حرت و الحيرتني إنت
ضعت و الضيعتني إنت
تعذبني و أگول للناس مو إنت
يسألوني و شگول آني؟
أگلهم حبي بچاني
و لو مجروح أصبر الروح
گلبي الي جرحته وياك
ينسى جرحه علمته
ريم ..
فكيت عيني بصعوبة و اشوف غواش و البيت هوسة و صياح عاااالي حسيت راسي راح ينفجر من الوجع و الهوسة الي حتى مجاي افتهمها
رفعت راسي ابني نايم بالگاع يمي و مغطيه ، آني مو بنفس ملابسي ، لا ملابس ثانية ، استجمعت تركيزي و تذكرت شصار
حاولت بس اركز بالصوت ، ابوية و ضياء
و خرت الغطا عني و گمت احتاجيت ثواني علمود اتوازن على رجلي من الدوخة
توني اريد اطلع من الغرفة دخلت امي .. هاا بنيتي ريمة گعدتي ، يا بعد روحي و الله خوفتيني ردت اموت عليج
و حضنتني و تبوس خدي .. سودة علية ماما شصاير بحالج
گتلها .. ضياء شبيه يصيح و ابوية شجابه؟
.. يا يمة گابة بيناتهم صارلهم ساعتين يتمالخون
.. اني صارلي شگد نايمة
.. من البارحة بالليل اجيتي انتي و ابنج نايمين لحد الآن ساعة بالخمسة العصر هسة
لميت شعري و نزلت ، باوعت بالاستقبال ، أبوية گاعد و يحچي بكل أريحيه و برود .. صارلك ساعة تدافعلها ، هي لو مرباية ما تنهزم من رجلها بنصاص الليالي
صاح بي ضياء .. اي مو هي گاعدة بنعيم و عجبها تنهزم ، ولك مذبوحه ركبتها تصب دم اجتني ، يعني لو جرحها شوية اعمق جان ماتت ، و لو صار بيها شي إنت شتفيدني و رجلها شيفيدني
.. خابر عليه بنص الليل يكلي بتك انهزمت حتى ماعرفت شحجي ، هي العدها جرأة تنهزم بالليل الله اليعلم شمسوية لمن طكت روحه و هيج سوة بيها
جاوبه بعصبية .. هاي إنت أبوها و هيچ تحجي شبقيت للغريب ، خو ما تگول هو شمسوي بيها لمن طلعت بروحها العزيزة ، لك اني اختي يجيبلياها غريب بالليل و هذا حالها ، من الله ياخذني و يخلصني منكم
.. أگلك ضياء......
يحچي و صوته مشخط من الصياح .. يابة لا اگلك و لا تگلي ريم ما الها رجعه لبيت ذاك العار و يطلگها و رجله فوگ راسه ، هذا الي شفته بعيني و الله العالم شمسوي بيها بعد و هي الغبية ساكته
.. مو هو الحجي بكيفك
.. لعد بكيف منو ؟ ريم ما الها طلعة من هذا البيت و شتريد تسوي؟ تريد تحبسني يعني مثل ذيچ المرة ، اعلى ما بخيلك اركبه
.. ريم ترجع لبيت رجلها مثل ما اجت و مشكله بيناتهم همة يحلوها انت لا تتدخل
.. ما ترجع و اذا هي تجيني و تكلي اريد ارجع اكسر رجليها و اكعدها هنا ، هاي هي انتهت خل ينساها و انت سد الموضوع
