بعد نص ساعه طلعوا جود وسلطان من عنده وضلت رهف كمرافق معه
لف عليها عبدالرحمن بعد ما طلعوا : شفيك؟
رفعت انظارها له بعد ماجلست بجنبه : وش فيني؟
عبدالرحمن : هاديه وكثير..ما سمعت صوتك ابد
ناظرته لثواني وماحست الا بدموعها الي نزلت بغزاره، سحبها لحضنه وهو فعلا استنكر بكائها بالشكل المخيف هذا..شهقتها يسمعها بصوت عالي، ماكان يسمع منها الا بعض التمتمات، تركها لين هدت شوي ثم نطق : الحين صدق فيك شيء
رهف بهدوء : ب.بس كنت خايفه..
عبدالرحمن : خايف من؟
رهف : اني افقدك..
ناظرها بأبتسامه خفيفه : وهذاني موجود..الحين تحسين انك بخير؟
رهف بابتسامه خفيفه : مصدعه شوي بس..
عبدالرحمن : تنامين لك شوي؟
رهف : لا لا ما يحتاج، تبي تأكل شيء؟
عبدالرحمن : جيبي لي اي شيء معك
رهف : طيب
قامت رهف وسحبت شنطتها معها وطلعت، تمشي بالاسياب ولا تدري وش فيها؟ استنكرت سؤاله وكثيير..ليش كانت هاديه عنده؟ قبل تدخل كانت تسولف عند الجوهره بالي صار، ليش عنده كانت ساكنه ومانطقت الا القليل، من وصلت للكافتيريا طلبت لها قهوه وجابت له ساندويتش ورجعت للغرفه
دخلت الغرفه وسكرت الباب، حطت الاكل على طاوله السرير وتقدمت منه تساعده يجلس وقربت له الطاوله، جلست بالكرسي مكانها وفكت النقاب وتركته على جنب
عبدالرحمن : قولي لي وش الي صار..
رهف : ليش تبي تعرف مني؟
عبدالرحمن : مافي الا انتي هنا، سولفي علي بما اننا مارح ننام
رهف بأبتسامه : طيب من وين تبيني ابدا؟
عبدالرحمن بأبتسامه خفيفه : من وصلتو للمستشفى وش الي صار؟
بدت تحكي له عن الي صار وهي تحاول تذكر له كل شيء بالتفصيل الممل، لان ماعندهم اي حديث غير هالموضوع..سردت له الاحداث لحد ماوصلت ان الدكتور بلغهم بوفاته استوقفها
عبدالرحمن : خفتي؟
رهف بذهول : اكيد بخاف تستهبل؟
عبدالرحمن بأبتسامه : ايوه كملي
رهف : يعني تخيل جود تتلفت على ابوك وسلطان تنتظر واحد منهم يقول لها ان الدكتور يكذب او ان في غلط بالموضوع، انا اناظر جود وهي قاعده تأكد لي الي سمعته يعني كنت احسب اني سامعه غلط ولا شيء
عبدالرحمن : اوف اوف كل هذا؟
رهف : والله الوضع كان يخوف مره، حتى الجد محمد ضغطه مره نازل ومره مرتفع
عبدالرحمن : وتين ماجت معكم؟
رهف : لا ماجت، مهند قال هي وسلمان لايطلعون من البيت وجتهم عمتك هيفاء وزوجها
عبدالرحمن : جوالي موجود؟
رهف : لا
عبدالرحمن : عطيني جوالك اكلمها
رهف : بس الوقت متأخر الحين يمكن نايمه
عبدالرحمن : لازم اكلمها
رهف : اتركها لبكره، عبدالرحمن اكيد بكره بتجي مع اهلك يعني لاتروعها هالوقت تحسب ان فيك شيء
عبدالرحمن : صدقتي..اجل بكره الصباح اكلمها ان شاء الله
على الساعه 10:15 الصباح :
دخلت الممرضه غرفه عبدالرحمن ومن سكرت الباب وقربت منهم وبيدها معقم وشاش جديد عشان تبدل الي عليه، ابتسمت بخفه من شافته نايم ورهف حاطه راسها على السرير ونايمه
من حست رهف ان في احد بالغرفه فزت ولفت حولها ولقت الممرضه واقفه جنبها
نطقت رهف برعب : اعوذ بالله من ابليس
الممرضه : لازم اغير الشاش الي عليه
رهف : الحين لازم؟
الممرضه : ايه
وقفت رهف قبالها : عطيني انا ابدله
الممرضه : تعرفين له؟
رهف : اي اعرف
الممرضه : بس لازم اشرف عليك لو في غلط عندك او شيء، مانبي الجرح يتجرثم
رهف : مايحتاج تشرفين علي، اعرف اسوي كل شيء بدون إشراف، بعدين زوجي ليش بجرثم جرحه؟
تركت الممرضه الادوات على طاوله السرير ونطقت : بس تخلصين رجعي الزايد وتأكدي انك معقمه الجرح زين
رهف بغيض : طيب
ناظرتها رهف بحقد لحد ماطلعت من الغرفه ومن سكرت الباب لفت رهف على عبدالرحمن الي صحى
رهف : بسم الله الرحمن الرحيم، متى قمت انت؟
نطق عبدالرحمن : من فزيتي..
شتت رهف انظارها عنه وهي متفشله، اكيد سمع الي قالته هي، وقفت مكانها لفتره طويله وهي فعلاً تفكر سمعها او لا؟
قطع تفكيرها صوته وهو يقول : رهف وين وصلتي؟
رهف : ها؟ انا هنا موجوده
عبدالرحمن : وشو بعد هالهواش مارح تغيرين الشاش؟
جلست بجنبه بعد ماقربت الأدوات، خجلت اكثر من قرب لها اكثر عشان تقص الشاش
من بدت تبدل القديم للجديد وهي ميته من خجلها، نظراته عليها ولمساته له، ماكانت متعوده على هالقرب ابد..
بطرف ثاني وتحديدا بحضانه الأطفال :
نايف والجوهره واقفين عند سرير سعود الزجاجي ويناظرونه
نطقت الجوهره بضعف بعد ما تأملته وكثير : بيكون بخير صح؟
قربها نايف له : اكيد بيكون بخير وش ذا الكلام؟
شدت الجوهره على ثوبه وتحاول تخفي وجهها بصدره، ماتبيه يلمح دموعها ابد، فكره انها حملت سعود ببطنها طول هالفتره وفجأه يموت قبل مايعيش حياته؟ هي ماحضنته لحد الحين بسبب انه مايقدر يطلع من الاجهزه الي حوله، ضناها تبيه يكون حولها، شدت على ثوبه أكثر وأكثر بدون ماتحس وهو شد على كتفها، يدري بها..تتخبى عنه بهالشكل اذا ماتبيه يشوف دموعها رغم انه يحس بالدموع على ثوبه الا انه يحاول مايدرك الوضع..
ببيت ابو عبدالرحمن :
جود : بس لازم تجي عندنا مارح اخليها تقعد بالشقه لحالها
الجده حصه : ليه عساها ناويه تقعد لحالها؟
جود : اي جده تخيلي؟ تقول بقعد بالشقه الأسبوع هذا لين يتأكدون من سعود وبتروح بيت اهلها هناك
ام عبدالرحمن : شكلها استخفت مب صاحيه، من بيقعد حولها؟
هيفاء : اذا رحنا لها بنقول لها تجي عندنا، يعني بما ان عبدالرحمن بيطلع من هناك لبيته ويومين وبيسافر تقعد الأسبوع هذا عندنا لين يطلع سعود بالسلامة وتمشي
وتين بأبتسامه : طيب عادي تعلموني متى بنروح؟
ام عبدالرحمن : ساعه ساعتين حولها
جود : والله يمه ولدك استخف، حاولي معه لايسافر وهو كذا
هيفاء : وليه مايسافر؟ حبيبتي ترى توه معرس ويده المصابه مب رجله عشان مايقدر يمشي
جود : طيب واللبس؟ صعبه عليه كل شوي بيبدل
الجده حصه : رهف تساعده
هيفاء : وأساسا مارح يطولون كلها اسبوعين وراجعين خل يغيرون جو شوي
جود : طيب قبل نروح المستشفى عادي نجيب ورد؟
ام عبدالرحمن : اصلا لازم نمر السوق
جود : ليه؟
ام عبدالرحمن : نجيب ملابس لـ سعود، اكيد الجوهره ماحسبت حساب تولد الحين
جود : بس الولد سعنون مره وش اللبس الي بيقد له؟
هيفاء : بنلقى له ان شاء الله، خلاص اجل اروح انا وياك ويروحون البنات يجيبون الورد
وتين بحماس : تمم موافقهه
بالمستشفى الساعه 3 العصر :
وقتها كانو البنات جالسين عند الجوهره بكون ان عبدالرحمن مشغول ببعض الأوراق للقضيه الي رفعها حمد أمس
الجوهره : انا شايله هم مايقبلون اخذه معي لهناك
هيفاء : صاحيه انتي؟ بتنقلين الولد على طول؟
الجوهره : لازم اروح عند امي مستحيل اقعد هنا
ام عبدالرحمن : يابنتي اقول تعالي عندنا هالاسبوع لين يطلع سعود بالسلامه وعقب روحي لأمك
جود : صادقه امي، اقعدي عندنا هالاسبوع وبعدين أمشي، بعدين انتي نفاس وتوك ماتعرفين له كيف بتسافرين فيه؟
نطقت الجوهره بعد تفكير : بشوف نايف قبل
رهف : ونايف بيوافق خذي العلم من الحين، مافي احد بالبيت عبدالرحمن بيروح قبل تطلعين من المستشفى
الجوهره : ان شاء الله
ام عبدالرحمن : وجبنا كم قطعه للصغير يلبسها لين طلع بالسلامه
نطقت الجوهره بأبتسامه : الله يعطيك العافية ماقصرتي
ام عبدالرحمن : شدعوه مابينا يابنت الحلال، انتي بحسبه بنتي وسعود زي ولدي ترى
كانت الجوهره خجلانه منهم فعلا، هالعائله مهما سوت لهم ماتكفيهم حقهم، واقفين معها من تزوجت واليوم؟ اليوم معها بولادتها الاولى، وقفاتهم معها لا تعد ولا تحصى ...
مرت 3 ايام على خير، الجوهره ببيت ام عبدالرحمن وسعود لسه بالمستشفى، نايف ينام مع سلطان بالملحق عندهم كون البيت خالي ومافيه الا الجد محمد بكون ابو عبدالرحمن عنده شغل بالشركه الي بالرياض، عبدالرحمن ورهف ببريطانيا ورحلتهم بتستمر لأسبوعين وبيرجعون..
الجوهره : جود تكفين لازم تجين معي
جود : والله سلطان تعبان ما اقدر اطلع واتركه كذا
الجوهره : وامك مارح تقدر تجي معي اكيد، تهقين وتين توافق؟
جود : جربي يمكن توافق
قامت الجوهره وخذت عبايتها وطلعت لغرفه وتين، دخلت الجوهره بعد ما سمحت لها وتين تدخل
وتين : أمري شبغيتي؟
الجوهره : تجين معي للمستشفى؟
وتين بأستغرابد : ليه؟ سعود فيه شيء؟
الجوهره : لا لا الحمدلله مافيه شيء، بس ما ابي اروح مع نايف لحالي
وتين : خلاص ابدل واجيك
الجوهره بأبتسامه : خذي وقتك انا بنتظرك تحت
وتين : طيب
قامت وتين وبدلت ملابسها بعد ماطلعت الجوهره، مع انها ماكانت تبي تطلع ابد الا فكره انها بتشوف سعود لأول مره فرصه مارح تفوتها، في فكرت من ناحيه ثانيه..ليه الجوهره تبي احد معها اليوم؟ تذكرت بلحظتها ان من احاديث الجوهره لهم كانت تقول لهم انها تنهار اذا شافته بالحجم الصغير هذا ولا تبي نايف يحس فيها، مشاعر الجوهره رهيفه مره وخصوص عند الأطفال فكيف بتكون لو كان ولدها؟
يتبع...
اعتذر منكم عن التأخير بالبارت بس كان عندي ظروف ولا قدرت اكمله بسرعه، بارت الختام بأذن الله تعالى بينزل خلال هاليومين