شجاك ارحلت عني بساع و مشيت
و حتى بالجذب ما كلتلي راحل
مو حتى السفينة كبل متروح
تصيح لناسها و تحضن الساحل
و حتى الشمس من تروح ع الكيف
ما ترحل غفل ترحل مراحل
و محطات الخلك تصعد قطارات
شجاك اول محطة و صحت نازل
ريم ..
ضليت مسوية روحي دايخة بحارث وياه و حايرة لمن كام نام ، و اباوعله حاضن المخدة و الدمعة بعينه
سديت الباب عليه بالغرفة و طلعت ، اخابر حارث اشوفه وين صار شنو اخباره لان زيد متاكد اني اعرف مكانه و راح يضل وراية
صعدت بغرفته فوك و عفت أيمن يلعب جوة و گتله بس يگعد ابوك اصعدلي بدون ما تسوي هوسة و كعدت دكيت عليه مرتين و الثالثة و الرابعة ، الخامسة يالله جاوبتني بنية بصوت ناعم .. الوو
.. هلو حبيبتي ، مروة مو؟
.. اي نعم بس منو وياي
.. حارث موجود ؟ انطينياه بلا زحمة
تغيرت نبرتها .. انتي منو و شتريدين منه؟
.. هاي شبيج اعصابج ، مرة ابوه
.. هااا اعتذر ، هسة اصيحه
صوتها ابتعد و اسمعها تحجي وياه .. حروثة حياتي ، حاارث كوم اكعد صارلك ١٢ ساعة نايم ، گوم حارث يريدوك ع التلفون حروثي دگوم ادري نايم لو ميت دگووووم
آني ٱسمعها و اضحك وين يالله سمعت صوته .. هاااا يعني واحد ما ينام بهالبيت ما يرتاح ، كلما انام عشر دقايق تجيني مثل عزرائيل تگعديني من النوم
.. يااااا هاي آني صرت مثل عزرائيل؟ دروح بعد ولا أحاچيك و انطح راسك بالحايط
.. لا لا چنت اشاقة وياچ حبي شبيج ما تتحملين شقة مروش ميمي ، حياتي انتي ، و الحمزة اشاقة
.. روح جاوب مرة ابوك ع التلفون و بعدين نتفاهم
اشوية و جاني صوته .. هااا ريم الزركة شذكرج بية
.. انلصم غير انت مرتاح و اني ياكلون بكلبي امك و ابوك ثنينهم يسألوني وينه ، إنت مرتاح و آني ياكلون بگلبي
.. لا امي گوليلها خطية بس أبوية لا
.. هسة گلي انت شخبارك شلون صفت أمورك ، سولفلي
.. إنتي وين گاعدة ، ابوية يمج؟
.. بغرفتك ، لا مو يمي
.. شوفي ، آني من طلعت من يمج بنفس الليلة تواعدت وية مروة انو اوصل ساعة بـ ٤ تكون متحضرة تطلعلي ، و صدك وصلت هناك لگيتها واگفة و بس محضرة جنطة اساسيات ، اخذتها و طلعت رحت لبيت واحد صاحبي عمه شيخ ضلينا للصبح اجة و عقدلنا
و وراها طلعنا للمطار جنت مسوي ڤيزة سريعة و على اقرب طيارة للسويد
.. خوش مغامرة ، و هسة وين كاعدين منيلكم مصرف
.. من وصلنا ذبينا الجوازات و تعاملوا ويانة على انو لاجئين و جاي يصرفولنا راتب علما نلگى شغل و الشقة الگاعدين بيها صغيرة على كدنا بس حلوة مرتبة و المنظر يخبل من الشباك
