منين أجيت وبالعشك عندك يقين
منين اجيت وياهو سوّالك درب
أنطيني مهلة وخلّ أشوفن وضعي زين
وخلّ أشوف أنوب هم أكدر أحبّ
كلبي تيهتا وشرد ما أدري وين
وأنّه صار إسنين ما عندي كلب
وخالي كلبك وأنت بعيونك جمال
كل جمال الكون يمّك يعتذر
نبع شفتك يعني كلماتك زلال
والعطش بالرّوح تاركم جم فطر
ريم ..
كاعدات وحدة تباوع بوجه الثانية بحيرة و قلق ، كلما ندك على ضياء خارج نطاق التغطية خطه
اكلنا الخوف عليهم هد حيلنا و ضرغام اصلاً مكسور تلفونه ، كلمن يمها تلفونها و ننتظرهم يخابرون ولو من رقم ثاني
جننا نقنع بنفسنا انه مابيهم شي و لازم نتتظر و نشوف و تاليتها ، بس احنا سمعنا بإذننا الانفجار قبل ما ينغلق الخط
خالة ملوك ضلت تسأل .. ضياء شبيه ليش ما يخابر
حنين .. يمة خابرنا منو كلج ما يخابر
.. و خابركم و ما حجة وياي؟ ليش تجذبن
ضلت حنين ساكتة و خالة ملوك بلعت ريك .. شبيه اخوجن شبيجن احجن ، صايرله شي ؟
مريم .. لا خالة لا مابي شي بس خطه مغلق يجوز مشغول ننتظره شوكت يتصل علينا
كمنا كلنا من يمها ما نريدها تضل تسأل ، بس احنا انهد حيلنا ضلينا نلوب عليهم شصار بيهم و اذا اني و ريم بقهر ضياء ، حنين بقهرين رجلها و اخوها ، يا ربي بس لا تفجعنا بيهم مالنا غيرهم بهالدنيا
عيوننا ما ضاكت النوم بذيج الليلة ، كمنا الصبح نجر نفسنا بالکوة نحضر الجهال و نتحضر لدواماتنا و ام ضياء گلبها علمها ضالة تسأل بينا و إحنا مر ننطيها جواب شافي..
عفت إبني الصغير يمها و أخذت أيمن و طلعت أتمشى وياه لمدرسته کايدة ايده و شايله جنطته و هو يسولف و بالي مو يمه ، وصلته و شفته يدخل للمدرسة وراها طلعت لدوامي
وصلت لمدرستي دخلت جنت متأخرة ربع ساعة و لذلك كبل للصفوف اخذت اول درسين و رجعت لغرفة المعلمين كعدت و بالي مشدوه حتى ما سلمت و لا انتبهت للكاعدين
صافنة ع الشباك اجتي مها كعدت يمي التفتت شفتها بثوبها الاسود و الوجه اصفر ، حاچتني .. شبيج ريم وين بالج..
جاوبت بتعب .. يم أخوية تلفونه مغلق و خايفة عليه
بلعت ريك .. ان شاء الله مابي شي لا تخافين هناك كلشي يصير تنقطع خطوط الاتصالات او ينكسر التلفون كلشي يصير لا يضل بالج لو بي شي لا سامح الله يبلغوكم
.. مو المشكلة هو و رجل اختي هناك و لا واحد بيهم اتصل اذا مابيهم شي ليش ما يتصلون يطمنونا من اي رقم
.. لا تفاولين عليهم عيني ريم الله يحميهم ان شاء الله مابيهم شي وي رجعولكم بالسلامة
