لبثت صامتاً..
لم أكن أفكر في شيء
كنت أحاول أن اتلاشى في العدم
فلا أسمع شيئاً و لا أحس بشيء
مريم ..
.. شنو هذا ؟
.. فتحي و شوفي شنو هذا
عكدت حاجبي و دنكت عيني منه عليه اسم و رقم و عنوان دكتور او عيادة ، فتحته
مجموعة اوراق و تحاليل و فحوصات طبية مااعرف اقراهن كلش بس افتهم يعني ، اباوع بيهن و هو اجه كعد يمي
قريتهن و بلعت ريك .. هسة شنو هاي؟؟
.. تستغبين
.. لا و الله مفتهمت
اخذهن من ايدي تنفس بعمق و مسح وجهه بيده متوتر حيل .. مريم آني عقيم
رجعت اباوع بيهن مصدومة و ضاعت كل الكلمات مني حتى ردة فعلي ماادري شنو هي
اخذت دقايق ساكتة و بس اكلب بالأوراق و هو كال .. احجي شي شبيج
.. مااعرف شحجي
ما جاوبني معالم وجهه جانت ترسم شدايحس بداخله ، كلت .. شاهين اصلاً آني ما أريد طفل
همس .. بس آني أريد
.. شلك بدوخة الراس
.. إنتي صار عندج أطفال و عشتي الأمومة و ربيتيهم بس آني ما عشت آني أريد طفل
ضليت ساكته و هو يباوعلي بعين ذابلة .. يكلي نسبة العقم ١٠٠ يعني لو تحاول منا لعشر سنين على علاج لو يصير لو ميصير
.. شاهين كوومة ناس سواء نسوان او زلم طلع عدهم عقم و تأخرت خلفتهم بس تعالجو و صار عدهم مو شي مستحيل شبيك هيج مكسور ، الطب تطور و اكو الف طريقة علاج و علاج
هز راسه .. اي هاي وية ذني الالف طريقة و طريقة لو يصير لو ميصير اضل آني انتظر لشوكت اضل عايش و انتظر تشوف طفلي و اخليه بحضني
.. شاهين إنت أصلاً شوكت رحت سويت ذني الفحوصات كلهن و ليش وحدك و ليش مكتلي
.. ترة هي واضحة صار فوك السنة ما صار طفل و انتي عندج اطفال قبل اذاً الخلل مني رحت بس اتأكد
.. لا تفكر بالموضوع عوفه هسة
.. آني ليش لازم الله يبتليني بصلبي
.. شااهين انته كلتها ابتلاء يعني اختبار كل انسان الله يختبر صبره
.. و آني قليل صبر راح افشل بهذا الاختبار
.. لا تحجي هيج
.. أريد طفل آني أريد بنية
بعدني ما حاجية شي شال التحفية الي على الكومدي يم ايده و ركعها بالكاع تفلشت ، و كام يكسر بالغراض شي ورا شي يتحرك بعصبية و آني بس أباوعله فلش الغرفة كلها ما بقى شي على حاله حتى الكنتور جانت واجهته مرايات كسرها بيده و ضلت تصب دم
