ANG NABUNTIS KONG PANGIT (free/completed)

Part 38

"Ano'ng tinitingin mo?" nakairap na tanong ni Yolly kay Andy. Paano'y kung makatingin kasi ang binata sa kanya ay wagas. Pababa at pataas pa kaya nainis siya ulit dito.

"Wala. Hinuhulaan ko lang kung 'yung red na undies ba ang isinuot mo o iba. Meron ka palang gano'n, ha? Savage," pang-aasar na nga ni Andy sa kanya.

"Tse!" naniningkit ang mga matang angil niya rito. Pero deep inside ay nahihiya pa rin siya talaga. Kainis naman kasi ang p*nty na iyon, epal! Grrr!

"Hahaha!" Ang lutong na naman ng naging tawa ni Andy.

Uupakan na sana niya ito. Ang lakas mang-asar, eh, pero biglang lumabas na kasi ang nanay niya.

"Mga anak, ito na ang baon niyo." Dala ni Aling Yolanda ang mga baunan nila na nakalagay sa paper bag.

"'Nay, hindi ka na dapat nag-abala," sabi ni Andy sabay kuha sa paper bag.

"Naku, lagi ko 'yang ginagawa kay Yolly. Para makatipid," sabi rin ni Aling Yolanda.

Seryoso ang mukhang napatingin si Andy kay Yolly. Kaya pala hindi niya madalas nakikita si Yolly sa school canteen o sa café dahil may baon pala ito lagi. Saan kaya ito kumakain? Ah, baka sa loob ng classroom na rin.

"Sige na, sige na. Umalis na kayo para hindi kayo ma-late."

"Sige po, 'Nay." Humalik muna si Yolly kay Aling Yolanda.

Ginaya iyon ni Andy na ikinatuwa ni Aling Yolanda, na ikinaismid naman niya. Nakiki-nanay na nga, nakiki-kiss pa. Abusado, ah?

"Sige na. Ingat kayo, mga anak."

Naunang lumakad na si Yolly. Nga lang ay napatanga sina Aling Yolanda at Andy nang tuloy-tuloy na lumabas ito ng gate.

"Wait lang, 'Nay." Naibalik tuloy ni Andy ang baon nila kay Aling Yolanda. Madaling hinabol niya si Yolly, at suwerte dahil napigilan niya ito sa braso nang akmang sasakay na ang dalaga sa jeep.

"Ano ba?!" angil ni Yolly.

"Where you going?" Salubong ang kilay ni Andy habang hawak sa braso ang dalaga.

"Papasok na sa school. Sa'n pa ba?" sarkastikong sagot naman ni Yolly.

"Eh, 'di sabay na tayo. I have my car."

"Sorry, pero ayoko pa lang dumikit sa 'yo. Kaya ko pala ang sarili ko." Totoo 'yon, habang kinukuha ni Yolly ang tulog niya kagabi ay nag-isip siya. At naisip niya na mas baka mapapahamak lang pala sila ng anak niya kung didikit siya kay Andy.

"What? Hindi ba't may napag-usapan na tayo kagabi?" Dismayado ang boses ni Andy. Umasa kasi siya, umasa siya na pagkakatiwalaan ulit siya ng dalaga, kaso hindi pala. Nakakasakit ng damdamin.

"Binabawi ko na. Kung gusto mong mag-aral, mag-aral ka at gano'n din ako pero mag-aaral ako na hindi ko kailangan ang tulong mo."

"You're crazy! Ang labo mo talagang kausap!"

Sumabad ang driver ng jeep sa usapan nila. "Hoy, sasakay ba kayo o hindi?!"

Nahiya si Yolly dahil pati mga pasahero ay masama na ang tingin sa kanila. "O-opo. Sasakay po ako," sagot niya sabay bawi sa braso niyang hawak ni Andy. Walang anumang sumakay na siya sa jeep.

Kaso ay sumunod si Andy. Tabi sila ng upuan.

Sinamaan niya ito ng tingin, pinapababa niya, pero iniwas ni Andy ang mga mata. Pasimpleng patingin-tingin sa kung saan-saan.

Pati si Aling Yolanda na nakatingin sa kanila ay nagulat dahil parehas silang sumakay na at hindi na nakuha 'yong baon nila.

"'Tong baon niyo!" sigaw ng ginang ngunit hindi na ito narinig ng dalawa.