عشق عقيم

البارت الثاني

وصلت للبيت فتحت الباب و دخلت  .. صحت ماما آني إجيييت ليش تأخرتي ماكو جواب..

دخلت للهول و أشوفها واگعة بالگاع ولا نفس و لا حركة متت بدمي، حركتها.. ماما ماما الله يخليچ جاوبيني..

ضربت على وجهه بهدوء ماكو ما تجاوب  ، عاد هنا طلعت بسرعة لبيت خالي و آني أصيحه خالو ماما معرف شبيها الله يخليك ساعدني  ، ابچي و أحچي..

گام خالي بهدوء بعده مكسور و صاح  .. خااالد تعال نشوف عمتك شبيها..

إجه خالد بسرعة .. ربي شنو القصة المصايب متوالية علينا هاليومين من الولد لحنان لعمتي هسة..
و طلع يركض لبيتنا
ووراه خالي إجت ريم گالت ..  شبيها ماما
جاوبتها و الدمعة معلگة بعيني  .. ماعرف..
طلعت و گالت آني أروح وياهم إنتي ضلي يم مرة خالي و ديربالچ عليها..

راحت و إلتفتت لزوجة خالي چانت گاعدة بالزاوية و متچية راسها للحايط و بس دموعها تنزل  ، تعبت من هلگد ما لطمت عليهم و زلغت بنفسها..

إخذت نفس و مسحت دموعي و گعدت يمها  ، ساعة و هي ساكتة ما حچت و حتى لمن أحچي وياها ما تجاوبني..

طلعت كتبي و گعدت أدرس الهي نفسي و بالي يم ماما مو يم الكتب ، إندگت الباب طلعت فتحته و دخلت خالتي گالت مريم إنتي هنا..
گتلها بس آني و مرة خالي..
..ليش وين البقية..
.. ماما تخربطت و طلعو خالي و مخلد و ريم أخذوها للمستشفى..
.. يااا سودة علية ، تعالي بنيتي ندخل هسة يجون و يگلولچ مابيها شي..
.. إن شاء الله..

دخلنا للبيت سلمت على مرة خالي ما ردت گلتها بمحاولة تبرير  ..ترة خالة إيمان بعدها مصدومة..

هزت راسها و جاوبتني .. إي أعرف..
و گعدت .. بالله حنان أم نص عقل ليش شمرت نفسها..

.. و الله ماأعرف يمكن مقهورة و يجوز ما فكرت،  ترة طبيعي هي توها متزوجة و حامل و فجأة يگللوها رجلچ مات  ، شيصير بحالها..

.. قابل أول وحدة رجلها يموت لو آخر وحدة  ، آني أگلچياها من الأخير هاي كتلت الطفل خافت نلزمها منه..

.. شلون يعني..

.. گلتلك هذا الطفل يجي للدنيا لو ياخذو مني لو يجبروني اتزوج واحد من اخوان عبد الله حتى يضل الطفل جوة جناحهم  ، خلصت منه..

.. ماعرف و الله يا خالة  ، بس تعرفين خالو أسعد ما عنده هاي التقاليد  و لا يهتملها..

.. على كل حال صار الي صار گومي خل نرتب البيت..

گمت وياها تشتغل و أساعدها مابقت شغلة ما سوتها نفضت البيت من فوگ ليجوة شلون عدهها حيل..

شوية و إتصلت ريم طمنتني على ماما گالت إن شاء الله بالليل يطلعوها من المستشفى بس گلبها ضعيف و تحتاج راحة أكثر..

سديت التلفون خالتي سألتني .. ها شلونها أمچ..
.. گالت بالليل يطلعوها.
.. ليش تخربطت
.. گلبها ضعيف..
.. ياربي رحمتك بينا..