عشق عقيم

البارت الرابع

الرقم ضل يلح و يدك هواي تقريباً نص ساعة هو كلما يفصل الخط يرجع يدك..

اخر شي خالي جاوب  .. الوو
ماكو رد  ، رجع گال منو.. هم محد جاوب
اجة يسده و هذاك حچة  .. يابة..

خالي عرفه فوراً من صوته ،  دمعت عينه و حسيته اختنگ و گال بصوت اشبه بالهمس  .. شاهين؟..

تنهد و گال  .. إي يابة إي..

سكت خالي ثواني كأنما ميعرف شيگول و رجع سأل  .. إنت وين وليدي ليــش شصار بيك اذا عدل ليــش  ما رجعت..
.. بالجنوب..
.. وين بالجنوب؟
.. إذا أگلك راح تجي وراية..
.. أكيد
.. لعد ماكو داعي أگلك..
.. وليدي صارلك شهر هسة يالله تذكرتنا وين جنت ؟ وين گاعد؟ شلون عايش؟ شوداك هناك ؟ احنا حتى ماعدنا أحد بالجنوب..

ضل ساكت ما جاوب  ، خالي گال بلهفة اصيح امك اكسر المها خل تحاجيك
حچى بسرعة  .. لا لتگللها
.. گلبها مفرفح عليك وعلى اخوتك الراحو دخل اصيحها خل تفرح بواحد بيكم بس الله يعلم شصار بيها من رحتو..
.. يابة گتلك لا تگللها ، لا تخليني اسده..
.. لا خلص هاي هي براحتك
.. آني من أكون مستعد احاچيها أگلك صيحها..

.. ماشي..
..  لا تخابرون على هذا الرقم مو إلي، آني من يصير عندي مجال أخابركم..
.. عاد بس طمني عنك شلون عايش اريد افتهم..
.. يابة قابل آني بنية و حاير بعيشتي..

نحچي وياه و اكو هوسة يمه كأنما موقع بناء
.. الله وياك يابة گالها و سد التلفون  ، رفع راسه خالي و باوعلنا بحيرة ، گام و صاح و الدمعة معلگة بعينه .. ام خاااالد هذا ابنچ عدل..

اجتي تمشي بلهفة ليمنا و تنتچي ع الحايط حيلها رايح و گالت و صوتها يرجف.. ياهو بيهم ؟..
چانت أول كلمة تگولها ورة مقتل أولادها صارلها شهر ساكتة ما تحجي وي اي انسان..
خالي گللها شاهين
خنگتها العبرة .. و شلون عرفت..
.. هو خابر هسة..
تجمعت الدموع بعينها و گالت مهضومة  .. صدگ واثق صدگ تحجي متٲكد ٳنت يا ربي رحمتك..
.. و اللّـه  و اللّـه  متٲكد
.. ليــش  ما خليتني ٲحاجيه
.. هو ما قبل و الله
گعدت بالگاع تبچي و تگول الحمد لله الف الحمد لله  على كل حال  ، تبچي و خالي يهدأ  ، مادري فرح مادري حزن بس چانت فرحة تدخل لگلبها  ورة الكارثة الشافتها انفجعت ب3 شباب بليلة وحدة..

گمت طلعت من يمهم و رجعت لبيتنا بسرعة اريد أگول لماما و لريم  ، دخلت لگيتهن ماما گاعدة تخيط و ريم يمها بالگاع تاكل و تسولف وياها..

أول ما دخلت صحت  .. ماما ماما ماما
عاطت بية  .. ووجعة شبيچ..
.. شاهين خابر على خالي هسة..

گامت من مكانها لزمتني من اذني و گالت  .. بطلي چذب بت الكلب جاية تصيحين من راس الشارع لهنا علمود تچذبين علية