يا گـبـر اليلمك گـلي يا تابوت ؟
يادمعه العليك الخاطر اتجبره ؟
اسمك بالكبر ميفوت ادفنك وين
اذا دخلته يطلع كم حرف بره
چنت ويا اصدقائك خيط وابره اتصير
تخيطلهم مواقف لو شفت ثغره
واصد لجنازتك امك وكم مفجوع
موجودين بس ووجوهم صفره
العليهم هونت روحك فلا يسوون
گبل لتموت ماتت بيهم العشره
الگبر مو مالتك مال اليدفعك بي
تدگ الباب حتى ابطبة الحفره
ابمكانك لو متت يمكن اهواي ارتاح
يل ارتاحيت ابشرك ما شفت گطره
يطلع كم ضلع من اهد عبره اعليك
النفس من يدخل اگعد ساعه انتظره
كلشي ابغيبتك يوجعني حتى الشوف
على بدلت زواجك تكتل النظره
اذا تاخذ الصوتي صوره تلگه اكبور
امن اسولف بيك تطلع جثه بالنبره
دمعت امك عليك ابطول نهر النيل
واضافرها اعله موتك حفرت المجره
صارت ناي امك بالشكل والصوت
من اتسولف عليك الحايط اتكسره
من اتشوف اصدقائك تگعد اسبوعين
امك بالفراش وضيمها اشكبره
متت مره انته وادري ابموتك ارتاحيت
يذكروك وتموت امك الف مره
عفت مو بس مواقف ذكرى حلوه وياي
الف رحمة اعله روحك توجع الذكرى
احسك ما متت سفره اطلعت بس وين
عالفردوس گلي اشلونها السفره ؟
ضرغام..
ليلة الخميس ٢٠١٦/٩/٩
ڪلشي ﭼـان هادئ ، ليلة السما بيها صافية و الهوا صاير نسيم خفيف بارد يداعب الوجوه و يروح ، ﭼـان المعنى الحقيقي لكلمة " الهدوء قبل العاصفة "
و كالعادة بعد يوم متعب نلتم وي صحباننا حول النار و نحجي ع الٲهوال الشفناها بيومنا نتشاكى الصعاب بحياتنا ڪل واحد بينا عنده قصة تختلف عن الآخر و نذكر احبابنا المشتاقيلهم ٳلي عفناهم و اجينا علمود ندافع عن الوطن..
مع كل التعب و المصايب الي نشوفها اصدقائنا الي يستشهدون يومية كدامنا و الينجرحون ، تضل ارواحنا تميل للضحك و نكسر كل احزاننا بالشقى و نسوي نفسنا فرحانين
بدايات الليل ﭼـان يزينها صوت عزف سمبل (الله يرحمه) ؏ العود و صوته الريفي و هو يغني مواويل عن الغربة ٲو الحزن ، صوته ﭼـان شي ٲساسي بٲيمانا بالجبهة..
لمن نلتم كلنا و نختار نوع الٲغنية ٳلي يغنيها و هو يبدي يغني و ٲصابعه تتراقص ع ٲوتار العود و ٳحنا نسمع و كلمن يستذكر الحبيبة ٳلي عافها تنتضره او الزوجة ٳلي عافها تبجي ٲو حتى الٲم ٳلي عافها تدعيله..
و بهاي اللمة مثل العادة ﭼـان يغني..
( يا زلف يتغاوى وي الليل بأطراف الگصيبة هاك روحي الما غفت و الطيف ما مره حبيبه )
شاعلين النار بالنص و ملتفين عليها نسمعله و ضياء وحد عننا و لا يلتم ويانا و كلمن بينا يسواف قصته و قصة حبه
التفتت و آني ٲباوعله بغير عالم عبالك ما گاعد ويانا نايم على ضهره و عينه ع السما و يدخن
باوعو الشباب على اتجاه نظرتي و صاح قاسم .. ضياااء تدري نسيناك عبالك مو ويانا ليــش متحجي
