خايبات شبيجن هجمتن علية البارحة بالخاص تكلولي القصة بيها عنف هواي ، اووي عيني عساس قصة المراهقة و الاربعيني جانو ينثرون بيها ورد
هي وين اكو قصة عراقية مابيها عنف
آني شعلية ولد الرافدين حامين احجو وياهم مو وياية
المهم اقرن اقرن و علقن لا تغلسن تفاعلكم صاير قليل
يسقط سجن شوكك ولك مو ملّيت
ما مرّة رحمت بحال مسجونك
شفتني لوحدي وأنت جمالك جيش
واحتلّيت قلبي الماكدر دونك
راح أدخل حرب صبرك بدون سلاح
واشمّت بيك كلّ المايكدرونك
واجبرك تنسحب متعذّب ومكسور
وأشلع ضحكتك من لمعة سنونك
أنا نطيتك عمر شمعة عذاب وليل
بس كلّ الخذوك شراح ينطونك
ثواني بلا سبب كدرو يغيرونك
مريم ..
فتحت الخط بعدني ما حاجية جان يصيح بية .. إسراء طالعة زعلانة من بيت رجلها و إنتي ما ترجعين لبيتي إلا هي ترجع.....
و سده حتى ما فهمني شصاير ، شطت و آني شعلية بإسراء ، ردت أرجع أدك عليه بعدين كلت خل يولي فوگ ما ضاربني البارحة فوگ ما مدخلني بمشاكل غيري ، اضوج؟ ، يطبه مرض كلت خل اخلص من شغلة ضياء و رنا هسة و أفكر شسوي وية محمد
شوية و اندگت الباب الخارجية حيل ، طلعت فتحتها و دخللي للطرمة اخو رنا شلون العاصفة و يصيح وينه هذا اخوج وينه اليوم اطلع حليب أمه من خشمه ، شمسوي برنا لمن هيج ما تكدر تحجي
همست و كلي إستغراب من خبال هذا الرجال و هو بعده كلشي ما مفتهم .. ما موجود طالع
.. اي اي طلع انهزم ليش لا ، شمسويلها ؟
.. ما أدري هو گال اجي ما الگاها
.. صيحيها
دخلت كومتها و سندتها علية و انتبهت ملابسها من جوة بيهن دم هواي و طلعتها اله و هو شافها و يغلط و يفشر و اخذها للسيارة ، بس گعدت چان تگول .. جيبيلي بتي
صاح اخوها .. ختولي عوفيها
.. لا اريد بتي مااعوفها
دخلت دااجيب الطفلة جان بخابر ضياء
صوته چان اهدئ بس البحة كلش واضحة بي و يحجي کأنما شخص چان يبچي .. مريم راحت رنا؟
.. لا بعدها هستوة اجة اخوها ياخذها
.. ديربالج تخليها تاخذ لارين وياها
.. همزين كلت هستوني اطلعها
.. لا ديربالج
.. ضياء شصاير
.. بعدين بعدين ، لا تنسين شكتلج
و سده
تنفست بعمق و هديت ايد الطفلة ، طلعت و سديت الباب عليها و كلت ضياء ميقبل تروح وياج
هزت راسها بتعب مبالغ و اخوها گال .. خليها اله
و راحو
وراهم بشوية اجن امي و خالة ملوك هم سولفتلهم و همة مستغربين يكولون اليوم الصبح مابينهم شي
اني عفت الجهال يمهم و طلعت لبيت خالي لأن الفضول يقرة عندي الف شبيها اسراء و مخلد
دخلت هم هادئين ماكو جهال ، سلمت على خالي و مرة خالي عيونها حمر و مورمة مبينة تبجي و كاعدة تقرا قرآن ، هم سلمت عليها و صعدت لرفل فوك
