إنخاف ما نحچي الحقيقه
أيعـذرونه أيجوز
بأنواع العقاب
أنخاف لو مطنه اللثام
أنروح بيها
لو كشفناه النقاب
سافرينه وأحنه مجبورين
لا بد أن نسافر
أنجبرنه أعلى الغياب
سافرينه أويانه أخذنه
ذكرانه مليانَـه حزن
ومجسّــمه بصورة عذاب
ريم ..
فتحت عيني بصعوبة و راسي يوجعني حيل ، استوعبت آني مو بالبيت ، استجمعت قةتي شوية و كمت و خرت الغطا عني و نزلت من الجرباية الدنيا تفتر بية من الهبطة
باوعت حولي غرفة رانية ببيت امها ، عرفت خارث جايبني نزلت جوة لكيتهم يتغدون الدنبا نهار ، آني صارلي شكد نايمة
عهود مكعدة أيمن بحضنها و توكله و هو مكيف بيها ، ضليت واكفة ع الدرج و اباوعلهم و لازمة راسي ، لمن انتبه حارث .. هلا بسورها و نورها تعالي شرفينا كعدي اكلي
.. آني صارلي شكد هنا ؟
عهود .. البارحة بالليل جابج انتي و أيمن و سولفلنا شصار
.. إي آني أروح لبيت أهلي ، يالله جيبو إبني
گامت على حيلها و شايلة أيمن .. يمة إستهدي بالرحمن تروحيلهم بحالتج هاي ، يخافون عليج ، كعدي اتغدي و ارتاحي و يوديج حارث ، تدللين
غصيت بعبرتي و آني أتذكر كلشي مر علية البارحة .. مااريد مااريد ، إنطيني إبني و هسة يكوم حارث يوديني لأهلي
صعدتلي للدرج و جرت ايدي تنزلني .. و شيسوولج أهلج يا بنيتي ، كعدي اكليلج لكمة لا تتخربطين
كعدتني ع القنفة و اني انفجرت بالبجي و هم كلهم يباوعولي بأسف رانية و حارث و عهود و امها و اخوها و إبني المسكين مستغرب و ما يدري شنو السالفة
.. عهود تعبت و الله تعبت و گمت أخاف أخاف يسوي بية شي ، ما أريد أصير مثل الساقطات البحياته ، إذا أضل وياه راج يجرني لهيج درب مااريد أوصل لهيج رخص تعبت آني أريد اتطلك
حضنتني .. و كل عقلج يقبل يطلك
احجي و اناشغ .. اروح لأخوية و أگله و هو يشوفلي حل ، متأكدة إذا أگله مستعد يطلعنا لمحافظة ثانية بس في سبيل ما يوصولي و لا يأذوني ، أگله و هو يعرف يتصرف
مسحت دموعي .. و إبنج ريم؟
.. آخذه وياي
.. ما تگدرين ، راح يلزمج من الايد التوجعج و يأذيج
.. اشوف شلون ادبرها
.. سودة علية بنيتي شلون بيج
و شالت راسها .. حسبي الله و نعم الوكيل عليك يا زيد منو سلم من شرك ، آني و هالبنية حتى ولدك حطمتهم و ضيعتهم
كتلها .. لا و الله حسبي الله على أبوبة إلي خلاني تحت رحمة هيج إنسان لا يعرف الله و لا عبد الله
كلتها و كملت شلت ابني و التفتت لرانية جيبيلي جبة اسلامية أريد أطلع
عهود .. وين تطلعين ريم
.. لأهلي أروح وحدي إذا حارث ما يوديني
حارث حجة و چان منتجي ع القنفة .. تتندمين ريم
.. على شنو
.. إذا انفصلتي عن أبوية
.. اتندم على قلم حمرة ينكسر و ما اتندم على ابوك
