مو كل اليحب آيعيش فرحان ..
اكو واحد يحب بس هو يائس
واكو لمن يحب آيصارع الموت ..
ميهمه يصارع ألف فارس
ينشدونه آعله قيس وليلى كل يوم ..
أشو محد ذكر بالعشــگ عابس
مريم ..
ضليت افكر بالله ضياء راح يرضى لو يتمسك بية مثل ما متمسك بحنين ، ولو هي حنين المدللة مالته
كعدت بالهول يم خالة ملوك تطرز و اني اسولف وياها
نزلت رنا و الوجه مورم مبينة مضروبة و الدمعة بطرف عينها و شايلة لارين ، كعدت يم خالة
خالة حضنتها .. سودة علية بنيتي ليــش هيج مسوي بيج
رٲساً انفجرت بالبجي و تكللها .. ماادري خالة و الله ماادري شبي هيج شاد وياي اكفر احجي و ياه كلمة اناقشه بيها كبل يكوم يضربني ، و الله يجرم بية خالة شوفي شمسوي بوجهي يضربني بٲي شي قريب على ايده
وكامت توخر بملابسها و تشوف آثار الضرب و تبجي .. خالة و الله الصبح كوة اكوم من الفراش جسمي يصل عليه من الوجع ، حتى لو حيوان جوة ايده مو هيج يعامله ، حتى التلفون اخذه مني اريد اخابر أمي أريد احجي وية اهلي ماڪو و الله راح أموت
و خالتي حاضنتها .. و الله احجي وياه يا بنيتي ماادري شبي متخبل و الله مجان هيج ، اخاف جاي تسوين شي يضوجهه لو ترادديه
.. لا و الله خالة ما مسوية شي يجي لو عنده مشكلة بالشغل لو متعارك وي احد برة و يطلع قهره بية
انقهرت عليها ، حيل متٲذية و مقهورة حتى استغربت يعني معقولة هذا ضياء الحنين ويانة و ما فد يوم اذانا بحجاية ليــش هيج يسوي بمرته
خالة ملوك طلعت تلفونها .. هاج هذا روحي خابري و رجعيه و شوكت متريديه تعالي اخذي بس خليه يمي علمود لا يحس عليج و اني شكد ما اكدر راح احجي وياه و انتي تحملي لخاطري بس هالفترة يجوز اكو شي جاي يضغط عليه و لو هو مهما كان السبب مو من حقه يسوي هيج بيج بس و الله راح اضل احجي وياه لمن اجوزه منج
مسحت دموعها و ابتسمت و كامت باست راسها و خلت يمها الطفلة كالت .. راح اصعد اخابر أمي خالة شوية و انزله
.. اي بس لا تكوليلها ع المشاكل بينكم لا يضل بالها
.. لا ما اكوللها
و صعدت فوك و ضلت لولة يمنا ، خالة تلعب وياها و تناغيها دخل ضياء راجع من الشغل شمر مجموعة فايلات ع القنفة و اخذ لولة من ايد امه و كعد يبوس بيها و يلعب بشعرها و هي مكيفة بي و تضحك
اباوع لخالة تريد تحجي وياه و تتراجع ، لمن هو كال ، باجر ام ضرغام تريد تجيكم علمود موضوع حنين و بعد بكيفجن و اكون ممنون لو ترفضون و تريحوني من الدوخة هاي
.. بس لو اعرف شنو مشكلتك وية هالولد
.. مشكلتي مو بس بالولد ، بالولد و بزواجها بعدها صغيرونة بشرفج هي بيضة متعرف تكلي شلون تصير ام بيت
