اليذكروني عفتهم لجل شوكي وياك
واني اتذكّرك وانت الي ناسيني
بايعني برخص واني بغلاة أشريك
مو انت الگلت بالروح تشريني ؟
روح وداعت الله بس أگلّـك ها
الي رب كريم الصبر ينطيني
ريم ..
ليلة وحدة ارتاحيت منه و رجع سممني من الصبح خابر يكلي يالله رجعي و ماڪو مبيت ببيت اهلج بعد ، اكله تعالي اخذني يكلي لا رجعي وحدج ماعندي ، العار عنده نقص ڤيتامين غيرة
الشي الوحيد المرتاحة بي انو ما مقيدني بڪيـفي اطلع و اطب و البس ابد ميحجي ، خابرت على حارث كتله متجي تاخذني حتى وياها نطلع شوية نتونس لٲن ملل كال العصر اجي
كعدت اسولف وية امي و خالة ملوك و العب لارين شوية مريم طلعت لبيت خالي شكد نحجي وياها بس هي متعودة عليهم و هم همين اذا يوم واحد ما راحتلهم يخابرون مـامـا يكلولها شو مريم ما اجت
شلت لارين عن مـامـا شوية مع انو مو هلكد احب الجهال بس هي هادئة ڪلش و لطيفة شكللها تسوي ، حطيتها بـ السنك و شغلت المي عليها و حطيتلها رغوة صابون و هي مكيفة تضحك و حاطتلها العاب و العب وياها بالمي و نغني
باوعت من الشباك ضياء جاي يدخل السيارة.. تيي لولة اجة بـابـا
و هي كمزت تريده ، شلتها نشفتها و لفيتها بالخاولي و هي عينها ع الباب تنتظره يدخل
تأخر شوية برة يحچي بالتلفون و اني لازمتها بالمطبخ تنحست تريده ، دخل بس وجهه ميتفسر و بغير عالم و لارين ترفرف بإيدها و تضحك تريده يشيلها ، ما التفتلها و مشى و هي صرخت تبجي
استغربت هو دائماً من يرجع للبيت أول شي يدور عليه لولة و يضل يلاعبها ، شعجب عافها هالمرة ، حطيتها ع الميز لبستها و اسكت بيها صفيت الهوسة السويناها بالمطبخ و رحت وراه
باوعتله من باب الاستقبال يروح و يجي دخن و كل شوية يفرك وجهه بعدم صبر ، دخلت يمه .. ضياء شبيك
ما جاوبني
.. بتك تريدك شوف شلون تبجي ليــش ما شلتها
هم ما جاوب بس اخذها من ايدي و كعد و كعدها بحضنه هي سكتت و يلعب بشعرها باله مو يمي
عفتهم و صعدت بدلت و عدلت شعري و لميت الغراض الي جنت جايبتهن وياي جان ببالي اضل شكم يوم ارتاح بس الكلب استصعبها شلون تروح ريم و ترتاح مني شلووون
لميتهن و نزلت جوة كعدت بالهول و العب بالتلفون و ضياء يمي و بنته نايمة بحضنه ، وضعه ابد مو طبيعي وجهه صاير احمر ، ذبيت التلفون و كمت جبتله حباية الضغط و مي و اجيت كعدت كدامه هاك اخذ ضياء مبين ضغطك صاعد ، اخذها من ايدي و مد ايده ياخذ الكلاص ايده ترجف اخذه و وكع من ايده انكسر فزت لارين ع الصوت تبجي
.. ركز ضياء شبيك
شال عينه باوعلي و نتر بية .. شهاللبس هذا
ما جاوبته و أباوعله بإستغراب صاح بية .. هااا شنو هاللبس هذا شوكت تكبرين و تبطلين سوالف المراهقات و لبسهن هذا
رفعت حاجبي .. القاضي راضي إنت شعليك و بعدين شنو هيج كبيت بية مدري منو لاعب باعصابك و جاي تفرغ قهرك بية
هز راسه .. اي صدك عندج عار مسؤول عنج آني شعلية
و وراها ما اتدخل و لا حچة عن لبسي ابد
