اسكربتات هالة أحمد

{23}

= أنا عند زينب ، وموبايلي صامت ماسمعتهوش ..ولما شوفتك رنيت كذا مرة قلقت فاكلمتك !
- قلقتي ؟! واللهِ فيكي الخير ..وأنا مش مية مرة أقولك لما تخرجي تروحي في حتة تقوليلي ؟!
= نسيت ياعبدالرحمن
- يابرودك ياشيخة يابرودك ..إنتي عارفة الساعة كام دلوقتي !! الساعة عشرة ياهانم وإنتي لسة ماروحتيش ومامتك وباباكي قالبين عليكي الدنيا ومش عارفين إنتي فين ؟! كانوا فاكرينك قايلالي ، لكن إنتي مش همّك حد وخارجة من ورايا ومن ورا أهلك وقاعدة عند صاحبتك للساعة عشرة ، وفيه ناس ميتين من القلق عليكي

"" بصيت في الساعة لقيتها فعلا عشرة ، الظاهر الوقت سرقني وماحستش بالوقت خالص ..""

= خلاص أنا هروح أهو
- ليه ؟! ماتقعدي كمان شوية ، ولا باتي حتي
= بغضب : خلاص ياعبدالرحمن هبات ..سلام

"" وقفلت السكة في وشه !! ..مابحبش حد يعاملني بالطريقة دي حتي لو عبدالرحمن ، أسلوبه دا مش بحبه ..""

- كنتي بتكلمي مين ياهدير ؟!
= بتأفف : ناقصة أنا خناق وزعيق دلوقتي !!
- في إيه يابنتي ؟!
= عبدالرحمن يازينب ، بيزعقلي عشان خرجت من غير ماأقوله وإتأخرت لدلوقتي
- بإستغراب : عبدالرحمن مين ؟!
= عبدالرحمن خطيبي يازينب ، هو أنا أعرف عبدالرحمن غيره يعني ؟! ..يلا سلام عشان مااتأخرش زيادة وأسمع كلام مالوش لازمة تاني
- سلاام

"" مشيت وروحت بسرعة ، ولما روحت سمعت نفس الكلام من بابا وماما ..أنا كنت في الكلية ولما خرجت روحت لزينب وماكنتش فاكرة إن أنا هتأخر للدرجادي ..المهم عبدالرحمن قعد يرن عليا طول اليوم وأنا مارودش ، حقيقي كنت زعلانة جدا منه ..كل الناس تزعقلي ماشي ، لكن عبدالرحمن لأ ..مابحبش أسلوبه يتغير معايا ولا يزعقلي حتي لو غلطانة ..ويعاملني ببرود وإستفزاز كمان ..قعدت يومين مابرودش عليه خالص ، لحد ماإتفاجئت في يوم وأنا نازلة الكلية واقف تحت البيت بعربيته ..بصيتله ومشيت ، نزل من العربية وجري ورايا ..""

- والله آسف ، حقك عليا
= .......
- طب أقفي طيب نتكلم
= معلش ياأستاذ عبدالرحمن ، مش فاضية وعندي كلية
- باستغراب : أستاذ عبدالرحمن ؟! هي وصلت لأستاذ ؟! إنتي إتجننتي يابت ؟!
= أيوة ، ولو سمحت بقاا إمشي وسيبني أروح الكلية عشان ماتأخرش
- طب أقفي طيب ، طب تعالي أنا هوصلك الكلية
= لا شكرا ، كتّر خيرك
- كدة ؟!!! دا أنا كنت جاي حتي أقولك إني هقعد مع باباكي إنهاردة ونتفق علي يوم نكتب فيه الكتاب !!

"" أول ماسمعت كدة وقفت وبصيتله ..""

= بتتكلم بجد ؟!!
- أنا كنت عارف إنك هتتضعفي لما أجيب سيرة الجواز
= هتيجي إمتي تتكلم مع بابا ؟!
- بكرة إن شاء الله
= بفرحة : أوك ..ااه بس أنا لسة زعلانة
- طب أعملك إيه عشان تحني عليا وإتصالحيني
= معرفش !! بس أنا مش بحبك تزعقلي ولا تعاملني بأسلوبك دة
- حقك عليا ، أنا والله كنت قلقان عليكي ..وقولتلك قبل كدة ، ماتخرجيش من غير إذني ..لكن أعمل إيه في دماغك الناشفة دي !؟
= أنا ماكنتش فاكرة إني هتأخر كدة ، وأصلا ماكنتش عارفة إني هروح لزينب ..أنا بس قلقت عليها لما ماراحتش الجامعة فاروحتلها
- خلاص ، حصل خير
= تمام ..بس صدقني لو زعلتني ولا كلمتني بأسلوب وحش تاني ، مش هاتعرف أنا هعمل فيك إيه
- بإبتسامة : إعملي اللي تعمليه ، علي قلبي زي العسل ياست البنات
= بإبتسامة : .......