Bachelor's Pad book 5: Mr Hotshot (Ryan Decena)

Part 40

WALANG pasyente si Tito Basil nang dumating sila sa ospital. Tinanong si Jesilyn ng kanyang ama sa huling pagkakataon kung gusto niyang samahan siya nito pero tumanggi siya.

"Bumalik ka na sa trabaho, Papa. I'm sure, masyado ko nang naistorbo ang schedule mo ngayong araw," nakangiting taboy niya.

Niyakap siya nito bago naglakad palayo. Huminga siya nang malalim bago pumasok sa silid na kinaroroonan ni Tito Basil.

"Jesi, hija! Sa wakas, nagpakita ka rin sa akin. May nalampasan ka nang schedule ng checkup mo. Come, sit down," nakangiting bati ng matandang doktor.

Nakaramdam ng guilt si Jesilyn dahil hindi magandang balita ang hatid niya. Pero tumalima siya at umupo. "Tito, actually hindi checkup ang dahilan kung bakit ako nagpunta rito," lakas-loob na sabi niya.

Bahagyang umangat ang mga kilay nito. "Then what is it?"

Huminga siya nang malalim. "Gusto ko pong ipaalam na... hiwalay na kami ni Apolinario."

Bumakas ang pagkagulat sa mukha ni Tito Basil at matagal na hindi nakasagot. "Why?" usal nito nang makabawi.

Pinagsalikop ni Jesilyn ang mga kamay at sinabi kay Tito Basil ang mga sinabi na rin niya sa kanyang mga magulang. Tahimik lamang itong nakinig hanggang matapos siyang magsalita. Sa huli ay nalaglag ang mga balikat nito at humugot ng malalim na hininga.

"Well, kami man ang mga magulang ninyo, hindi namin madidiktahan ang mga puso ninyo. At kung nakapagdesisyon na kayo ay wala na kaming magagawa kundi ang irespeto 'yon." Pagkatapos ay mabait na ngumiti si Tito Basil at ginagap ang kamay niya. "Don't look like you are about to cry, Jesi. You did the right thing. Kami ng papa mo, minahal namin nang husto ang mga babaeng napangasawa namin. At masakit mang sabihin para sa akin ay hindi ko nakita kay Apolinario ang tulad ng kislap sa mga mata namin ng iyong ama kapag kasama namin ang mga napangasawa namin. Akala ko lang, ikaw ang magtuturo sa anak ko kung paano magmahal. Mukhang mali ako. I just hope na kahit hindi na kayo magkarelasyon ay maging magkaibigan pa rin kayo. At huwag mong babaguhin ang pakitungo mo sa akin, kung hindi magagalit ako sa iyo," pabiro pang dugtong nito.

Gumanti ng ngiti si Jesilyn sa kabila ng pag-iinit ng kanyang mga mata. "Thank you, Tito. And sorry po talaga na binigo ko ang expectations ninyo."

Bumuga ng hangin si Tito Basil at tumayo. "Huwag mo na 'yong intindihin. Anyway, nandito ka na rin ay gawin na natin ang checkup mo. You are doing okay these past months."

Nawala ang ngiti niya sa sinabi ni Tito Basil. Nahalata niya na pilit lamang nitong pinasigla ang tinig. Nagdesisyon siyang tigilan na ang pagkukunwari na hindi niya alam ang totoo. "Tito, stop lying to me," mahinang sabi niya.

Natigilan ito at napatingin sa kanya. "Ano?"

Malungkot siyang ngumiti. "Alam ko na hindi okay ang resulta ng checkups ko. Kasi hindi n'yo ipinapakita sa akin at sina Papa lamang ang kinakausap n'yo. Matanda na ako, Tito. May karapatan na akong marinig mula sa cardiologist ko ang totoo kong kalagayan. Sabihin n'yo sa akin ang tunay na resulta ng mga test ko, please?" seryosong pakiusap niya.

Humugot ng malalim na hininga si Tito Basil at muling umupo paharap sa kanya. Seryoso na ang ekspresyon sa mukha nito. "Fine. Sinabi ko rin sa mga magulang mo na dapat ay sabihin namin sa iyo pero gusto sana nilang sila ang magsabi. But I will tell you." May binuksang cabinet ang doktor at kinuha ang makapal na folder na alam ni Jesilyn na naglalaman ng mga record niya sa mga nakaraang taon. Binuklat nito iyon at muling huminga nang malalim bago tumingin sa kanya.

"Hindi ba sinabi ko na sa iyo noon na kahit naoperahan ka noong bata ka pa ay posible pa ring bumalik ang heart defect mo habang tumatanda ka? At kung hindi naman, dahil nagalaw na ang puso mo ay may posibilidad na magkaroon ng ibang komplikasyon sa puso mo sa paglipas ng mga taon?"

"Opo," sagot ni Jesilyn.

"Well, for the past months, based on your lab tests, you have been suffering from heart muscle abnormalities and swelling. Iyon ang dahilan kung bakit minsan ay inaatake ka ng abnormal na pagbilis ng tibok ng puso. Madadaan pa naman iyon sa gamutan kung makikita kong mapanganib na para sa iyo. But for the past months I haven't given you any strong medications. Puro vitamins lang dahil under observation pa rin naman ang kalagayan mo. Basta kailangan mong umiwas sa mga trigger like extreme stress para hindi lumala. Dahil kapag lalong lumala ang abnormalidad ng heart muscles mo at hindi madaan sa mga gamot ay kakailanganin mong sumailalim uli sa surgery. The worst thing that could happen is..." Hindi naituloy ni Tito Basil ang sasabihin.

Kumuyom ang mga kamay ni Jesilyn at may bumikig sa kanyang lalamunan. "I know," bulong niya. "Heart failure, right?"

Naging matiim ang ekspresyon sa mukha nito. "Well, it's always a possibility for someone who has had congenital heart disease since birth. Pero hindi mauuwi sa ganoon ang lahat habang ako ang doktor mo, Jesilyn. We will do everything to make your heart normal again."

Malungkot siyang ngumiti. "Salamat, Tito. Pero alam natin na bata pa lang ako ay hindi na normal ang puso ko. But I'm still glad that you are my doctor. I was able to live my life as normally as I could."

Mahabang katahimikan ang namayani bago muling huminga nang malalim si Tito Basil at tumayo na. "Well, that's my job. Besides, parang anak na rin kita kahit hindi kayo magkatuluyan ni Apolinario. Kaya siyempre gagawin ko ang lahat para maging malusog ka. Come on, let's do your checkup."

Napakasuwerte niya at mga katulad ng kanyang mga magulang at ni Tito Basil ang matatandang nakapalibot sa kanya. Lumaki siyang may pagmamahal at pag-intindi. Even when she failed their expectations, they still accepted her.

Huminga siya nang malalim at nahihiyang ngumiti. "Okay."