شما اقرب عليك..
اتزيد حسراتك...
اذا خايف احرجك..
گلي ليش اتخاف...؟
ماريد آنه اصبح .. سبب مأساتك..
احسب للطريق ، وشوف دربك زين..
بس آنه اعتقد .. حاسب حساباتك..
مرات اني اشوفك..
قمه بالاشواگ..
ومرات احس گلبك..
عكس نظراتك..!!
مريم ..
ضليت بملابسي گعدت بالگاع يم سرير جهال و تجيت راسي عليه و غفيت انتظره
گعدني محمد .. گومي سويلي لگمة اتزقنب راح اجوع
نترت .. مو ما يعجبك طبخي
.. دنجبي و كومي سويلي شي آكله يالله
گمت بملل باوعت شعندي بالثلاجة و التفتتله .. تاكل طماطة مكلية و لحم؟
صاح .. اي شي اتسممه
گلت بگلبي عساك بسم صدگ ان شاء الله
طلعت طماطة و لحم مثروم و كطعت بصل و حمستهن و سويتله صينية و حطيتها .. يالله تعال اكل
كعد ياكل و يكلي .. عود من تنزلين يم اهلي لا تضلين تدكين سوالف تعلمي منهن شلون يطبخن شوية شلون يشتغلن ، تضلين هيج ما بيج حظ انتي
تنهدت و ما جاوبته
رجع گال .. بعد ماكو دوام
.. لنفترض بطلت ، بعد المصرف شلون يكفي؟ بعد لا يكفينا ملابس و لا طبيب و لا اي شي شلون تدبرها وحدك
.. انتي حقج مني كل سنة دشداشة بالصيف و دشداشة بالشتا ، غيرها مالج حق
.. زين اني اذا اني اقتنعت بدشداشتين كل سنة ، و جهالك؟ مصرفهم و مستلزماتهم شلون؟
.. يعيشون بالموجود
.. زين ليش لازم نحرمهم هيج اذا احنا نكدر نوفرلهم مستوى عيشة اعلى ، انت هسة شنو مشكلتك وية وضيفتي؟
رفع كتفه و نزله بعناد و اني ما حجيت بعد
كمل و دفع الصينية برجله
حجيت .. ليش هيج مو حرام نعمة الله شيسوي بيك الله بعد
خزرني .. انتبهي لكلامج وياية لج
ما حجيت شي بعد بس شلت الصينية و صفيت المطبخ و رجعت نمت يم جهالي
فزيت على صوت تلفوني ، ضياء .. يالله نزليلي بالباب آني
باوعت للساعة .. بعد وكت لدوامك
.. اي غير خابرتيني ما بقيتي عقل براسي اجيتج قبل لا يخلص الدوام ، يالله نزليلي بسرعة
سديته و گمت محمد نايم ، نغيته .. محمد آني راح اروح لبيت اهلي ، ضياء اجة علية
حچة بنعس .. وليلهم شسويلچ
عفته گلت اعوف الجهال هنا يشلعون گلبه يومين ما شلتهم ، طلعت داانزل الدرج بعدني بنصه گلبي ما انطاني اعوفهم و اطلع خاف يتأذون خاف يصير بيهم شي خفت
