اسماء بدت تهز في رجلها لان المسج وصلت و بوضوح بس مش حابة تبين انها ح تخوض حرب معاهم ع شان توصل لهدفها بسهولة : طبعا
الهاشمي : معناها متفاهمين المرحوم اتصل بيا قبل ما يموت بلحظات و وصاني ع صغاره مع العلم حتى بدون اتصاله صغارنا يتربوا في بلادنا و مستحيل نفرطوا فيهم و نخلوهم هنا و خاصة في وضع زي هذا
اسماء رعشت لانها عرفت منه ان خليفة كلمه وقت الحادث معناها هل ممكن يكون مكلمه قبلها او بعدها لان لو بعدها معناها ح يكون مخبره بالكلام اللي سمعه منها : مستحيل صغاري معاي و بعدين الوضع اهني مستقر خليك من الاخبار كلها من جماعة الازلام يبو الثورة تفشل
الهاشمي قاطعها : انا ادرى منك بالثورة و جماعتها و عارف اذا الوضع امن او لا و يا ستي نجي معاك و نقول امن و مستقر بس هالشيء ابدا ما يعني ان نخلوا صغارنا يتربوا بعيد علينا انسي و نوضي وتيلهم دبشهم و حاجاتهم و هيااااااا
اسماء قريب تموت من شخصيته و تسلطه عليها و انصدمت
ايهم حض جده: هييييه جدو منمشوا لحوشنا في ال####
الجد باسه : اي يا بطل هذه. بلادكم اماله شنو تمشوا غادي تركبوا ع الخيل و تطلعوا حتى للصيد مع الهاشمي
اسماء في سرها ماناقص عليا الا حياة الهمج بس : بس يا عمي صغاري باديين يقروا في مدارس خاصة و دولية مش ح يلقوا زيها غادي و حتى المرحوم يبيهم يقروا اهني
الجد بحزم : انت راهو فاهمة غلط حفيدي منين قالك وتيلهم دبشهم ما يشاور فيك راهو !! يعطي فيك في علم بس
اسماء زي من صب عليها اميا ساخنة
سالمين حبت تنقذ الوضع : والله يا حاج قديش ليا وانا نقوللها ما ليك الا اعيالك و عربك تربي صغارك بينهم و انا بروحي فاقدة جيراني و بلادي و عييت من القعدة هنا غير وحلت و ما قدرت نسيبها بروحها ، يالله سلم بنتي نوضي وتي دبشك حتى انت و خلينا نمشوا معاهم لو عندي مكان معاكم يا حاج نروح و كان هذا حطوني حتى قدا بنتي اللي في ال##
جمعة : لا احني جينا في السيارة الكبيرة ترفعكم كله غير هيا وتوا روحكم فيسع و احني عندنا مشوار ساعة نجو نلقوكم واتيين و سكروا الحوش و ضموا دنيتكم
اسماء راضية تمشي ع حسب خطتها مع المنجي لكن تبين انها تبي طرابلس ع شان ما يشك فيها حد : باهي الحوش كيف يصير فيه
الهاشمي : الحوش انا ندور من ياجره و الفلوس يجنكم لعندكم كل شهر
اسماء حست ان المنجي خلاصها الوحيد لان لو ما دارت هكي واضح ان كل شي ح يتحكموا فيه يعني هذا الحوش و هكي داروا معناها المعارض متاع راجلها حً يكوشوا عليهم هكي صورلها عقلها المريض و الجشع تحساب كل الناس زيها : ماشي نوتوا ارواحنا ما بين كملتوا شغلكم
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
Part 18
Start from the beginning