نكمل فيسع الراجل يستنى
سهى شافتلها بحقد كبير و الدمعة في عيونها و طلعت و سيبتها
نزيهة بلوم كبير : اختك هادي يا كلبة اختك متشمتة فيها و الا ناسية انك انت سبب طلاقها
نهى بعدم مبالاة: ابدا مش انا هي تسببت في الطلاق لروحها و توا خليني نوتي روحي و فوتيني ماما
نزيهة: ان شاء الله تجيني تشكي منه بس و الله بعدين مرطة فلفل في شواربك يا نهى روحي معاه و شن ما يدير فيك حلال عليه اللي طايحة عليه زي توا
و طلعت
و نهى و لا تاثرت كانت مقتنعة باللي مقدمة عليه و متاكدة ان العقبة الوحيدة في طريق سعادتها زوبا و طالما بوها في ظهرها و عنده ما شاد ع اوس معناها خلاص مش ح تواجه اي مشكلة جديدة معاه
مش عارفة كيف في نساء تعيش حياتها مع شريك حياتها بحسابات و ارقام و خطط ؟!!!
المهم طلعت شنطتها و تجاهلت النظر لامها و سهى و طلعت معاه لحياة جديدة بدون زوبا و طيفها و ما كانت عارفة ان زوجها دايرها كوبري للوصول لزوبا لا غير
في البلاد عند جمعة
الهاشمي ركب سيارته و شغلها و توجه للاستراحة متاعه و نسي الكلمة اللي قالها في لحظة جنون لعند رن تيليفونه
شاف المتصل وكان عبدالحفيظ استغرب
و رد : السلام عليكم
عبدالحفيظ : و عليكم السلام ولدي منقولك درناهن التحاليل للبنية معناها تقدر تقراها الفاتحة غدوا ما فيش باس شوف بوك و جدك و اكدلي كان تم الموضوع
الهاشمي حس الدنيا لفت بيه و اتضايق ان اللي داره في لحظة جنون ح يكون و اقع حياته و مستقبله و لكن اللي زيه عايشين بمبدا عنزة و لو طارت يعني عارف روحه ع خطا لكن ما في مناص من الاستمرار في الخطا هذا لان الرجوع عنه يعني ضعف و فشل و هالكلمتين ما ليهم وجود في قاموسه لهذا كان رده: تمام نشوفهم و نرد عليك
عبدالحفيظ بنبرة مليانة امتنان و شكر: لين نموت جميلك هذا ما ننساه يا هاشمي
الهاشمي بمحاملة: العفو يا عمي جميل شنو انا تشرفت بنسبكم
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
Part 28
Start from the beginning