عند جود ورهف :
كانو يسولفون مع بعض وقاطعهم رساله جت لجوال جود
جود : رهوف عبدالرحمن يقول ان العم إبراهيم بيجي وبياخذك معه
رهف : ألبس عبايتي يعني؟
جود : طبعا لا بيتغدا مع جدي اول ثم يتقهون وتمشون
رهف : زين يعني في وقت نستانس فيه
ام عبدالرحمن وهي تجلس معهم : هلا والله رهوف شخبارك؟
رهف : هلا خالتي والله الحمدلله بخير
ام عبدالرحمن : ها بتجون الاسبوع الجاي الملكة؟
رهف : ملكة مين؟
ام عبدالرحمن : ملكة أمجاد
رهف : ما اتوقع اننا انعزمنا انا وامي لأهل الديره بس
ام عبدالرحمن : ام أمجاد لزمت تجون
جود : حلو يعني الجوهره بتحضر معنا؟
رهف : صح على الطاري ليش معد جت؟
ام عبدالرحمن : هي تجي يومين او ثلاث لان بيتهم مب هنا حول شغل نايف
رهف : احسب بيتها هنا والله
ام عبدالرحمن : بتحضر معكم ان شاء الله اكيد اهل نايف بيحضرون وبياخذون زوجه ولدهم معهم
جود : وذيك الغثيثه وبنتها بيجون؟
ام عبدالرحمن : اكيد يابنتي
وتين وهي تجلس جنب امها : عاد ايمانوه ذي بتنشب
جود : تكفين تضحك هي وامها لحووج
ام عبدالرحمن : عيب يابنت تأدبي
رهف : لايكون ذيك البنت الي لما عزمتونا كانو موجودين؟
وتين : علييك نور هي
رهف : تكفين خالتي من يوم جت عينها علي ونظراتها ماتريح
ام عبدالرحمن : الله يهديهم ويصلحهم مالنا دخل فيهم
وتين : طيب يمه الرجال متى بيزينون المخيمات؟
ام عبدالرحمن : الملكه بعد اسبوع يمكن قبل بيوم او بنفس اليوم
جود : يمه تذكرين يوم عرس اماني لما كانو العيال يجهزون المخيمات؟
ام عبدالرحمن : عساه يوم يطيح نايف؟
جود : اي وطاح فوق ولدك بعد يعني مدري كيف هالنحيف المسيكين تكسر وولدك بسم الله عليه ما جاه شيء
وتين : والله يذاك اليوم الجوهره على رجل قالو لنا طاحو ولا ندري وش جاهم
جود : عاد بعد الجوهره الله يهديها ليش تخليه يروح ويجهز وهم توهم واصلين من طريق سفر
رهف : ليش كيف طاح اصلا؟
ام عبدالرحمن : كان عبدالرحمن شايل نايف على كتفه عشان يركبون العقود والظاهر انه ما افطر ولا اكل شيء وهو فوق عبدالرحمن اغمى عليه وطاح على عبدالرحمن وجته رضه بكتفه
رهف : زين الله ستر وجت على كذا
قاطع حديثهم الخدامه وهي جايه
أرلين : ماما
ام عبدالرحمن : نعم؟
أرلين : بابا عبدالرحمن يقول جيب غداء
ام عبدالرحمن : يله جايه عن إذنكم يا بنات
راحت ام عبدالرحمن وغرفت للرجال الغداء وودته لهم الخدامه
وجهزت الغداء للبنات وحطته على الطاولة وتجمعو وبدو ياكلون
رهف : جود بتشترين فستان للملكة؟
جود : انا عندي فستان بس اذا بغيتي نروح نشتري لك
رهف : والله ياليت ماعندي فساتين تناسب للملكه لاني ماقد حضرت عروس ابد
ام عبدالرحمن : غريبه ليه؟
رهف : لان اهل امي بينهم مشاكل ولا حولنا احد بمنطقتنا ذيك
جود : وعمانك؟
رهف : ماعندي الا عمي تركي وان شفته كل خمس سنين حسنه
ام عبدالرحمن : الله يفرحكم فيه يبنتي
رهف بضحك : بزوجه جود عشان تقعد عندي كل يوم
وتين : تكفين خذيها وفكيني منها
جود بضحك : والله ان كانه كشخه تم ليش لا
كملو أكلهم وماخلت جلستهم من الضحك وكانت عفويه وتمنت رهف انها ماترجع للبيت وقتها لكن ماتقدر ترد جدها فا راحت معه لما خلص من الغداء
بعد المغرب عند رهف :
جلست جنب امها وسلمت عليهم وردو كلهم الا وليد
رهف : يمه قالت لك ام عبدالرحمن عن الملكة؟
ام وليد : اي بس ما قالت لي متى
رهف : الاسبوع الجاي ان شاء الله
ام وليد : زين
رهف : طيب يمه عادي اروح مع جود بعد يومين كذا للسوق نجيب فساتين؟
ام وليد : انا عادي عندي بس استشيري جدك
رهف : ان شاء الله
وليد : وانا طنطور عندكم؟
رهف : وين جدي فيه يمه؟
ام وليد : بالمجلس
قامت رهف وهي تطالع وليد بنظرات تستفزه وراحت لجدها
وليد : شفتي يمه شفتي كيف تصرفات بنتك!
سلمان : لاتنسى جدي وش قال يا وليد
عند رهف :
دخلت عند جدها وسلمت عليه
الجد إبراهيم : هلا بالغاليه هلا برهوف
رهف : هلابك يبه
الجد إبراهيم : امري شبغيتي يامّي
رهف : مايمر عليك عدو يبه بس عندي طلب صغيير مره
الجد إبراهيم بضحك : عطينا نشوف هالطلب السعنون ذا
رهف : بطلع مع جود بعد يومين كذا نجيب فساتين للملكة عادي؟
الجد إبراهيم : واعتبريه تم يالغاليه
رهف بفرح : عساني ما خلا منك يبه
حبت رأسه وهي تطلع والفرحه شاقه وجهها
ببيت ابو عبدالرحمن :
كان الجد محمد جالس مع عبدالرحمن بالمجلس ويسولفون
قاطعهم صوت جوال عبدالرحمن
عبدالرحمن : عن إذنك دقايق وارجع
الجد محمد : ابد خذ راحتك يابوك
طلع عبدالرحمن من المجلس ورد
عبدالرحمن : هلا بالي معد يسأل علينا
سلطان : هلا وينك فيه؟
عبدالرحمن : بالبيت ليه؟
سلطان : تقدر تجي للمزرعه؟
عبدالرحمن : سلطان صوتك مب مريحني وش فيك؟ احد من اهلك فيه شيء؟ وش الي صاير
سلطان : انت تعال للمزرعه وبقول لك كل شيء
عبدالرحمن : ابشر مسافه الطريق بس
سكر الخط واول ما لف على اساس بيدخل البيت ياخذ المفتاح كانت جود بوجهة
جود : شفيك؟ وجهك قلب ألوان
عبدالرحمن : انقزي جيبي مفتاح السياره
جود : ليه سلطان فيه شيء؟
عبدالرحمن : وانتي وش عليك يا بنت الناس جيبي المفتاح اخلصي
راحت جود وجابت المفتاح له وهو اعتذر من جده وطلع ومشى للمزرعه
يتبع...
