ANG NABUNTIS KONG PANGIT (free/completed)

Part 38

"Ano'ng ginagawa mo?! Bumaba ka nga!" pabulong na singhal ni Yolly kay Andy pero dedma pa rin si Andy sa kanya. Sa halip ay umayos pa nga ito ng pagkakaupo. Sumiksik pa ito sa kanya nang may sumakay pang pasahero.

"Ano ba?!" angil niya rito dahil panay ang siksik sa kanya.

"Masikip, eh," mahinang reklamo ni Andy.

Inirapan niya ito ng pagkasama-sama. Sana nga nakakamatay ang masamang tingin nang mawala ito sa landas niya. Hindi na nakakatuwa, eh.

Nag-peace sign sa kanya si Andy habang nagpapa-cute.

Tss. Kaysa patulan pa ito ay ibinuntong-hininga na lang niya ang inis. Hinayaan na lang niya ito dahil nakatingin na naman sa kanila ang mga kapwa nila pasahero. Parang mga nagtataka sa kanilang kulitan o bangayan.

Kinalikot na lang niya ang bag niya. Kukuha sana siya ng pamasahe, kaya lang ay inunahan siya ni Andy.

"Dalawa po kami diyan." Agad na may inabot si Andy na pera sa konduktor ng jeep.

Nga lang isang malutong na isang libo iyon. "Boss, maaga pa, wala pa kaming pambarya rito. Barya lang po sa umaga," kaya sabi ng konduktor. Ibinalik ang pera kay Andy.

"Pero ito lang po ang cash ko," maang na katwiran ni Andy. "Credit or debit card? Tumatanggap po kayo?"

Tinginan na naman ang pasahero sa kanila.

Nagtakip na talaga ng mukha si Yolly. Hiyang-hiya siya sa pinagagawa ni Andy. Ano'ng akala nito sa jeep may pang-swipe? Naku naman talaga!

Bahagyang siniko na siya nito. Nagpapatulong na. Nagmamagaling kasi, eh!

"Wala akong barya," bulong sa kanya ni Andy. Ibinibigay sa kanya iyong isang libo.

Wala na naman siyang choice kahit labag man sa kalooban niya. "Kuya, dalawa na kami rito," sabi na niya sa konduktor. Inabot niya ang bente pesos dahil walong peso lang naman ang pamasahe.

Nahihiya na ibinalik ni Andy ang pera nito sa wallet nito. Pangisi-ngisi na lang ito sa kanya. Pahiya pa more.

Hindi nagtagal at kapansin-pansin na pawisan na si Andy. Namumutla na rin ito at paminsan-minsan ay napapaubo dahil sa alikabok at usok ng mga sasakyan. Halatang hindi talaga sanay sa pampublikong sasakyan. Pero kapag titingnan naman niya ito ay pinipilit nitong ngumiti.

"Okay ka lang?" Kahit paano ay nag-alala na si Yolly para rito. Namumutla na kasi ang binata.

"Yeah. I'm fine," pagsisinungaling ni Andy kahit na napapabuga na ito. Kinakapos na ito ng hangin. Hindi na masyado makahinga at parang masusuka pa.

Mabuti na lang at nakarating pa sila sa Sanchi College na buhay ang binata. Umabot ng buhay.

"Hoh!" Nakahinga nang maluwag si Andy nang bumaba na sila sa jeep.

Tiningnan niya ito nang masama. "Alam mo ang arte mo?"

"I'm just not used to commuting," paghingi ng dispensa ni Andy. Okay naman ang pagsakay sa jeep. Para sa kanya ay enjoy nga, eh. Ang kaso hindi lang niya talaga nakayanan ay ang halu-halong amoy na nalanghap niya.

"Sabagay lagi ka kasing naka-kotse at naka-motor. Sana all," ani Yolly.

"First time, eh. Pero siguro sa mga susunod kayang-kaya na."

"Wala nang susunod. Ayokong mag-alaga ng taong mahina ang sikmura sa jeep," nakairap namang sabi ni Yolly. Pero in fairness, ang cute pa rin ni Andy tingnan kahit nahihirapan ang hitsura nito. Mas gumawapo pa nga sa wet look nito gawa ng pawis. Kung siya 'yon siguro nagmukha siyang ginahasa ng maligno. Nasa'n ang hustisya? Pfft!

"Let's go. Late na tayo." Nauna nang lumakad si Andy.

Bumuntong-hininga naman siya bago sumunod. Nakabuntot siya sa likod ni Andy. Ang hitsura niya'y parang may tinataguan.

"What on earth are you doing? Bodyguard ba kita at nandiyan ka sa likod ko?" pansin sa kanya ni Andy.

"Hayaan mo na ako. Lumakad ka lang," halos pabulong sa sabi niya rito.

At tulad ng inaasahan nila, hayan na nga ang mga matang mapanghusga. Isa-isa nang tumingin sa dako nila.

Kinabahan si Yolly. Kakayanin ba niya ito? Juskolord!

Nang biglang inakbayan siya ni Andy. Natigil siya dahil imbis na kiligin ay parang sinikmuran siya nang wala sa oras sa kanyang pakiramdam. Napatingin siya sa kamay ni Andy na nasa balikat niya.

"Ako na ang nakikiusap sa 'yo, Yolly. Stay close to me for the sake of our baby. Isipin mo lagi na safe siya kapag kasama mo ako lagi," pakiusap ni Andy sa kanya na hindi tumitingin.

Dahan-dahan ay sa guwapong mukha naman ni Andy napatingin si Yolly. At nakita niya na balik maangas na ang hitsura nito. Nakataas ang noo, seryoso at astig. Ang mga mata nito'y parang kakain na naman ng buhay sakaling masaktan siya o ang anak nila.