MISSION IMPOSSIBLE : mission to get crush

Part - 5

နိုးနိုးမှာ ပါးစပ်အဟောင်းသား။

"မထူဘူး...ကြည့်ကောင်းတယ်။ ဒါပေမဲ့ နင် အဲ့လိုလိမ်းရတာမကြိုက်ဘူး မဟုတ်လား။ ငါ အဲ့ဒီ့ Cream နင့်အတွက်
ဝယ်ပေးလာတုန်းက နင်ပဲ အဲ့လိုတွေလိမ်းရတာ မကြိုက်ဘူးဆိုပြီး ပြောတယ်လေ..."

"အဲ့တာကတော့... မမနိုးနိုးက ဈေးကြီးပေးပြီးဝယ်ပေးထားရတာလေ။ မလိမ်းရင် နှမြောစရာကြီးမို့။ အခုလိမ်းကြည့်လိုက်တော့ စေးကပ်ကပ်လည်းမနေဘူး။ ကျွန်တော့်အသားအရေလည်း ပိုပြီးကြည်လင်ဝင်းပသွားသလိုပဲ။ ဒီနားက ကျွန်တော့်မဲ့ခြောက်လေးတွေ ဖုံးသွားပြီ"

" အခု BB cream ကြော်ငြာနေတာလား..."

ကြယ်လေးက ပြုံး၍ပခုံးတွန့်ပြ​၏။ ထို့နောက် သူ့အင်္ကျီနှစ်ထည်ကိုပြန်ယူပြီး အိမ်အတွင်းထဲပြန်ဝင်သွား​သည်။
ဆယ်မိနစ်ခန့်ကြာသော် အပြင်အဝတ်အစားလဲပြီး သန့်ပြန့်နေသောပုံစံနှင့် ပြန်ထွက်လာ​၏။ ကြယ်လေးသည် ဖုန်းကိုနားတွင်ကပ်ထားကာ ချိုချိုသာသာအသံလေးဖြင့် ဖုန်းပြောနေ​သည်။

"အိမ်ရှေ့ရောက်တော့မှာလား...ဟုတ်....ကျွန်တော်ထွက်လာပြီ..."

ကြယ်လေး ဖုန်းပြောနေသောစကားများကို နိုးနိုး နားစွန်နားဖျားကြားလိုက်ရသည်။ ကြယ်လေးက အိမ်အဝင်ပေါက်ဝ၌ ဖိနပ်စီးနေရင်း ဧည့်ခန်းတွင်ထိုင်နေသော နိုးနိုးကိုလှမ်းကြည့်ကာ

"ကျွန်တော် သွားပြီနော်..."

ဟု လှမ်းနှုတ်ဆက်လိုက်သေး​သည်။ ထို့နောက် ခြံအပြင်ဘက်သို့ မြောက်ကြွမြောက်ကြွနှင့် ထွက်သွားသည်။

နိုးနိုးသည် စပ်စုချင်စိတ်ဖြင့် အနီးရှိပြတင်းပေါက်ကနေ ခြံအပြင်ဘက်ရှိ ကြယ်လေးဆီ လှမ်းကြည့်နေသည်။

​မိမိတို့ခြံရှေ့သို့ ကားအနက်တစ်စီးထိုးရပ်လာ​၏။ ကြယ်လေးက ကားအရှေ့ခန်းတံခါးကို ဖွင့်လိုက်သည်။ ကြယ်လေးသည် ကားပေါ်သို့အလျင်အမြန်တက်သွားခြင်း ဖြစ်သော်လည်း တံခါးဖွင့်လိုက်ချိန်တွင် မောင်းသူခုံတွင်ထိုင်နေသော နက္ခတ်ကို နိုးနိုး သေချာပေါက်ကို ပြတ်ပြတ်သားသားမြင်လိုက်ရပါသည်။