رجعني الطريق كله يرزل بية و شگد مهملة و شدعوة هالوكاحة هيج زين الموقف الحطيتيني بي و آني بالي مو يمه مكيفة لأن رجعتلي القصص وصلني لباب البيت و نتر .. يالله روحي لازم أرجع للدوام..
نزلت و اتجهت لبيت خالي ، صاح .. وين
التفتت .. لبيت خالو
هز راسه .. دروحي يالله و اني اشوفلج مدرسة
دخلت چانت ساعة ثمانية و نص الصبح بس اعرفهم يكعدون من وكت ، خالو و مرته كاعدين يتريكون و الولد طالعين
ابتسم خالو من شافني .. تعاي باباتي همزين اجيتي شعجب اليوم ماعندج دوام
كعدت يمه و اخذني جوة جنحه و حجيتله السالفة و هو ضل يضحك يكلي و لا تبطلين سوالفج
.. لعد خالو شاهين ما خابر بعد
.. و الله يا خالو هو ننتظره يخابر هسة صاير كله غباشي يحچي ويانة يكول ماعندي غير وكت ، و لا يقبل ندك عليه
مرة خالي گالت .. غير عنده شغل
.. شيشتغل خالة
.. مااعرف و الله ما يگلي
خالو گال .. همة كلهم راح يضيعون دراستهم لا التوم يكدرون يكملون و لا هذا يقبل يكمل
و كفخني .. و انتي انتبهي لدروسج لا تضلين خوثة هيج
.. اااخ خالو آني شعلية
و هو يحچي دگ تلفونه گال .. ابن الحلال بذكره
جرت التلفون من ايده مرة خالي و فتحت سبيكر و ردت بلهفة .. هاا شلونك وليدي
جاوبها .. يمة خابرت على ابوية مو عليچ
.. بس آني جاوبت
.. عندي سالفة وية أبوية أريد احچيها
.. شلون لسان زفر لا صباح الخير لا السلام عليكم
.. استغفر الله يمة و الحمزة مستعجل
.. گول شتريد أول و تالي ابوك مراح يضم علية
سمعنا صوت الطگة مال الجداحة و گال .. أريد مستمسكاتي
الهوية يمي اريد الباقيات علمود اطلع جواز سفر
مرة خالي بهت لونها ، خالي گال .. شتسوي بجواز السفر
.. اسافر طبعاً
.. شتسافر فهمني شبيك
.. يابة كلشي مابية بس اريد اطلع من العراق و لگيت طريق تهريب بري للٲردن اريد اخلص ، دزلياهن
.. و شجابك و شوداك ع التهريب انت
.. راح تدزهن لو لا
.. لا طبعاً شاهين جايز منك آني و أخليك تطلع
.. و انتو شعليكم حياتي و آني حر
.. شلون شعلينا
.. اريدهن دزلياهن لو اخابر على خالد يدزهن
.. يابة شلون نوصلهن الك و الطرق كلها مكطعة واحد يخاف يطلع لغير منطقة ينذبح عاد لغير محافظة الطرق كلها مسدودة اني لحد الآن حاير إنت شلون وصلت لهناك
سكت شوية و گال .. اجي آني آخذهن
.. و إنت تتوقع إذا وصلت يمي راح أخليك تروح مرة ثانية
.. همزين نبهتني حتى ما أرجع
و سده
خالي باوعلنا بحيرة استغفر و مسح وجهه بإيده .. راح يجيبلي آخرتي هذا الولد ، رجع دگ على خالد و گله .. خالد اسمعني زين اخوك شاهين اخاف يخابرك و يكلك دزلي مستمسكاتي بيد احد او اجيك لمكان و اخذهن منك ديربالك تنفذ لان اذا الكه ورقة ناقصة من اوراق شاهين اطيح حظك افلش مخك افتهمتني؟ جاوب افتهمت يالله هايهية الله وياك
