يهنيالچ يالمگابر صفو بيچ عزاز
يطيبون الجرح لو جان ملجومريم ..
بعد اكثر من شهر من استشهاد ضياء ، بدت المدارس ، ابني ضياء بعدله سنتين يالله يداوم و ايمن صف ثاني ابتدائي ، طلعت بيهم للسوگ قبل يوم واحد بس من الدوام بنفس مكسورة اشتريله قرطاسية و ملابس و شكد اكله اختار شنو يعجبك بس هو ماكو ابد ميحجي و لا يريد شي
اخذتله اليحتاجه و رجعت للبيت وحدنا و الجو كآبة و وحشة إلى ابعد الحدود ، اكثر من مرة شاهين گال تعالي يمنا بس آني ماادري شي بداخلي يرفض انه اطلع من هذا البيت ، يمكن على ريحة اخوية و ذكرياته و صوته الي بكل زاوية من البيت ماادري
حضرت ملابس ايمن للدوام و كويتهن و حضرتله جنطته و هو بس نايم ع القنفة ما يحجي وياي
نضفت البيت و سويتلهم عشا ، و ناموا
ثاني يوم كعدته لدوامه و هو بالكوة يتحرك و كل شوية يبجي يكلي مااريد اروح للمدرسة و آني الح و البسه غصباً عنه ، جان شي متعب كلشوصلته لمدرسته و خليته بصفه و وصيت معلماته عليه و اخذت ضياء و طلعت لدوامي كملته و مثل روتيني كل يوم ارجع للبيت قبل نهاية دوامه اكمل و احضر الغدا الهم و اطلع اجيبه
لبست جبة و حجابي و شلت ضياء الصغير بايدي و طلعت من البيت قفلت الباب و اتمشى بالشارع لمدرسة ايمن و اني خانكتني العبرة و اتذكر شلون مشينا بهذا الدرب اني و ضياء اول يوم لأيمن بالمدرسة
وصلت للمدرسة و شفته كاعد بقميصة الاسود يم الحارس و مغطي وجهه بايديه الصغار وحدة و كل الطلاب رايحين سودة علية تاخرت عليه
رحتله و كلت يالله مـامـا كوم نروح للبيت
رفع راسه على كيف باوعلي و بس شافني صرخ باعلى صوته و دموعه عشرة عشرة .. ليــش اجيتي انتي ليــش انتي روحييييي مناااا روحياريد بس الزمه و اهدأه ماڪو تخبل يرافس برجله و يبعدني و يصيح و يبجي و ضياء يبجي على بجيته .. روحي رجعي للبيت ليــش اجيتي انتي ، خالو ضياء يجي ياخذني روحي و كولي لخالو ضياء يجي ياخذني
خانتني دموعي و آني اكله منين اجيبلك خالك ضياء هسة
شاله الحارس و يكله ايمن عمو روح وية امك خالك ما يجي
جان يزيد بالبجي و يكله .. لا يجي يجي هو كال لا تتحرك من مكانك الا اني اجيكالتفتلي الحارس .. اختي خليه يمي شوية و تعالي اخذيه
.. شلون كلبي ما ينطيني اعوفه و اروح
.. لا بس شوية يشوفكم ماڪو يخاف و هو راح يكوم يريدكممشيت و اني اسكت بضياء الصغير و اسكت بروحي كعدت على صبة كدام المدرسة بعيده شوية عن عين أيمن كلبي ما ينطيني اخليه واروح ، و اباوعله روحه شايغة و يصرخ يريد ضياء و الحارس يهدي بي
مسحت دموعي و اباوع للسما وينك ضياء عني تقبل اختك هيج تكعد كدام المدرسة و الرايح و الجاي يباوع عليها ، لو تقبل ايمن هيج يفرفح عليك ، مو جنت تكول يتيم هذا و اني بدال ابوه مو جنت تكول احرك الينزل دمعه من عينه ، هياته مفرفح بجي و بسببك