السلام عليكم..
طبعاً بنات آني اليوم ردت ما انزل بارت حداد على الكاتبة آلاء احمد ( ام غايب ) لأن هي زميلة و صديقة و الي موقف وياها بس ادري شكم وحدة راح تجيني و تگلي تتحجين بيها عزمود مر تنزلين بارت
حثل ذيج الايام من جنت اكللكم عندي ضروف و شغل و مجاي اكدر اكتب و يدخلن يگولن الي بس تتحجين علمود لا تنزلين بارت ، فكتبته و نزلته
على كل حال اريد منكم تقرولها سورة الفاتحة
و الله يرحمها و يغمد روحها الجنة و يلهم ذويها الصبر و السلوان
ـــــــــــــــــــــــــــــــــــــــــــــــــــــــــــــــ
حبيبي وداعتك تتلاگه الوجوه
و على كلشي نتحاسب وحدة وحدة
اجرحك بالعتب ما اجرحك بسيف
لأن جرح العتب محد يضمده
مو گتلك ترة هالدنيا دولاب
و اذا افترت عكس حيلك تهده
بس انت غريب و غرتك دنياك
البحر يجزر ترة شما طال مده
باچر من تضوگ الدمعة و الآه
تجي تدور محب و تريد سده
مريم ..
رجع ضياء و بيده سويچ السيارة يفر بي بس شكله حيل مكتأب ، باوعتله خالة ملوك و حچت .. شبيك يمة؟
تنهد و جاوبها .. ما بية شي بس هاي لولة فتت گلبي ما تضل يمي يومين و صاحت اريد امي ، ما شبعت منها
گالت .. هي بنية و كل بنية تميل لأمها
.. يمة بس مو هيچ ، اوديها اسبوع لو أكثر لو آني اخابرها و اسولف وياها لو ما تتذكرني و هم اذا ما اخابرها و أگللها شوكت تجين يمكن و لا تگلي تعال اخذني
.. لو تحط روحك بيها هم تضل تميل لأمها گتلك هي بنية و البنية مكانها يم امها
.. هسة وديتها و ما راح اخابر اشوفها شوكت تتذكر اكو نعال ينتضرها بالبيت و تخابر
گعد ع الدرج و مسح وجهه بكف ايده ، رفع راسه باوعلنا و گال .. تطلعون تغيرون جو؟
ريم كيفت رأساً گالت .. وين؟
حچة .. للزوراء نطلع كلنا ، الجهال طلعت روحهم من الحبسة بالبيت
كيفو الجهال ضلو يگمزون اي اخذونا نريد نروح
گلناله اي نطلع .. گال خوش لعد تحضرو علما اخابر ضرغام بلكت يجي هو و حنين و الجهال
طشينا كلنا نتحضر و نلبس و نحضر الجهال ، ريم بس لمت شعرها ذيل حصان ، گتلها .. لبسي شي براسچ لا تخليه يقلب علينا هسة
ضحكت .. حتى بوشي البس بس كون اطلع متت من الگعدة بالبيت صار خمس شهور ما طالعة
ولبست حجاب لفته لفة حلوة
و كعدت تحضر بأبنها
كملنا كلشي و نزلنا ، ضياء باوعلنا و رجع باوع لأمه .. و انتي شنو ما تجين
گالت بهدوء .. لا وين اجي روحو انتو تونسو
باوعلها بعتب .. ليش عود
.. هااا مو اني مااحب الطلعة تعرفني
