الما يريدك لا تريــــــــده
ابعد روحك عن اذيتــــه
باجر يسميك خايــــــــن
و هو المگابل جديـــــده
و تكبر و لو رافگو كل البشر
بالنهاية الكل يعوفـــــــــــــه
و خل اعذاره تفيـــــــــــــده
مريم ..
سد الباب و وراهم و انتجه عليه و يباوعلنا بحيرة و قهر
خالة ملوك كلتله .. شبيك ضاوي وليدي
.. يمة احس نفسي خسرت بتي بهاللحظة
.. يااا ليش هيج تحجي
.. ماادري بس احساس
و راح صعد لغرفته
امي حچت .. لوما مخليها تروح هذيج تقرة براسها
ملوك .. لعد خوما يحرمها من امها ، الطفلة متعلقة بيها
.. حيرة ، الله يكون بعونه
باوعت جهالي ثنينهم گاعديم يلعبون
صحت .. ضياء راح اروح ابيت خالي شوية
.. روحي ، بس عوفي الجهال
.. گاعدين ما تلحك أمي تركض وراهم
.. عوفيهم آني عيني عليهم
.. اوكي
لبست جبة اسلامية و حجاب و طلعت رحتلهم
فتت للبيت و أخيراً لگيتهم يسولفون و يضحكون ، گلت بنصهم .. ضحك صفر ، كلما ادخللكم مدلغمين و تبجون بوجه النبي ، و أخيراً ضحكتو و عرضتو جمال ابتسامات هوليود العدكم
گاملي خالد .. هاا ولج أم عطوب تقلدين علينا
خالي .. عوفها خالد ، تعالي بنيتي هنا يمي
رحت يمه اخذني جوة جنحه ، و خالد گال .. يابة ما شفتها شلون رزلتنا اول ما دخلت ، تحشش ام كفشة و لا نستقر مستر بين
خالي .. يروحلها فدوة مستر بين هي بس شوفتها عافية
.. يا عافية بس شوفتها ترفع الضغط
.. درووح و الله انت الي ترفع الضغط
خالد .. خل اگوم احسن ابوية تغير علية هاي هجامة البيوت مريمان ما تگعد راحة
ضليت اسولف وية خالي و مرة خالي شوية خطية كالو ليش ما جبتي الجهال ، يكيفون عليهم من اجيبهم همة عدهم بس بت خالد و مرة مخلد حبلة بولد
و وراها گمت لرفل و هي تشتغل بالمطبخ .. أگلچ واضح مستبشرين اليوم مو مثل كل مرة الكاكم كآبة شصاير شنو السبب ، ان شاء الله دوم هيج
رفعت حاجب .. و شنو السبب برأيج
.. هي مرة خالي من تضحك البيت كله يضحك
.. و مرة خالج شلون تضحك؟
ابتسمت .. هاا خابرها شاهين مو صح؟
.. اي ولج ، دك على مخلد رقم دولي جاوب كللها شاهين و هي نترت التلفون من ايده و نزلتلج تقسم لشاهين طلعت اجداده واحد واحد من الكبر حركتهم و رجعتهم ، فاتحين سبيكر و نضحك
.. و هو شگال
.. مگال شي يضحك ، بس هي خطية اعصابها محروگة تگله ساعة السودة الشفتك بيها مفرفح گلبي كل فترة رايح و كارص و ما ندري عنك خبر و تشوغ روحي يالله تخابر و تطمني و اجر النفس عساك ببزرة تفرفح گلبك مثل ما مفرفح گلبي
