حبيتك طفل عايش وياي
يا عشك الطفولة شلون أأذيك
ريم ..
الفجر ورة الصلاة كاعدة بازار الصلاة و اباوع على ابني ايمن نايم و لابس تيشيرت خاله جبير عليه بس الا ينام بي
و ذاك الادبسز الصغير نايم جوة يم رجل خالته
صافنه بي و اتذكر سوالف ضياء و كلماته هسة لو موجود جان آني مو هنا ، جان ببيتنا و نايمة مرتاحة و مأمنة على مستقبل جهالي بوجوده و هسة مرت سنة كاملة على استشهاده
بس هسة شنو كلما أصفن و اكول آني لشوكت راح اضل هنا ؟ جهالي لو كبروا شلون راح اكوم الحك على مستلزماتهم و شلون راح اسيطر عليهم و اربيهم و همة ولد
لحد الآن أحس شاهين مو مسؤول عني و عن أطفالي مع ان هو ما مقصر حتى بلا ما اكله هو موفر احتياجاتهم و اذا جان اخوية بساعة من الساعات يتعب و يزمخ بيهم يسكتهم هذا ابد ما فد يوم تململ منهم لو حجة عليهم اصلاً مرات يطبك وياهم علية و ما يخليني احجي عليهم
بس مع ذلك أحس نفسي ثكيلة
مو مكاني هذا و لا راح اكدر اكمل هيج
آاخ يا ضياء وين رحت و خليتني بهالحيرة جنت مأمنة و مرتاحة بوجودك شلون تروح و تدري آني مالي سند و حزام غيرك
كمت من مكاني و طلعت حضرت ملابسي و ملابس ايمن للدوام و كويتهن و حضرت جدوله و غراضه بجنطته كالعادة و تأكدت من واجباته كلهن حالهن
علما صارت بالستة و نص كعدته من النوم بالكوة يكوم ما يقبل اخذته للحمام و غسلت وجهه علمود يصحصح و رجعت لغرفتهم بدلتله ملابسه و عدلته و نزل كدامي
رتبت غرفتهم و طلعت لغرفتي هم بدلت و تجهزت للدوام و حضرت جنطة ضياء للروضة و نزلت احضرلهم الريوك لكيت مريم قبلي محضرته و كاعدين شاهين مكعد ضياء بحضنه و يوكله و يمه ايمن يسولف ع المدرسة و الدوام و اصدقائه
ابتسمت و آني اكول صباح الخير ردو و كعدت وياهم آكل دك تلفوني رقم غير معرف...
رديت و اجاني صوته .. هيج يعني اجي و ما تستقبليني يا بذاته ، نسيتيني؟؟ ملحنا مو خوش ملح ما يغزر؟؟
ضحكت .. حارث شلونك شنو رجعت صارلي يومين ادك عليك و خطك مغلق
.. اي ذاك بعد ما يشتغل هنا هسة رجعت هذا رقمي الجديد
.. يعني رجعت
.. اي
.. ليش ما كتلي لعد ؟؟
.. حبيت اسويها مفاجأة
.. لعد شلون تريدني استقبلك و اني اصلاً ماادري
.. لج لا هيج اشاقة
.. هسة انت وين
.. ببيت ابوية ما تجين نشوفج
