و اني احجي وياه دخل مخلد و لونه صاير اصفر
گمنا ثنيناتنا نباوعله بٳستغراب و بنفس الوقت مكيفين رجع توقعنا يتٲخر و قلقنا من الوضع
خالد سٲله .. شبيك
هو وگف يم السنك و فتح المي يغسل وجهه و يشرب و يتنفس بسرعة ، كمل ووگف مسح وجهه و حلگه بردانه و گال .. عبالك فلم ٱكشن ، الاجواء مثل الافلام الٱمريكية الي نشوفها بالتلفزيون
ولكم صايرة معركة بالمنطة الي جنت بيها و الطرفين ما يرمون طلقات، طلقة وحدة ما سمعت كلها هاونات ، هاون ورة هاون، و اطلع الكالك الشارع كله دخان يخنك
و انوب ارجع بالسيارة يم منطقة...... صاير مراشگ طلقات عبالك الكل يرمي بحيث دنكت راسي جوة الستيرن و اسوق على عمه عيني اخاف تجي طلقة براسي
تتذكر من جننا نتمى نمثل بفلم ؟ ، لك احنا جاي نعيش الفلم على ارض الواقع جاي نعيشه يومية ، طلقات و هاونات و عمليات قتل و خطف
خالد .. انت صدگ تحجي ابوية اجة يوگف گلبه من الخوف عليك و انت معجب بالفلم
.. و على شنو خايف حتى اذا اموت انحسب شهيد
.. اللّـﮪ يطيح حضك امشي نقرا الامتحانات مابقالها شي اذا نضل هيج راح نرسب
.. يالله
راحو لغرفهم علمود يقرون و اني شعندي باقية رجعت للبيت تلكاني ضياء من الباب .. انتي بس فهميني منو اهلج احنا لو ذولاك البيت
صفنت بوجهه .. انتو
.. لعد ليــش 24 ساعة هناك؟ امج ذابة صرتج هناك؟
.. ماادري اسألها
.. دخلي جوة و قللي وكت روحتج الهم يعني ساعة كافي
.. ماشي
كلتها و ما ناوية اسمع كلام
دخلت لكيتهم كاعدين كلهم ع الغدا
باوعتلهم هاي اول مرة تصير عندي عائلة و يجتمعون على سفرة وحدة ، جنت ڪلش احب هذا الشعور من اشوف بيت خالي يكعدون على سفرة وحدة و يضلون الولد يتشاقون و واحد يساعد الثاني من يحتاج ، جنت ڪلش مفتقرة لمعنى عائلة
و حتى من ضياء جاب حنين و خالة ملوك يمنا و صرنا عائلة لان ضياء اخذ مكان الاب بحياتنا و لمنا ، بس بعدني اميل لبيت خالي بشكل مو طبيعي
خالو جان دائما يجاملني و يحبني و ياخذني بحضنه و زوجة خالي حيل حبابة و من تزوجت زينة ضلت تعتبرني بتها و تكلي تعالي يمي دائماً لأن البيت وحشة بدونج
و ولد خالي جانو مثل الاصدقاء و اكثر ، جانو اخوان بالنسبة الي و هم معتبريني اختهم و من اطلب منهم شي يسوولي
هاي الاشياء لحد ما دخل ضياء لحياتي آني جنت فاقدتها لا عائلة تنجمع و لا اخ يحتوي و لا ام قريبة و لا اخت تصير صديقة، كلمن حاير بروحه
كملت خالة ملوك اكلها و كالت .. ضياء وليدي اخذني لغرفتي
اجة يمها بإبتسامة و شالها خلاها ع الكرسي المتحرك و دخلها لغرفتها خلاها على سريرها و من جاي يبتعد عنها باست كتفه
