هاك أخذ جرحك بعد ما أشتهيك
وكلمة انه اهواك تحچيها
وبس أوخر عنك اسنينك تطيح
اسنين عمرك .. عمري لمتجيها
ابگـاع خدينك أنه العاكس ضواي
آبمعنى آخر ........ انه لمحليها
ذكرياتك صارن ... الطف ويزيد
حيل اكرهك من يمر طاريها
مريم ..
نغيتها .. رناوي شبيج حبيبتي
جان تحضني و تنفجر بالبجي باعلى صوتها اريد اسكتها افتهم منها و هي تبجي بحركة
.. شبيج غير تفهميني
و هي بس مفرفحة بجي ما تجاوب
وخرتها لزمت ايدها من معصمها جان تصرخ
تفاجأت ، شلت ردن ملابسها و أشوف آثار حرك جديد
إنصدمت بيها ، حتى الجلد مشلوع يعني حرك قوي
.. شنو هذا الحرك ؟ رنا هاي شلون هيج صار بيج
و ارجع اباوع لإيدها مال حديدة حامية مو مال طباخ لو شي
ضياء هيج مسوي بيج؟ رناا
اباوعلها العيون حمر و مورمات من البجي و الوجه ذبلان
جريتها و دخلت للبيت اباوع للإستقبال لكيته كاعد وعينه بالفايلات يشتغل ، عفتها و دخلت يمه
شال عيني باوعلي و إبتسم .. هلا
كام حضنني و باس راسي و آني جامدة .. ضياء هاي ليــش هيج مسوي برنا ، ليــش حارك ايدها
لبتعد و باوعلي بملل .. شكتلج اول ما طبيتي
.. لا و الله ڪلشي ما كالت بس اني حجيت وياها و شفتها
ليــش هيج و الله حرام عليك ما مكفي تضربها انوب وصلت لمرحلة الحرك ، شبيك تخبلت
ابتسمت باستهزاء .. بس حرك؟ لا تستغربين اذا اجيتي فد يوم و لكيتيني ذابحها و خلصان من شرها
صحت .. و ليييش هيج ليــش مو بشر هاي مو بتك تشوفك هيج تسوي بأمها راح تكرهك ، اذا موعلمودها علمود بتك
جان تدخل خالة ملوك و تحرك بالكرسي بالجوة و كالت .. حجيت يمة مريم حجيت لمن وكعت وصلة من لساني و اخوج هذا ما يفيد بي ربالي كلب بصف كلبي
نحجي و رنا واكفة تباوعلنا بباب الاستقبال و لارين مجلبة بملابسها و ايدها بحلكها و تباوع بخوف
كتله .. ضياء مو وضعية هلي اللي جاي تسويه بمرته اجرام و حرام عليك ، اصلاً ماڪو داعي تصلي ؏ اللي جاي تسويه بيها ، اذا متريدها عليش مبقيها طلكها
التفتت عليها يباوعلها بطرف عينه .. تريدين تطلكين؟
ما جاوبت و عينها تنتقل بيناتنا بخوف
زمخ بيها .. احجي وين لسانج هاي كدامهم اذا تريدين تطلكين الله وياج و حقوقج كاملة
ضلت ساكتة ، رجع باوعلي .. شفتي ؟
مريم .. رنا احجي شبيج ساكتة؟
ما جاوبتني دنكت شالت بتها و صعدت
كعدت اباوع لضياء باستغراب شبيهم ذولة تخبلو
ضياء .. شفتي هسة؟ هي ما تريد تتطلك لا تتدخلون بيناتنا بعد و لا تدوخون روسكم و لا شي خلوها على راس بتها
ملوك .. بس بشرفك هذا الي جاي تسويه بيها يصير؟
هز راسه .. اي يصير
و عافنا و طلع
التفتتلي خالة ملوك .. عوفي يمة حجيت هواي و هذيج رنيوة تجي تشكي و تحجي و هو ابني بس جاي اشوفه يظلمها ، اكللها عوفي و اتطلكي تكلي لا ما اتطلك شسويلها
و من اسٲلهم على سبب المشكلة لا هي تحجي و لا هو ثنينهم قافلين ، حجيت و حاولت لمن مليت عفتهم بٲسهم بينهم شسويلهم
