راح أصبر بدونك وأرهم بلياك
وأذبح رمش عيني الجان يبجيلك
وأتحمل عذابك والبعد والشّوك
وما حط صورتك كدّامي وأشكيلك
ما أكلّك نسيتك بس جرح بالرّوح
يكسر واهسي وما يقبل أمشيلك
عيني الشّالتك كلتلها أشيلج راح
كالت شيلني وما قبلت تشيلك
وجرحي ألفاك صدره وما يريد خيّاط
واكف جنُّه واحد جاي يدعيلك
بس مجبور أدفنك يا عشك يا شوك
وأقرى الفاتحة وبالوحشه أصلّيلك
بعيوني الحزن يقرونه اليواسون
والفوك الحزن لو تدري شاحجيلك
شمّات الأجو وأسوني ثالث يوم
حيل ويّاك كالو مدري شدّ حيلك
مريم ..
.. ما اطلكج لو تمشين على رموش عينج
مالي خلك اتجادل وياه سديت التلفون بوجهه و رحت راسلت المحامية سألتها اذا هو ما يقبل يطلگ شلون يصير الخلع..
جاوبتني .. هذا لازم اتفاق بينكم انو تتنازلين عن كل حقوقج في سبيل يطلك او مثلاً اذا هو ما يقبل
يجوز يطالبج بفلوس بعد علمود يطلك..
كتبتلها شكراً و الوكت كله و محمد يدك غلقت التلفون و عفته ، كويت ملابس ضياء و حضرتله جنطته و غراضه
و التهيت بالبيت و بجهالي و اشغل نفسي علمود لا افكر لأن تفكيري ضايع بكلشي ، تعبت
ثاني يوم من الفجر ضياء يريد يطلع و كعد ايمن بس شافه لابس و يريد يطلع ركض جلب بي .. اجي وياك خالو
.. ما تكدر تجي وياي ما يصير
.. لا اله وياك
.. لا مااخذك يالله روح نام
چان يعيط .. مااااااااا اله اجي ويااااك اروووح ويااااك اخذنييييييي
لزمة .. ولك بابا ما يصير
كام يرافس ويتلاوه وية ضياء علمود يطلع و ضياء يضحك .. لك ما يصير حماار انت حبيبي ما يصير حرب هناك مو لعب تكدر تحارب؟
.. اي اي اي اكدر احارب
.. خوش لعد راح اختبرك و اذا نجحت اكوم اخذك كل مرة
.. اي
باوعلي .. مريم روحي جيبي السلاح من ورة الكنتور مالتي
بوكتها جان ضياء حاط بالبيت سلاح كلاشنكوف و معلم ريم و حنين عليه كلشي يصير
رحت جبته و اجيت ، اخذه من ايدي و كال لايمن .. يالله ارمي بهذا و اذا كدرت ترمي طلقة وحدة آخذك وياي
شاله ايمن بالكوة بعده يريد يرفع جان يوكع هو و السلاح بالكاع و كام يبچي
ضياء باوعله بطرف عينه .. شلون زلم مايعة هاااي
يكلي اكدر ارمي و اكدر و تالي حتى السلاح ميكدر يشيله ، راح اعوفك ما آخذك
ايمن ضل يبجي و يصيح و ضياء عافه و طلع و هو يتلاوه وياي يريد يلحكه اكلتلي شكم دفرة بس ميخالف
